Ticker

10/recent/ticker-posts

AMC area-ah hripui do nan Zero Tolerance week kalpui dawn


Aizawl | June 13, 2021: Mizoram Sawrkar chuan Covid-19 darh zel tur venna’n Order No.B.13021/101/2020-DMR/Vol-IV, dt.12.6.2021 hmanga inkhuahkhirhna a tih chhuah leh tak avangin June 14 atanga June 20 thleng hian Aizawl Municipal Corporation Area chhungah “Zero Tolerance Week”  a kalpui dawn.





Thupek ang chuan, Sorkar SOP leh District Magistrate-in chhun lam leh zan lam atana inkaihhruaina dan a siam zawm lo te chu ngaihdamna tel lovin dan ang taka hrem zel tur a ni.

Deputy Commissioner-in duty tura a ruat zawng zawng-Executive duty, Police leh LLTF zawng zawngten an duty-na hmunah (chhun emaw zan emaw pawh ni se) Patrolling pawh uluk leh khauh tak leh ṭhahnemngai takin an kalpui tur a ni bawk ang tih DC, Aizawl District chuan mipuite a hriattir a. An duty-na hmunah mipui chetla uluk takin an vil tur a ni a, sorkar thupek zawm lo leh District Magistrate leh a aiawhte thawhpui ṭha duh lo te chungah dan angin hremna an lek kawh bawk tur a ni.

Chhun Duty, Containment Area leh Zan lama Duty tura ruatte pawh hmun khata awm ngawr ngawr lovin veng kilkhawr leh mawng deuh pawh uluk taka vilin an tlawh chhuah vek zel tur a ni. 

Vawiin khan Aizawl DC chuan Mizoram Sawrkar-in Order No.B.13021/101/2020-DMR/Vol-IV Dt12.6.2021 a chhuah bawhzuiin a hnuai ami ang hian dawr bungrua/chawhmeh semchhuah/lak, dawr hawn, hnathawh, zin veivah leh inkhuahkhirhna puan chungchangah thupek a chhuah.

A: Dan leh thupek zawm leh kenkawh chungchang 
Covid-19 vanga mipuiin kan tawrhna a nasa hle a. Sawrkar-in thupek a chhuah zawm tha lote hian midang hnena hri kaidarh theihna kawng (chance) an tisang hle a ni.  Mitin hi hri do theitu leh inkaidarhna laka chenpuite leh midang venghim theitu kan ni a. Sawrkar-in thupek leh inkaihhruaina a siamte zawm hi mitin ina kan mawhphurhna a ni. Thupek zawm leh kenkawh chungchangah hengte hi kalpui tur a ni ang.
i) Tumahin mahni in/compound chhuahsan loh tur a ni a, building pakhata awmte pawh intlawhpawh loh tur a ni. Sawrkar thupek zawm lo, phalna nei lova pawnchhuak leh Covid-19 Appropriate Behaviour (CAB) zawm lote chu dan anga hrem tur an ni a, inngaihhnathiamna awm lova dan kenkawh (No tolerance) kalpui tur a ni. Police, LLTF/VLTF leh Covid-19 Executive duty-te’n hei hi khauh takin an kengkawh ang. 
ii) LLTF/VLTF-te’n theihtawp chhuaha hmalaknate chhunzawm zelin khawng lehzualin Sawrkar thupekte kenkawh tur a ni a. Tlangau hmangin nitin hun remchangahte inkhuahkhirhna kalpui chungchanga mipui hriat tur puan thin tur a ni. 
iii) Covid-19 Executive Duty-te’n uluk takin an bial chhung an vil anga. A zing thei ang bera mahni duty-na bial chhung tlawh kual tur a ni. 

B : Dawr bungraw sem (home delivery) leh Dawr inhawn chungchang 

1. Home delivery :
i)Hri laka mipui kan him theih nan pawnchhuak lo leh mi inchim lova mipui kan awm a ngai a. Chuvangin a theih chin chinah dawr hawng lovin dawrkai/sumdawngte’n home delivery kalpui tur a ni. Mipui pawhin dawr hmun pan lova online emaw, phone hmanga mamawhte order lawk a, home delivery hmanga bungrua lak tum zel tur a ni a. Courier service leh e-commerce kalpuite, State pawn leh chhunga dawrkai bungrua leh state chhunga thar/siamte chu order lawktu-te hnenah pek (home deliver) theih a ni ang.  
ii) Home delivery tihnaah hian englai pawhin CAB tha taka zawm zel tur a ni a, bungrua pe (deliver) tute’n inchhung lut lovin an thil semte an pe tur a ni. Home delivery kalpui dan hi Executive Duty leh LLTF ten uluk takin an vil anga, dan bawhchhia-te chu dan angin an hrem zel ang. 
iii) Hun engemawchen Inkhuahkhirhna kalpui a nih tawh avangin eibar thil bakah nitin khawsaknaa mamawh chhungkua leh mimalin nghei leh lam ngai neih theih a ni a. Chutiang thil chu home delivery-a tih a nih hmaa dawr hmun ngeia kala en ngai a nih chuan mahni awmna veng LLTF/VLTF-te hriatpuina lehkha nen dawr neitute leh dawr awmna veng LLTF-ten ruahmanna an siam angin dawr-ah kal theih a ni anga, chhuah hma-in dawr neitu nen inbiak fel hmasak tur a ni. 

2. AMC area-a loh theih loh vanga dawr inhawn chungchang:
Loh theih lohna avanga dawr inhawn ngaite tan a hnuaia tarlan ang hian dawr hawn theih a ni anga. Dawr hawn a nih pawh hian mi inchim tir loh dan tur ruahmanna siam tur a ni. A remchan dan ang zela bungraw sem (home delivery) dan zawn zel tur a ni a. Englai pawhin CAB tha taka zawm tur a ni. 


Eichawp dawr 
Nitin: Zing dar 8:00 thleng 
LLTF ruahmanna-in: Distributor/wholesaler ten zan dar 8:00 atanga zing dar 4:00  inkarah LLTF hriatpuina-in bungrua an sem thei ang 


Thlai chi/tiak leh agriculture leh horticulture kaihhnawih bungrua
Nitin : Zing dar 5:00 atanga tlai dar 5:00
LLTF hriatpuinain: Heng dawr kal tur hian LLTF phalna lak hmasak tur a ni  

Thlai leh sa:
Zirtawpni : Zing dar 5:00 atanga tlai dar 5:00 
LLTF hriatpuinain: Thursday zan dar 8:00 atanga zing dar 4:00 inkarah LLTF hriatpuina-in distributor/agentte'n zuar chhawng tur hnenah bungrua an sem thei ang.
 Veng dangah chawhmeh lei tura kal loh tur a ni a. Chawhmeh lei tura motor-a chhuah khap a ni 

Thawhlehni : Zing dar 5:00 atanga tlai dar 5:00
LLTF hriatpuinain: Heng dawr kal tur hian LLTF phalna lak hmasak tur a ni. 
# Thawhtanni (Monday) zing dar 5:00 atanga tlai dar 5:00 inkarah  home delivery an kalpui phal a ni. Home delivery kalpui dan a chung (B.1)-a tarlan zawm tur a ni. 
# Zirlaibu zawrhna dawr, Bungraw phur motor mamawh, oil leh spare parts zawrhna, loh theih loh thila hawn ngai workshop, puncture works 

Zirtawpni : Zing dar 5:00 atanga tlai dar  5:00 
LLTF hriatpuinain: Heng dawr kal tur hian LLTF phalna lak hmasak tur a ni. 
Hmasawnna hna peng hrang hrang thawhna atana bungraw mamawh - iron rod, balu, rawra, lung, brick, cement, electric bungrua, insakna bungrua, Computer leh mobile zawrhna leh siamna 

# Ningani (Thursday) zing dar 5:00 atanga tlai dar 5:00 inkarah  home delivery an kalpui phal a ni. Home delivery kalpui dan a chung (B.1)-a tarlan zawm tur a ni.


Dawr hawn leh bungraw lak chungchangah heng hi zawm tur a ni.
i) Chawhmeh/sa zawrh turte lakna hmunah emaw an zawrhna tur hmunah emaw thutchilh nghal phal a ni lo. LLTF-te’n chawhmeh/sa zuarte thutna hmun tur hi mipui punkhawm tlem theih dan tur berin leh social distancing tha thei ang bera vawn a nih theih nan ruahmanna an siam ang.
ii) Executive Duty leh LLTF ten uluk takin an vil anga, dan bawhchhia-te chu dan angin an hrem zel ang.

3. Dawr hawn theih lohte tana bungraw insenghawi/inchinfel hun: 

AMC area-a dawr hawn theihin a huam loh dawr dang zawngte tan a hnuaia tarlan ang hian bungrua insenghawi leh intihfel theih a ni. 

i) Dawr awmna hmun LLTF-in a theih chin chinah dawr-te hi A leh B ah an then anga. Dawr A leh Dawr B-te hi Ningani (Thursday) emaw Inrinni (Saturday) zing dar 5:00 atanga tlai dar 5:00 inkar, a khawi emaw zawk zawk-ah an inchinfel theih turin ruahmanna an siam ang. Entirnan, ‘Dawr A’chu Thursday-ah, ‘Dawr B’ chu Saturday-ah. 
ii) Dawr neitu-in a awmna veng LLTF hnen atangin chhuah phalna lehkha a la tur a ni. 
iii) Bungraw insenghawi leh inchingfel tura dawr hawn a nih angin dawr theih tura inhawn loh tur a ni a, dawrtu neih loh tur a ni. 
iv) Dawr neituten thawktu a tlem thei ang ber an chhawr tur a ni a, Covid-19 Appropriate Behaviour tha takin an zawm tur a ni. 
v) Dawr inchinfel ni hian home delivery-in bungrua an pechhuak thei anga. Home delivery hi a kalpui dan B.1-a tarlan zawm vek tur a ni. 
vi) Bungraw inchingfel/insenghawi-te’n dan an zawm em tih LLTF leh Covid-19 Executive Duty-te’n uluk takin an vil anga, dan bawhchhia chu dan angin an hrem zel ang. 

C. AMC-area-a hnathawh chungchang: 
i) Mahni in compound chhuahsan lova hnathawh phal a ni. Veng dang atanga hnathawktu rawih phal a ni lova. Veng chhung mi leh veng chhunga bungraw awmsa chauh hman tur a ni. 
ii) Hmasawnna hna leh chhiatna thleng thei laka inven ngai hna thawh ngai chuan LLTF-ah in report tur a ni a. LLTF te hian bialtu Incident Commander hnenah   an thlen anga, Incident Commander-in hnathawh phalna a pe thei ang. 
iii) Incident Commander-in hnathawh phalna a pekte chuan hnathawhna bungrua – lung, balu, etc an lakhawm thei anga. Bungraw laknaah hian ICin permit a pek ken zel tur a ni.  

 
D. Zin veivah chungchang :
i) Zin veivah khap a ni a. Chhiat tawh leh damlohna thilah chuan VLTF/LLTF hriatpuina lehkha nen zin veivah theih a ni ang. Lehkhaah hian kal tanna/chhuahna hmun, kalna tur hmun, chhuah tan ni leh darkar, chhuah/kal chhan a chuang tur a ni. 

ii) Zin veivah dawnin kalna tur District-a Deputy Commissioner-in zinna hmun tur chu Containment Zone-ah a puang em tih finfiah hmasak tur a ni a. 
Chutianga Containment Zone-a puan a nih chuan kalna tur hmun (destination) VLTF/LLTF remtihna lehkha chu zin diltu chuan a nei ngei tur a ni a, hemi lehkha nen hian Deputy Commissioner/SDO(C)/BDO hnenah zinchhuah dilna hi thehluh tur a ni. DC hnena dilna chu online in he link ah hian dil theih a ni - mcovid19.mizoram.gov.in/pages/mpass/inter-district

E. Containment zone/area inkaihhruaina:
Containment zone/area-a puan chhunga hman tur inkaihhruaina (SOP) siam chu containment area chhunga awm-te’n an zawm vek tur a ni. Inkaihhruaina hi LLTF/VLTF ten mipui hriatah a zing thei ang berin an puang tur a ni a, Inkaihhruaina chu zawm a ni em tih thlithlai reng tur a ni. Khauh takin inkaihhruaina hi kenkawh tur a ni a, a zawm lote chungah LLTF/VLTF, Executive Duty leh police duty ten a tul angin hremna an lekkawh ang. Containment zone/area-a hnathawktu mamawh belhna a awm chuan DC emaw a aiawh Incident Commander hnenah ziaka thlen tur a ni.

F. Inkhuahkhirhna puan chungchang:
Sawrkar-in a siam SOP/inkaihhruaina-in a huam baka veng bil bik tana inkhuahkhirhna khauh zawk neih tul tihna a awm chuan LLTF/VLTF-te’n a chhan leh vang chiang taka ziakin Deputy Commissioner hnenah rawtna thlen theih a ni a. Mahni thu-a veng bil bik tan inkhuakhirhna hranpa/containment area/restricted area puan loh tur a ni.


Post i hmuh dan

Post a Comment

0 Comments