CM Relief Fund atangin De-addiction centre leh Childcare Institution-te tanpuina pe dawn

# De-addiction Centre hrang hrang-ah enkawl lai mi 4007 awm mek!

Aizawl | June 10, 2021: Vawiin khan Chief Minister’s Relief Fund (CMRF) hman dan tur ngaihtuahtu Committee on Utilization of Chief Minister’s Relief Fund for COVID-19 chu an Chairman Pu Lalnunmawia Chuaungo, Chief Secretary hovin Chief Secretary’s Conference Hall, MINECO-ah an thukhawm a. Mizoram hmun hrang hranga De-addiction Centre leh Childcare Institution-te puihna tur Rs. 23,39,500 pek an remti.

He committee-ah hian Addl.Chief Secretary Pu JC Ramthanga chu Co-Chairman niin, Finance Commisioner Pu Vanlalchhuanga chu Member Secretary a ni a, tlawmngai pawl NGO Co-ordination Committee aiawh CYMA President Pu Vanlalruata leh Mizoram Kohhran Hruaitute Committee (MKHC) Secretary Rev R.Lalrinsanga te chu member an ni.

Social Welfare & Tribal Affairs Department list thehluh angin district hrang hranga De-addiction Centre-a enkawl lai mek (inmates) mi 4007 awmin, Child Care Institutions ah te enkawl lai 672 an awm a. Committee chuan mi pakhat zelah Rs. 500/- hisapin tanpuina pek ni se tiin a rel a. Heti hian De-addiction centre te tan Rs. 20,03,500 leh Child Care Institutions te tan Rs. 3,36,000 (a vaiin Rs. 23,39,500) pek tura ruahman in, vawiin tlai khan sanction order a chhuah nghal a ni.

Lockdown avanga chhungkua harsatna tawk, thawh khatna leh thawh hnihna a CM Relief Fund atanga puihna la dawng lo te chu an VLTF/LLTF te kaltlanga DC theuh a an report ngaihchan mek a ni bawk.

- DIPR