COVID-19 | Chief Minister leh MKHC hruaitute inkawm; MKHC-in inkaihhruaina khauh zawk kalpui rawt!

Aizawl | May 4, 2021: Chief Minister Pu Zoramthanga chu vawiin khan Mizoram Kohhran Hruaitute Committee (MKHC) hruaitute chuan a pisa ah hmu in, COVID-19 hri leng thawh hnihna laka mipui an him zawk nan leh, he hri leng nasa taka darh zau zel chu chhut chah a nih theih nan sawrkarin inkaihhruaina khauh zawk kalpui se tiin an ngen.


MKHC hruaitute chuan Mizorama COVID-19 hri kai nasa taka an pung chho zel en hian hun reilo te chu tun aia khauh leh zual zawkin sawrkar hi a kal a ngai tawh nia an hriat thu an hrilh a. Thingtlang hmun thenkhat, hrileng boruak a ziaawm zawk naah chuan thlai chi tuh hunlai a nih avangin inthlahdul a rem zawk thei a, mahse khawpui hrang hrangah case a pun chhoh zel naah te chuan hun enngemaw chen chhung chu khauh taka inkhuahkhirhna hi kalpui tul niin an hria a. Hemi chhung hian chhuanchham leh ei harsa an awm loh nan kohhran ten theihtawp chhuah an inhuam thu an sawi bawk.

Chief Minister chuan an rawtna chu kan zavai tan a tha tur nia a hriat thu leh a tawmpui thu a chhang in, an rawtna hrang hrangte chu sawrkarin a ngaihtuah zui turin buatsaih a thehlut turin a lo ngen a. Heng hun khirh tak kan tawn lai hian khawsak harsa zawkte'n nitin mamawh lama an mangan lohna turin sawrkar, kohhran leh tlawmngai pawl te an tan ho a pawimawh thu sawiin, kohhran hotuten hemi kawnga an inhuamna chu lawmawm a tih thu a sawi bawk.

Vawiin an meeting-ah hian Chief Minister chuan Covid hri vei enkawlna lama mamawh hrang hrang Mizoramin a neihte chu sawrkarin a tul ang ang lei tura phalna a pek thu a sawi bawk.

Post a Comment

He post chungchanga i ngaihdan lo sawi ve rawh:

Previous Post Next Post