Aizawl | May 4, 2021: Mizo Students’ Union (MSU) General Headquarters, Aizawl chuan thuchhuah siamin, May ni 3, 2021-a Mizoram University Examination Departmen leh Ministry of Education Department of Higher Education Government of India thuchhuah te ngun taka a zir chian hnuin Covid-19 hri leng vanga India ram pum leh Mizoram State inkhuahkhirhna ngaihtuahin June ni 2, 2021 aṭanga Mizoram University hnuaia zirlai exam hmachhawn turte dinhmun chu a ngaihtuahawm hlein an hria a. Thuchhuah aṭanga a lan danin zirlaite chu online-a exam ngei ngei ngai an ni dawn a, Mizorama internet service chhiat dan ngaihtuahin zirlai tam zawkte chu an dinhmun a chhe hle dawn niin MSU chuan a ngai a ni.
MSU chuan MZU Exam Department thuchhuaha zirlai online-a exam turte internet
awmna ngeia an awm a ngaih thu leh internet awm lohna vanga harsatna awm
thei an buaipui loh tur thu tarlan a ni chu Mizoram hmun hrang hranga zirlaite
dinhmun ngaihtuahin âwm lo a ti a. Mizoram University thuneitute chu zirlaite
dinhmun ngaihtuaha hma la turin MSU chuan a ngen nghal a ni
MSU chuan Ministry of Education, Government of India leh Mizoram University
thuchhuahte avang hian Mizoram Chief Secretary leh ICT Department changtu
Minister Pu Robert Romawia Royte hnenah zirlaite exam hmachhawn turten
internet service vanga harsatna an tawh loh nan a rang thei ang bera hma la
turin a ngen nghal bawk a ni.
Covid-19 hri leng kara zirlai exam hmachhawn turte chu MSU chuan harsatna
an tawh leh an mamawh ṭul thil apiang a ngaihtuah zel dawn a. Zirlaite chu
exam an hmachhawn turah chiai lo tur leh hri leng laka an him nan sawrkar
dan siam zâwm chunga Mizoram leh kan hnam tan inbuatsaih sauh sauh turin
MSU chuan a chah nghal bawk a ni.
Post a Comment
He post chungchanga i ngaihdan lo sawi ve rawh: