Ticker

10/recent/ticker-posts

Hnam ropuite u, tho r'u le XX

- Lalhruaitluanga Chawngte

Khawvel thara kan luh hlim, kum zabi 20-na tir lamah khan khawvel indopui pakhatna a chhuak a, khawvel ram liante an indo nasa mai a nih kha. Chung lai chuan saphovin min awp a, kan tlangvalte pawh sapho hmelma beiin an rammu a nih kha. Ziak leh chhiar thiam pawh tlem te chauh kan la neih lai, khawvel thara bul kan țan tirh lam chauh la ni mah se khawvel indopuiah khan hnam lian leh ropui tak takte karah tuifinriat hmu hmasa kan mi hmasate'n hming an chher hle.

Zofa sanghnih rual kha German ral lian tawn turin an thawkchhuak a, Feren ramah indona hmunah kum khat vel ral beiin hna an zu thawk a ni.


Feren rama indona hmuna an awm lai hian doctor-te'n an endik țhin a, an hriselna a țha em tih te, insawiselna an nei em tih te enin, hna an thawk zel thei dawn em tih te an en țhin. Anmahni endiktu doctor-te chuan mak an ti țhin a!


"... Pawl dang kan tlawh țhinte chu, dam lo tak tak pawh ni chiah lote pawh dam lo hlea insawiin damdawi ina thawn an ngen fo a, nangniho erawh chu, dam lo ngeite pawhin, 'Ka dam e, hna pawh ka thawk thei tawh,' tih in ching hle a, in danglam bik a ni," an ti țhin.


Inenkawlna hmuna an awm ve pawhin, "Luseiho hi ngun taka en an țul a ni, la dam țha lo pawhin 'Ka dam tawh,' tih an ching a, an makin an danglam hle a, chuvangin lo en ngun hle ang che," tiin an hotute'n doctor-te an chah țhin!


Silchar pawh kawlva lenchham a nih lai, France ram hming pawh kan lam thiam hma, 'Feren' kan tih tlat lai, lehkha kan zir ve țan tihah khan khatih laia ram ropui sipai leh an doctor-te khan Chhinlung chhuak Zofateah khan thil danglam an lo hmu daih tawh!

Pic: #John_Chhana

Post i hmuh dan

Post a Comment

0 Comments