Nupui ngah ber leh Khawvela chhûngkaw lian ber dintu Zion-a boral

Aizawl | June 13, 2021: Khawvela nupui ngah ber leh chhûngkaw lian ber dintu, Chhuanthar Pâwl an tiha an Pa ber Zion-a chu kum 76 mi niin, zun thlum leh thisen sâng vangin, vawiin tlai dâr 3 khân Trinity damdawi inah a boral.


      Khawvelin Zofate min ngaihven chhan pakhat, khawvela Chanchin Thar (News) buaipuitu rintlak ber zinga mi, BBC meuh pawhin an rawn kawm tawh, Ripley's Believe it or not pawhin a rawn ngaihven hial, Pu Zionnghaka hi mi pakhat nih a tling zet mai.

      Pu Zion-a hian nupui 39, fa 94 leh fanu14, tu 33 bakah chhûngkaw member 181 zet a kalsan a ni. Kum 1942 khân Pu Khuangtuaha chu amah zuitu mi ţhahnem tak nen, Hmawngkawn lalin a khua aţangin a hnawtchhuak a. 
    Tichuan, tuna an chenna Baktawngah hian hmun an khuar ta a ni. Baibul-a kum sang rorêl hi anmahni kaihhruaina hnuaia lo thleng mek nia ngai an ni a. Khuangtuaha hi pathian biakin a hote hian an bia a. Khuangtuaha boral hnu hian, a fapa Chana'n Chhuanthar Pâwl hi enkawl ve lehin, a boral hnuah Zion-a hian hotu nihna a chhawm leh ta a ni.

An veng leh chenna in | Ela

      Zion-a pâwlte entawntlak êm êmna chu, an taimakna leh mahni thawhchhuah ringa an khawsak theihna hi a ni. Ni khata an ei leh in ringawt pawh chhûngkaw pakhat thla khat ei ang vel thuak a ni a. Mi tam tak sawi ang lovin, a nupuite hian anmahni duh thu renga Zion-a hi pasal atâna nei an ni.


      Khawvela chhûngkaw lian ber dintu, khawvel hmaa Mizote min hung langtu, mi tam tak tâna pathian tenau a han boral ta mai hi, a hrilhhai thlak viau a ni. 


Tuin nge Zion-a hmun ruak hi rawn luah ta ang? He Chhuanthar Pâwl hi engtin nge an awm tak zel ang? tih chu zawhna awm hmasa ber a ni.

Post a Comment

0 Comments