Hrangbana College Lady of the year 2021 Tluangi Chhakchhuak

Govt Hrangbana College (HBC) Lady of the year 2021 Tluangi Chhakchhuak i lo belchiang ang.


Tluangi emaw TluangTluangi emaw a koh thin Lalremtluangi hi Lallawmzuali leh Rosanglura te fanu niin, November 9, 1999 a lo piang a, Mission Veng, Aizawl a cheng leh khawsa niin, Presbyterian Kohhran-a lawi an ni.

Tluangi Chhakchhuak te hi unau pahnih niin, amah hi a naupang zawk a ni a, nuta pakhat a nei a ni.


EXPLOREMIZORAM.COM zawhna a chhan te i lo chhiar dawn nia.

Zirna lam:
- 2016 khan Don Bosco Higher Secondary School, Jorhat, Assam-ah Class 10 ka pass a. 2018 khan Class 12 Oikos Higher Secondary School, Tuikhuahtlang-ah pass lehin tunah hian Govt. Hrangbana College-ah Bachelor of Commerce 6th Semester ka zir mek a ni.

Hobby: Reorganizing and Reading.


I duhzawng leh ngainat zawng hrang hrangte?
• Lehkhabu duh: The Impossible by Joyce Smith.
• Actor/Actress : Keanu Charles Reeves/ Gal Gadot
• Zaithiam: Adele
• Chawhmeh: Alu leh Artui
• Hla : Rise up – Andra Day
• Hmun: Kan chenna hmun Mizoram hi a tluk tur chu awm lo mahse South Korea hi ka kal chakna ber te zinga mi a ni.
• Rawng: Blue
Ziaktu: John Green

Mize ngainat zawng: Mi taima leh harh vang, kawm nuam leh midangte chhiatna aia thatna lai hmu thiam tu.


• Mize ngainat loh zawng:
- Mi chapo, midangte rilru hrethiam lo leh mahni inkhawngaihna ngah.


• Kawppui tura duhzawng?
- Pathian tih mi, ruihtheihthil a fihlim, mi dah pawimawh thiam em em tu, mi taima leh chhungte thuawih a hmangaih thiam.


Relationship status:  /// 


Aim in life:  Bank Manager


HBC Lady of the year 2021 thlanna a tel chhan:
- Kan Class Representatives ten tel ve tura min lo thlan avanga tel ka ni.

HBC Lady of the Year 2021 nih hi i inring reng em?
- Aih, inring lo. Pathian khawngaihna vang liau liau a ni. Ka contestant puite an tha hlawm em em a, HBC Lady of the Year nih hi ka inring pha lo hrim hrim.


HBC Lady of the year-in i nuna nghawng a neih??
- Ka confidence level a san phah a. Tun tum chu kum dang ang lo takin Online mode a kal a ngaih avangin a kalphung a dang a. Pandemic lai a ni a, mahni in lumah shooting kan nei a, Govt Hrangbana College Instagram account-ah vote theihin dah a ni a. Preliminary round neiin Judge pa 5 ten a mal te te in min kawm theuh a, extempore 3mins kan nei bawk a. Chumi atang chuan Top 5 thlang leh in Final round-ah Zoom hmangin zawhna kan chhang leh bawk a ni. 
Mimal tak chuan a challenging-in a tough ka ti a, inzirna tur tam tak ka nei tih ka in hmuh chhuah mai bakah ka hlawkpui a, nakin zel atan pawh ka la tangkai pui em em dawn tih ka hria a ni. 

Modelling lam hi i tui reng em?
- Aih tui lo.


Zawhna dang:::
1. A tel lova i awm theih loh: Ka chhungte leh thiante

2. I nun kaihruaitu: Pathian leh ka chhungte

3. Hringnuna i hlauh ber: Hlawhtlin loh!

4. I tih ngai miah loh tur: Ruihtheihthil leh mi dangte hmuhsit.

5. Mizo Tualzal nuna ṭha i tih: Chhiatni thatni a kan intuamhlawm thin dan leh tlawmngaihna


6.  Quote i duh ber: Simple Living High Thinking

7. Mizoram leh Mizo tualzal nuna Mizo hmeichhiate dinhmun:
- Hmeichhia te hi kan dinhmun a sang chho em2 a, mi taima leh mi hlawhtling hmuh tur pawh an tam tawh hle a, chutih rual chuan inenfiahna tur pawh tam tak ala awm.

8. Hnam hmingṭhat leh hmingchhiat kawngah Hmeichhiate'n mawhphurhna:
- Hmeichhiate hi hman a kan pi leh pute hunlai ai kha chuan kan chungnung tawh em em a. Khawtlang leh ram hmasawnna kawng ah te pawh hma kan la chak khawp mai. Chhungkuaah tangkaina leh mawhphurhna tam tak kan nei a, kan hnam chawisangtute kan ni a, chutih rual chuan a tichhe theitu kan ni tel thei bawk a. Mawhphurhna sang tak kan kovah hian a tla a, kan nun kan uluk a ngai hle mai.

9. Hnam ziarang chawinun kawnga Hmeichhiate mawhphurna:
- Sawi tawh ang deuh khan hmeichhiate hian mawrhphurhna tam tak kan nei a, chu tihrual chuan mipate pawn an nei tlem bik tihna a ni chuang lo. Inlungrual taka kan awmkhawm a, kan inzah thiam a, kan intanpui chuan keimahni, a chhung a chengte hian a rah kan seng dawn a. Chuvang chuan inpumkhat a awm hi kan mamawh a ni.



10. Mizote tan 'Fa neih tlem' inzirtir hi a ṭulin i hria em?
- Hei hi chu nia, a hma chuan, fa neih tlem chungchangte an sawi ri thin a, tunah chuan neih tam lamah ke kan pen tawh zawk a. Mizoram a Kohhran lian ber te pawn neih tam an intihhmuh leh tawh a, a thatna tam tak a awm a ni.

11. Mizo hnam ṭhanmawh bawk nia i hriat:
- Thatchhiatna hi a to bul ber chu niin ka hria. Kan standard kan tisang a, thawhchhuah nei silo in ei kan ti tui a, kan thiltihna kawng hrang hrangah hian kan tei rei peih lo tlangpui a, hlawhtling tur chuan taimak tluka chhanna tha engmah a awm lo a ni tih hi kan hriat nawn fo a ngai.

12. Mizo hnam damna atana  kawng awm nia i hriatte?
- A hmasa berah chuan kan tawng humhalh kawngah hian hma kan lak hi a pawimawh ka ti a. Keimahni lo chuan Mizo tawng hi an rawn hmang dawn chuang lova, a bul tan tu kan nih a ngai a, nakin zelah kan fate leh kan tu te thlengin a hlut zia an rawn hre chho dawn a ni. A dawt leh ah chuan mitin nunah hian mahni intodelhna rilru hi tuk nung thar leh ila, keimahni kan intodelh chuan kan hnam kan ram hian hmasawnna lamah ke a pen chak ang. Kristian ram kan nih angin, rinawmna hi a pawimawh ka ti leh em em a, eng hna pawh thawk ila, rinawm tak a kan thawh hi a ngaia, sumdawnna lam emaw office lam hna pawh ni se. A tawp ber leh a pawimawh ber te zing a mi chu kan 'culture' kan hnam ziarang chawisan kawng a hmalak hi kan mawhphurhna a ni.


13. Hnam chhan nana Hmeichhiate ṭangkaina leh mawhphurna?
- Hmeichhia te hi kan pawimawh em em a, in lamah emaw pawn lam pawh nise. Kan lo sawi lan tawh ang khan, mipa kan ni emaw hmeichhia kan ni emaw, mawhphurhna hi a kan chungah a tla theuh a, kan hmachhawp hna eng pawh, rinawm tak leh taima taka kan tih hian a lo ropui ber mai. Mipa te tawiawm thiamtu hmeichhia nih tum ila, chutiang bawkin hmeichhia te thlavang hauh thiam tu mipa nih tum bawk ila. Kan infuih tawn a kan in tanpui tawn hi a tul tak zet zet a ni.

14. Zirna, Khawtlang leh Kohhran hi:
- Khawtlang leh Kohhran hi chu Mizo kan nihna in a ken tel a ni a. Kan zirna tibuai thei khawpa in hman erawh a tul lo. Zirlai kan nihna angin kan duty hi hriat a tha hle a, chutiang bawkin Khawtlang leh Kohhran te pawn hriatthiamna tam tak an nei bawk a. Mimal tak chuan in hman dan thiam a pawimawh ka ti hle.


15. Khawtlang, Kohhran leh nangmah:
- Zirlai ka nih angin, duh ang chuan Khawtlang leh Kohhran-ah a in hman tam theih lova, mahse ka theih ang tawk tawk chuan ka in hmang ve. Mizo kan nihna angin kan nun ah a bet tel tlat tawh a, mizo nih nawmna pakhat pawh a ni tel bawk. Zirlai kan nihna hi theihnghilh loh in mahni phak tawk ang hi ban ve zel a tha viau in ka hria.

16. Social Media leh Nangmah: Social Media hi chu ka khawih hnem em em lo. Social media hi a hmang thiam tan chuan a tha khawp mai, mahse a dik lo zawnga hmang tan chuan chhiatna tam tak a keng tel. Keimah ah chuan a tangkai khawp mai, Pandemic lai lo ni bawk nen, online based in engkim a kal tawh a, lehkha kan zirna kawng tam tak ah min tanpui a, awlsam taka kan zirtirtu te biak theihna a nih mai bakah study materials kan in thawnna a ni bawk a.  Hunawl ka neih angin ka khawih mai thina, min tibuai hran lo.

17. Mizoram ṭhalai tam tak tlakchham:
- Taimakna leh tumruhna. Kan tuina tak tak ai chuan hlawh a tha, a hna a zangkhai zawk tih lam hi kan pan leh mai thin a, hei hian keimahni ah hlawhtlinna kawng tam tak a khar a, chhungte rinchhan a nun pawi tih lohna te min siam a ni. Kan tumah hian kan chian a kan duh zawng leh tuina kawng kan pan tang tang hi a pawimawh ka ti hle.


18. Mizo ṭhalaite hian ngaihsan tur dik an ngaisangin i hria em?
- Social Media Era-a cheng kan ni a, kan khawvel hi a zau a, entertainment lam kan buaipui nasa tawh em em a, thalaite hian influencer tam tak kan hriat rualin kan mit titlai thei lam kawng kan zawh tam zawkin ka hria a, ngaihsan tur dik tak kan hmuh hmaih/thelh fo thin. Mi thiltithei tak pawh ni se, a nunah entawn tlak a awm si loh chuan, a sum ngahna ringawt khan kawng tha a thlen kher lo maithei a, mahse hna hniam tak thawk a mize belhchian dawl takah chuan inzir tur tam tak a awm thei zawk a, chutiang mi chu kan ngaihsan tur dik tak niin ka hria.

19. Ngaihsan tur dik nia i hriat:
- Mi tupawh hi ngaisang ila a that lohna lai a awm in ka hrelo. Mahse kan in enfiah atan a tha em em pakhat chu; kan mi ngaihsan te hi eng ang mi nge? Kan nunah thil tha a thlen thei em? Hma lam pan turin min pui em? Enge amah atang hian ka inzir chhuah theih? tih hi in zawh nawn fo a pawimawh hle in ka hria.

20. Hlawhtlinna tura pawimawh:
- Taimakna hi hlawhtling tura kan nun kaihruaitu a ni. Kan tumah chiang ila, kan thiamna kan hman thiam a ngai. Ho te ah duh tawk mai lovin, midang ten an theih chuan kan theih loh bikna tur a awm lo a ni tih ring tlat ila. A aia sang, a aia harsa pawh kan tum chuan kawng a awm tih kan thinglungah vawn reng a tha. Eng kawng pawh zawh ila, tumruhna kan neih a pawimawh hle a, hlawhtlinna hi kan ban phak ah a awm vek a, mi hausa emaw mi rethei tan tih bik engmah a awm lo. Mi taima leh mi tumruh ten hlawhtlinna chu an hmu mai thin.


21. hloh i hlauh ber:
- Ka chhungte. Ka chhungte hi ka nun a mi pawimawh ber te an ni a, an tel lo chuan tun ka dinhmun hi ka thlen phak ka ring lo, thu tha min hrilh tu, ka nun kaihruaitute leh hmangaih taka min enkawl tute an ni a. Chuvang chuan hloh ka hlau ber a ni.

22. Zo hnam inpumkhatna hi a thlen theih i ring em?
-  Kan inlungrual phawt chuan thleng thei tehreng mai.

23. Hnam dang nupui pasal neih hi:
–Ngaihdan tamtak chu a awm a mahse ka sawi lan duh chu Pathian chuan a fate ang vekin min en a, inhmangaih tawn theuh turin min hrilh bawk tih te mai hi a ni. 


EXPLOREMIZORAM.COM i hmuh dan: 
- A tangkaiin a tha ka ti khawp mai. Tunlai news tam tak hriatna kawng pakhat a nih mai bakah Mizo mipuite min influence-tu a ni tel bawk. A Platform hi a zauin thalaite kawng tam takin min kaihruaitu a ni a. Keimah tak pawh hian ka hlawkpui a, ka ngaihdan kawng tam tak min phochhuah tir avangin mimal takin ka lawm em em a ni. Duhsakna sang ber ka hlan e.


Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)



Post a Comment

He post chungchanga i ngaihdan lo sawi ve rawh:

Previous Post Next Post