ÎTSÎKNA TEL LOVA RAWNGBAWL
Johana 3:22-30
- Vanlalthansânga
Thuhmahruai
College pakhata luh tum zirlai hmeichhe pakhat chuan a dilna lehkha ah chuan “Hruaitu i ni em?” tih hi chhan ngai a awm tlat mai nih chu. Tichuan tlang taka chhan mai a duh avangin huphurh tak chung siin, “Nilo,” tiin a chhanga, inringlo tak chungin dilna chu a theh lut ve ta rawih a. Mak deuh maiin a dilna chu college lam chuan an rawn chhang ta: “Diltu duhtak, dilna lehkha kan zirchianna aṭanga alan danin kuminah hian college hian hruaitu thar 1,452 a nei dawn a. Kan college lut turin lak i ni a, a chhan pawh hruaitu thar turte hian zuitu pakhat tal neise kan tih vang a ni,” tiin. Kan nun leh kan rawngbawlna hrim hrimah hian hruaitu nih hi kan chak hlawm hle a, achhan ni theia lang chu chu thuneihna chan kan duh vang te pawh a ni ang. Chuvangin rawngbawlnaah in hmuhthiamlohna te, inṭhenna te pawh a thleng fo a ni awm e. Tun ṭumah hian îtsîkna leh thikna tel lo in engtin nge rawng kan bawl theih ang tih Baptistu Johana nun aṭangin zir kan tum dawn a ni.
Isua
leh Baptistu rawngbawlna
Isua lo lan hma in Baptistu Johana lo
lan thu kan hria a, Isua ngei pawh Johanan a baptis a nih kha. Isuan rawng a
bawl ṭantirh khan Johana ngei pawh a
zirtirte nen rawng an la bawl a, Johana zirtirte khan Isuan zuitu angah tulh
tulh a ni tih an hriat khan an hrethiam lova Johana hnenah an sawichhuak hial
anih kha. Tin, Johana hnenah an lo kal a, a hnenah, “Rabbi, Jordan râla i hnena
awm, a thu mi i hriattîr khân ngai teh, kha mi khan mi a baptis a, mi zawng
zawng a hnênah an lo kal a ni,” a ti a. Johana 3:26. Johanan rawngbawlna a la
nei reng chung si a, mipuiin Johana kalsana Isua an zui hum hum mai an hmuh
khan Johana zirtirte kha an lungngai a, zirtirtu thar lo chhuak chu hmuh harsa
an ti deuh a ni. Johana leh Isuan rawng an bawl dun theih lai kha hun reilo te
chauh a ni a, Johana chu Herodan taninah a khunga, a lu a tan sak a nih kha.
Baptistu khan Isua nihna kha a hrechiang hle a, hmun sang ber chang tur chu
Isua a ni a, ani kha chuan ropui a tum lova, Isua kha lehkhalh a tum hek lo, a
rawngbawlnaah a chiang hle a ni.
Tihtur hriatchian
Rawngbawlna
kawngah chuan tih tur leh tih loh tur te pawh hriatchian a pawimawh hle ang tih
Johana rawngbawlna atang pawh hian kan hre thei a ni. Baptistu chuan Messia a
nih loh thu a sawia (Johana 3:28). Êng a nih loh thu (Johana 1:8) a sawi te,
Krista a nih loh thu a sawi (Johana 1:20) te, Elija leh Zawlnei anih loh thu a
sawi (Johana 1:21) leh thlalera autu aw mai a nih thu a sawi leh Isua pheikhawk
hrui phelh tlak pawh a nih loh thu a sawi te kan hmu (Johana 1:22-27) a. Chung
zawng zawngah chuan Johana chu a tlawm hle a, a tlawmna avang chuan Krista chu
chawimawiin a awm a ni.
Tihtur hlenchhuah
Baptistu
Johana khân moneitu ṭhianah a intehkhin a, khatih hun laia Juda ho inneihna ah
khân moneitu ṭhian kha an pawimawh hle a, engkima engkim an ni. Moneitu ṭhian
chuan inneihna a buatsaiha, sawmna a thawnchhuak a, lawichaw a buatsaih bawk a.
Lawiṭhat zanah pawh moneitu leh mo mutna tur thlengin a ven angai, moneitu
nilo, midang an luh lohna turin an nghak ran ṭhin a ni. A tawp a tawpah chuan moneitu ṭhian chuan ‘moneitu aw’an hre ta ṭhina. Moneitu aw ngei a ni tih a hriat
chinah chuan kawngkhar hawnsakin a luhtir a, moneitu ṭhian pawh hlim takin a
tihtur a tlak fel avangin a haw ta ṭhin a ni. Baptistu Johana pawhin moneitu ṭhian ang maiin a tihtur chu ṭha takin a ti a, lawm em emin a awm a, a
inthiarfihlim ta a ni. Rawngbawltu te zingah mahni rawngbawlna hlenchhuak
Johana anga hlim taka awm thei kan awm zel a pawimawh hle.
Îtsîkna tel lova rawngbawl
Baptistu
Johana chuan, “Lalpa kalkawng tirual rawh u, tia thlalera autu aw ka ni,” a tih
ang ngeiin a tihtur chu a hlenchhuak a. “Ka hnunga mi zui tur khan mi lehkhalh
tawh a ni, ka hmaa awm tawh reng a nih avangin,” a tih angin lansarh a tum ngai
lo a ni. Moneitu leh mo chu a inneihtir fel tawh a, a tihtur chu ṭha taka tizo
in, ani chu hlim takin a awm thei ta a. Chuvangin, “Ani chu tlatlum tur a ni,
kei erawh chu lâng tur ka ni” a ti thei ta a ni.
Rawngbawlna kawng hrang hrangah hian lansarh tum rana rawngbawl te a awm theia,
rawngbawlpui dang te nena inhmuh thiam loh dawn dawn te pawh awm thei a ni.
Baptistu Johana anga rawngbawlna hrechiang, rawngbawlna hlenchhuak, midang
luahlan tum lo leh tlawm taka rawngbawltu hi kan ram hian a mamawh hle a ni.
A ropui hle mai. Rawn tizel teh aw.
ReplyDeleteAwle.kan ti zel ang.
DeleteAvan ṭha em!!
ReplyDeletePost a Comment
He post chungchanga i ngaihdan lo sawi ve rawh: