EURO 2020 TITI - III: THIRD MATCH A HMUHNAWM DÂWN!

(Group tina tling thei turte bihchianna)
- K Remruatfela


Euro 2020 2nd match chu kan lo en zo leh ta a. Kumin Euro ah hian kum danga la awm ngai zên zên lo (Euro hmasaah kha chuan hman zuai a ni tawh tho a), group 6 awm atanga 3-na ti tha 4 ten Round of 16 an la lût thei cheu dawn a. Mahni group atang chauh ni lo group dang result zira la innghat tur an nih hlawm avangin 3rd match lo awm tur hi a hmuhnawm dawn tak meuh meuh a ni. A kalphung hi tlêma a danglam deuh avangin hre chiang tam tak awm dâwn mah se, hre chiang tâwk lo thahnem tak kan la awm tho a rinawm a. Chuvangin, tun tumah hian 3rd match kan en thiam lehzual nan group tin atanga Round of 16 an luh theih dan tur formula ka rawn chhawp chhuak hlawm dawn a ni.


Group - A
Group A ah hian Italy hi lut chiang tawh an ni a. A bâk zawng hian Round of 16 lut turin beiseina an la nei vek thung! Wales hian Italy hi draw a nih pawhin an lut chiang dawn a. An chak zo lova, Switzerland in Turkey an lo hneh ve thung a nih pawhin Italy in an sawp a, Switzerland in Turkey an sawp bawk te a nih lêm loh chuan Round of 16 luhna chance an nei tha hle! Mahse, an chak loh erawh chuan game dang zirin group atanga 3-na niha, 4 out of 6 atanga nêk chhuah theih tho chu an la ni. Vanduaina chance erawh a tam lo hle! Switzerland leh Turkey tan lût turin chak ngei ngei a ngai a. Switzerland hian Turkey an hneh dan leh Italy in Wales an hneh dan azirin 2-na nihna chance an la nei. An chak hrim hrim a nih pawhin 3-na atanga inhlankaina chance an nei tha hle bawk. Turkey tan chuan tlang tur chuan Switzerland hi hneh mai ni lova, an sawp tak meuh meuh a ngai dawn thung! Chu pawh group dang 3-na result atanga innghah la ngai tho a la ni cheu dâwn bawk!

Group-B:
Group B ah hian Belgium hi an lut chiang tawh a. A dang zawng hian beiseina an la nei thei vek thung! Finland hian Belgium hi an hneh zo lo a nih pawha an draw tal a, Denmark in Russia hi an hneh a nih chuan Round of 16 an lut thei dawn a. Tin, Denmark leh Russia hi an lo in draw palh a nih pawhin 2-na dinhmun hauh turin head to head-ah Russia ngam dâwn lo mah se, goal difference a chhe hran lova, point 4 an hmuh bawk si dawn avangin 3-na atanga 4 out of 6-a tlang theihna chance an nei tha hle bawk! Russia tan pawh Denmark hi an hneh zo lova, an draw tal nih pawhin Belgium an chak lo a nih ngawt loh chuan an tlang chiang a. Lehlam leh anni an in draw ve ve a nih pawhin Finland aiin head to head ah an that zâwk avangin an tlang dâwn tho! An chak lo a nih erawh chuan 3-na ni tur tal pawhin Finland hian Belgium lakah point pakhatmah an hmuh loh a ngai. Finland hian Belgium lakah point 1 tal pawh an hmuh a, Denmark an hneh hneh loh bawk si chuan Russia hi an tla chiang ang. Denmark tan chuan Belgium in Finland an hneh hi a pawimawh tak meuh dawn a. An elpui Finland an chak lova, Russia hi an hneh a nih chuan point 3 theuh hmutute zingah 2-na dinhmun hauhin an la invawrh nawlh thei! Goal difference a pawimawh ang. Finland hian Belgium hi an hneh a nih pawhin Russia hi an hneh phawt chuan 3-na an ni dawn tho a. Mahse, group dang 3-na dinhmuna innghat an ni dawn a. Point 3 atang chuan chance a tha lo maithei.

Group - C:
Netherlands hi tling chiang tawh leh group winner ni sa tawh, North Macedonia hi tla chiang tawh awmchhun an nih avangin an group hi 3rd match group hmuhnawm loh ber tur a nih hmel! Netherland leh North Macedonia inkhel tur hi inkhel awmze nei tawh mang lo a ni dawn a. Mahse, Austria leh Ukraine hian 2-na dinhmun an inchuh dawn avangin inkhel hmuhnawm tak tur chu a ni ang. An indraw a nih chuan head to head a en theih dawn loh avangin Ukraine hi goal difference vangin 2-na an ni zâwk dawn a. Austria hi an chak lo emaw an draw a nih emaw pawhin 3-na an ni ve ve dawn a. Anni pawh hi 4 out of 6 group atanga lut tur chuan group dang 3-na atang thoa innghat tur an ni a. Point 4 atanga innghah hi chu a nawm dawn zâwk avangin an chak zo lo a nih pawhin, chak loh ai chuan draw tal chu an duh ngei ngei dawn. Chumi an fight chu a hmuhnawm khawp ang.

Group -D:
Anni group-ah hian tumah hi la lût chiang leh tla tawh an la awm lova. England leh Czech Republic hi an in draw a nih chuan an tlang ve ve ang. England hi an chak zo lo a nih pawhin Croatia hian Scotland an hneh chuan an tlang tho a. Scotland zawk an chak a nih erawh chuan game 1 lo la awm tura an goal difference a zir a ni ang. A hniam berah 3-na erawh an ni hrim hrim tawh thung. Czech Republic pawh hi an chak zo lo a nih pawhin Scotland in Croatia an hneh chuan an tlang chiang a. Croatia zawk an chak a nih chuan 3rd match hnua goal difference a pawimawh leh hle ang. England ang thoin a hniam berah 3-na chu an ni hrim hrim dawn. Scotland leh Croatia hi tlang chiang tur chuan a tu emaw zawk zawk hian hnehna an chan ngei ngei a ngai dawn a. An in draw a nih chuan head to head a en theih dawn si lova goal difference nei tha  zâwk Croatia 3-na an ni ang. Group tina 3-na hian group dang 3-na te result a zirin a sâng 4 ten round of 16 an la lût thei dawn tih kan sawi tawh kha!

Group - E
Anni pawh hi group D ang thoin tling chiang leh tla chiang an la awm lo. An point hi a inan deuh thum avangin anni group hi chhût an buaithlâk hle a. Hrethiam tur chuan rilru zawng zawng nena in chhiar in chhiar nawn a ngai maithei. Spain hian Slovakia hi an hneh a nih chuan an tlang ang a. An chak lo a nih erawh chuan 3-na ni tur pawhin Poland hian Sweden hi an hneh loh a ngai ang. Poland hian Sweden hi an hneh a nih chuan an tla chiang bal ang a. Chutihlai erawh chuan, Poland in an tumpuite an draw thung a nih chuan goal difference tehfung hman a ni ang. _(Head to head a en theih dawn loh avangin)_. Mahse 2 points atang chuan 4 out of 6-a tlinna chance a sâng lo hle! Spain hian Slovakia hi an draw tal a nih pawhin 3-na ni turin Poland hian Sweden lakah point 3 an hmuh loh bur a ngai bawk. Sweden tan hi chuan tling chiang turin Poland draw ringawt pawh a tâwk a. An chak lova, Spain in Slovakia an hneh si a nih erawh chuan head to head ah an point 4 hmuh pui Poland hneh lovin risk status, 3-na an ni daih thei!  Mahse, Spain leh Slovakia hi an in draw tho a nih chuan chak lo eng ang mah se an tling dawn thung. A hniam berah 3-na tal erawh chu an ni chiang tawh! Slovakia hian Spain hi hneh zo lova an draw tal a nih pawhin chance an nei tha hle a. Sweden hian Poland hi an hneh emaw an draw emaw in an lut chiang a. Poland zawk hi an chak hlauh a, Slovakia in Spain hi an draw bawk si a nih chuan Sweden, Slovakia leh Poland te inhnehkual tawn theuhin point 4 theuh an hmu dawn tihna a ni a. Pahnihna dinhmun hauh turin 3rd match lo awm tura an goal thun dan leh Poland in Sweden an hnehna goal difference in a hril chauh ang. An chak lova Poland in Sweden an hneh bawk a nih chuan an tla chiang thung dawn. Poland in hnehna an chang lo a nih erawh chuan chak lo mah ni se 3-na dinhmun hauhin group dang 3-na dinhmunah an innghat thung ang. Poland tan hi chuan tlang chiang turin an chak ngei ngei a ngai a dawn a. Sweden hi an draw a nih chuan 3-na ni turin Spain hi an chak lo ngei ngei a ngai thung. Spain pawh hian chak lo chunga goal an thun tam ve a, an inhnehna goal pakhat aia a sân lova, anni'n Sweden an draw-na goal a tlem chuan 3-na pawh an la hauh zo lo thei cheu bawk! Chutihlai erawh chuan, a tu ve ve pawh pathumna ni mah se, point 2 hmua 3-na dinhmun hauh chunga 4 out of 6 atanga inhlângkai turin chance a chhe hle kan tih tawh kha!

Group - F
Group of Death, Group F ho pawh hi an la chiang lo hle! France hi tlang tur chuan Portugal hi an draw a tâwk a. An chak lova, Germany in Hungary an hneh bawk si a nih chuan risk status, 3-naah an la awm daih thei! Mahse, Hungary zâwk chakin Germany hi an sawp lêm lo a nih erawh chuan an tlang chiang tho ang. Portugal hi an chak zawh lova, Hungary in Germany an hneh bawk si chuan an tla chiang bal dawn a. France hi an draw a nih pawhin tling chiang tur chuan Germany leh Hungary game-ah an innghah a la ngai tho! Germany hian Hungary hi an hneh emaw an draw emaw a nih a, Portugal hian France an hneh zo lo bawk a nih chuan Portugal hi 3-na an ni ang a.  Hungary zawkin Germany an hneh erawh chuan France hi draw ringawt pawh ni se Hungary nen head to head enin Portugal hi an tling chiang thung ang. Germany hian tling chiang turin Hungary hi an draw tal a pawimawh dawn a. Chu pawh France hian Portugal hi an draw emaw a hneh tal emaw a ngai thung. France hi Portugal lakah an chak loh vaih a nih chuan Hungary lo draw pawh ni se, France hi head to head ah an hneh dawn lova. Pathumna erawh an ni ang. An chak loh erawh chuan 3-na dinhmun hauh tur pawhin an dinhmun a hlauhthawn awm hle. Portugal hi an chak loh ve leh a ngai dawn a. Portugal hian France an khelh hunah point 1 tal an hlawh chhuah a, Hungary lakah point an hmuh ve si loh chuan Germany hi an tla chiang ang. Hungary tan chuan tling turin Germany hi an hneh ngei ngei a ngai dawn a. Lo hneh ta pawh ni se, Portugal hian France lakah point an hmuh loh a la ngai cheu thung! Portugal hian France hi an draw a nih chuan head to head ah Portugal an hneh dawn lova. Amaherawhchu, France hian Portugal hi an hneh a, Germany an hneh ve bawk a nih chuan Hungary hi an tlang ang a. Portugal zawkin France an hneh a nih erawh chuan goal difference en hmasak leh phawt a ngai ang a, France lehpel tur chuan Germany an sawp a, Portugal in France an sawp ve tho a ngai dawn.  Chutianga goal margin sâng awm loh chuan, Germany lakah chak mah se 4 out of 6 nghâkin 3-na dinhmunah an awm tho ang. Germnay lakah point 3 an hlawh chhuah zo lo a nih erawh chuan an tla ngei ngei dâwn! 

4 out of 6 awmzia:
4 out of 6 kan tih fo hi thenkhat tan chian loh a awm theih avangin han sawifiah nghal law law ila. Kumin Euro ah hian kan hmelhriat than vak lo angin group tina a ti tha 6 atanga 4 te hian round of 16 luhna chance an la nei dawn a. Chumi avang chuan group 6 zinga 3-na vanneihpui ram 4 thur chhuak tur chuan mahni group chauh ni lo, group tin 3rd match inkhel te hian pawimawhna an la nei vek dawn a. Chuvangin 3-na ni chunga point hmuh tam te, goal difference neih tam te, goal thun tam te, chak neih ve te leh foul awm lo tura fair taka khelhte pawimawh hle dâwn a ni. Hetiang taka group dang inkhelin group tin dinhmun a nghawng hi kumin Euro ropuina bik a ni ka ti lo thei lo!

Note: Group tin dinhmun atanga round of 16 huna an tum theih ram te rawn tarlan vek a châkawm hle a. Mahse, group tin te dinhmun a la chian loh hlawm vek avangin tarlang vek tur chuan sawi kual thui a ngai dawn em em a, ka lo ti hrih ta lo mai a ni. Pathianin rem a tih chuan knockout stage dâwnah team khaikhinna lam kan la rawn târlang leh dâwn nia.

Post a Comment

0 Comments