Euro 2020 lam i hawi tawh ang u aw!

- K Remruatfela

Thalaite ngaihhleh em em Europe khawmualpui Football inelna chu nakzân lawkah a lo thleng dâwn ta reng mai a. Hemi atan hian April thla atang khan mahni tâwkah ka lo inpuahchah lâwk ve a, Team 24 te dinhmun leh an players te chanchin ka zirchiang thawkhat tawhin ka inhria! Khawvela ka ram tan ber, Argentina team tellohna mah ni se tunlai chu Euro ringawt ka rilruah  a lang a, thil dang a leng thei tawh thlâwt lo!

Kumin Euro hi tum dang zawng aia thlirin Players lâr leh tha an tam niin a lang a. Kum 1960 atanga han zir chhohin kum 2000 Euro leh kumin Euro hi Football ram lian leh Players tha fuankhawm tamna ber tur a ni hial âwm e! Euro 2000 ah khan kum 10 pawh ka la tling lova. Chuti chung chuan, khata players thenkhat te khan vawiin thlengin lung an la tileng thei zu nia! Media lam han umzuiin khawvel pawhin Euro 2000 kha a hlut hle tih a lang! Players lar tak tak - Figo (Portugal); Nuno Gomes (Portugal); Vieri (Italy); Toldo (Italy); Kluivert (Holland); Davids (Holland); Henry (France); Barthez (France); Alfonso (Spain); Milosevic (Yugoslavia) Mendieta (Spain); Nedved (Czech Republic); Zahovic (Slovenia) etc te khan ngaihven an hlawh lehzual tak zet!

Chutiang bawkin kumin Euro pawh hi players melh fal tur leh che tha tura beisei an tam em em a. Euro hmasa nena khaikhin phei chuan players inthathleih tak an ni. Big 8 - Belgium, France, England, Portugal Germany, Italy, Neitherland, Spain players te an inkhâirual tha em em a. A khawi ram pawh khi Champion thei khawpa players nei tha vekte an ni. A bik takin Belgium, France leh England te hian players an nei tha fâl a. Germany leh Italy hi an teamwork a hmuhnawm hle a rinawm bawk. Neitherland hian an tlar hnung innghahna ber, Virgil van Dijk an chhawr thei dawn lova. Chuti chung pawhin an tlar hnung a la khawng tha hle tho ang. Big 8 zingah Spain hi an duap deuh ber ang em aw a tih theih a. Tum dang ang lo takin hmatâwng an nei chaurau hle a. Nimahsela, Europe ram zinga ball thiam ber berte fuankhawmna an nih avangin an tawh a khirh zêk maithei tho!

Players malah chuan Mbappè (France); Lewandowski (Poland); Kante (France) Be Bruyne (Belgium); Bruno Fernandes (Portugal); Kai Havertz (Germany); Immobile (Italy); Witsel (Belgium); Foden (England); Varane (France); Weghorst (Holland), de Ligt (Holland), de Jong (Holland); Lukaku (Belgium); Pogba (France); Insigne (Italy); Werner (Germany); Harry Kane (England), Kimmich (Germany); Moreno (Spain); Depay (Holland) te; Christian Eriksen (Denmark); Burak Yilmaz (Turkey); Sancho (England); Courtois (Belgium); Locatelli (Italy);  Doku (Belgium); Gravenberhch (Holland); Alexander Isak (Sweden); Valakari (Finland); Alex Kral (Czech Republic); Kounde (France); Goretzka (Germany), Joao Felix (Portugal); Grealish (England); Mertens (Belgium) te hi hmuhnawm tura beisei an ni.

Qualifying match vel hrang hranga an game zir chian chuan rinhlawh lo tak Ukraine, Switzerland leh Austria te hi an rawn dawk chhoh hmel hle a. Players lâr fâl leh tha fal awm lo mah se, ngunthluk taka an game chîkin an hlauhawm ru riau, zuam ang ngawt chu an ni lo ang! Chutihlai chuan, France hi an players neih that vanglai tak hian an mualpho leh mai ang em aw tih hi a hlauhthawnawm. Kum 2002 World Cup-ah khan tun ang tho hian players tha an ngah em em a - Zidane, Henry, Trezeguet, Lizarazu, Desailly, Thuram, Viera, Makelele, Petit etc te nei mah se, Round of 16 pawh an thleng pha lo nih kha! 

England pawh hi chutiang bawkin players tha an ngah ber kum, 2010 World Cup-ah khan an mualpho tawh bawk a. Khami tum khan - Gerrard, Lampard, Terry, King, Ashley Cole, Crouch, Rooney, Joe Cole, Milner, James etc nei si khan eng ruai an ni chuang lo tih kan hriat theuh kha! Tun tumah pawh players an neih that ber lai an thleng leh a. Mahse, ngaih chu a ngam thei tawh chiah lo a ni. Spain lah an vanglai a pel tan tawh niin a lang a, Portugal team in balance tâwk lohzia hi sawi belh a ngai âwm love! Neitherland lah tûn hma, Van Basten, Rijkaard, Ruud Gullit inkawp leh Bergkamp, Kluivert, Stam, De Boer brothers etc inkawp ho laia an game an pha tawh lo nasa hle a. Team work nei tha - Germany leh Italy lah mitthlaah Semi Final bâk an pel hleithei si lova! Big 8 team zinga a la chuang bâng, Keeper atanga Forward thlenga in balance tâwk em em, golden generation hmang chho mêk, Belgium team hi an bûk a rit fâl nulh tawh in ti ve tho lo maw?

 

Note: Tuna mi hi chu a khuhhawnna chauh a la ni a. A tul dan zirin team mal tê tê te pawh kan la luhchilh chho zêl ang.

 (10.6.2021)

Scan to Donate for this website