COVID-19: TNT Aizawl-ah test runpui nei; hripui vei hmuchhuak hnem!

Aizawl | June 20, 2021: Thutak Nunpuitu Team (TNT) Muanna Veng, Aizawla Covid test runpui neih mekah tlai dar 5 thlenga mi 324 test tawh zingah hri kai 181 hmuhchhuah tawh an ni a. Test hi kalpui mek zel a nih thu Muanna Veng LLTF hruaitu te hnen atangin thu dawn a ni.

9:30PM:.Positive 528 an awm tawh niin thu dawn a ni.

Thutak Nunpuitu Team (TNT) Muanna Veng, Aizawlah Covid test runpui neih-ah hian mi 1500 vel test tura ruahman a ni.

Test hi sorkar ruahmannain Trinity Hospital, Ebenezer Medica Centre leh Aizawl hospital-a thawktu ten an kalpui nia thudawn a ni.

Thutak Nunpuitu Team enkawl, hnuchham, ruihhlo ngai leh rilru lam buaite enkawlna hmun, Aizawl Muanna Venga TNT hmunpui-ah vawiin tlai dar 6 thleng khan hri kai mi 324 vel hmuhchhuah an ni tawh a, endik chin aţanga chutin za zela 60 deuhthaw-in an kai a, endik hna kalpui chhunzawm zel a ni.

 Thu dawn danin, kar hmasa hmasa leh lam khan TNT Center-1 a damlo pakhat chu Center-1 hruaitu pakhatin bike-a phurin damdawi inah a kalpui a. Hetah hian Rapid Antigen Test hmangin an lo endik a, dam lo zawk hi a negative-a a hruaitu chu a positive thung a. Damlo hruaitu hi Aizawl Kanan Veng mi a nih angin, Kanan Veng 4C-ah dahluh nghal a ni. Amah hnaih thei awma ngaih te sample endiksak vek an ni a, an vaiin an negative vek a. Ngaihtha a an awm tawh hnu-ah hun a han kan hret a, an awm hun hmang zo tawh an chhungte'n an lakchhuahte chu, fimkhur thilthuah in an thlen hmaa inendiktir vek turin an hrilh a. Chutianga chuak te an han inendiktir chuan hri an kai ta deuh zel mai a.

Tukin zingah TNT lam hotute'n Health Minister Dr. R. Lalthangliana phone-in an dinhmun an hrilh a, ani'n hma la nghalin Medical Operational Team Chairman Dr. Z R Thiamsanga leh Dr. Pachuau Lalmalsawma te'n Trinity, Ebenezer leh Aizawl Hospital doctor leh nurse te nen TNT hi vawiin chhun khan an luchilh ta a ni. - AIR AIzawl

Hri kai leh kai lo endik hna hi chhunzawm zel a ni a, mi 1,300 vel awmna hi a hriat TNT hmunah hian zaninah a awm zawng zawng endik vek hman tum a ni. Tuna endik tawh zat hi mi 569 an ni.

"Hetiang taka an inkaidarh nasat avang hian thuneitute inberawnin Muanna veng TNT pumpui hi containment area-ah puan ni maise, 4C anga kalpui mai nise tihte an ngaihtuah thu Dr. Thiamsanga MLA, Covid 19 Medical Operational Team Chairman chuan min hrilh a, Medical team te hian zaninah test zawh vek an tum thu a sawi bawk.

TNT-ah hian an hotuten an lo inchhinchhiah danin mi 275 velin symptom an nei niin an sawi a. Tun dinhmunah chuan severe (damlo na tak) an awm lova, mild symptom vek an nih thu Dr Thiamsanga chuan a sawi.

MOT Chairman Dr Thiamsanga MLA chuan, "RAT hian 50% a hmu chauh anga saawi a ni avangin negative result nei tam tak zingah hian positive an awm dawn tih a chiang a, chuvang chuan an vai hian hri kai vek angah ngaih deuh tawp mai a tha hial ang," a ti niin thudawnna chuan a tarlang bawk!

• Tlai dar 6 thleng khan  mi 569 test ah, 324 positive hmuhchhuah tawh niin thu daw a ni.

• 7:00 PM: Pangpar huan bikah hian rilru lama rual ban lo mi 260 vel enkawl lai an awm a, tunah hian hmeichhia 98 test tawhah mi 42 positive hmuhchhuah an ni.

Mipa lam pawh test tih mek zel a ni. An ni bik phei hi chu fimkhur tura hrilh awmze nei miah lo ang chi kha an ni dawn a ni!

• 7:30 PM:

Test tawh zat mi 657, positive hmuhchhuah tawh zat 386 vel. Thu kal lai a nih avangin a zat chiah hi chiang taka hriat theih a ni rih lo!

• 9:00 PM:

Mi 823 test tawhin, heng zinga 416 an positive tawh nia thu dawn a ni.

• 9:30PM:

Positive 528 an awm tawh niin thu dawn a ni. 

Test tawh zat hi Mi 989 nia thu dawn a ni.

11:20PM:

*Hei hi TNT dinhmun chu a ni ta e -*

Reception, Choka leh Control room; mi 30-ah  mi 13 postive an ni.

Office hnathawk mi 21 niin, mi 6 an positive.

DAC-1 (De-Addiction Center-1)-ah mi 475 awmin mi 259 an positive.

DAC-2 (De-Addiction Center-2)-ah mi 62 awmin mi 20 an positive.

Pangpar huanah mi 272 awmin mi 137 an positive.

Naupang room-ah mi 232 awmin mi 105 an positive.

A hma a positive hriatchian sa, mi 7 an awm.

Heti hian mi 1099 test an ni a, mi 547 an positive a, positive % hi 49.7% a ni.

-  Vanlalmuanpuia TNT Jt. Director, Pangpar Huan Leader