COVID-19 case pun chak dan leh kalhmang enin kan dinhmun a tha lo ta takzet - Health minister

• Pathian Engkimtitheia, a mite hualhimtu hnenah nasa lehzualin i tawngtai ang u.

Aizawl | May 4, 2021: Zoram mipui duhtakte leh Zoram pâwn hmun hrang hranga kan unaute, a hmasain chibai ka han buk leh che u a, kan boruak tawn in a zir loh em avang hian loh theih lohvin in hmaah COVID-19 chungchang thuchah sawi a han ngai leh thin a, boruak zangkhai deuh tak hnuaia thusawi hun a nghahhlelhawm tawh takzet a ni.

Dr Thangtea | File Photo

•           Kan state a COVID-19 case pun chak dan leh kalhmang enin kan dinhmun a tha lo ta takzet a ni. Hetiang zêla kan kal chuan in tuamhlawm thei lo dinhmunah kan lut thuai ang tih a hlauhawm hle a ni. 
 
•           Kum kalta chhûng zawng leh Kumin March thla thleng khan India rama State zawng zawng zingah positive nei tlem ber leh nunna chan tlêmna ber kan ni a, March thla tawp atang khan positive kan pung chak ta hle mai a, March thlaa positive 53 hmuhchhuah  anih laiin April thlaah chuan mi 1655 lai positive kan neih belh a, tun thla May ni 3 chhûng lek hian positive 425 hmuhchhuah tawh niin, nunna chân pawh hemi chhûng hian mi 4 lai kan neih belh a ni.
 
•           India hmarchhak State zingah pawh kan dinhmun a tha lo sâwt ta hle mai a, Assam tih lohah chuan case pun chakna ber kan ni ta hial a ni.
 
•           Khawvel pum huapa thlir pawhin ziaawm lam kan la pan thei tak tak lova, khawvel pumah positive 15,41,95,608 hmuhchhuah tawh niin, nunna chân hi 32,27,188 an ni a. he figure ah hian India ram hian kan thawhhlawk hle mai a, India ram pumpuia positive hmuhchhuah tawh zat hi 2,02,75,632 niin nimina hri kai thar ringawt pawh mi 3,55,769 an ni a. Nunna chan hi mi 2,22, 386 ni tawhin niminah ringawt khan mi 3,439 in nunna an chân a, unofficial phei chuan positive zât leh nunna chân zât hi a let 10 chung a nih an ring a ni.
 
•           Kan hriat theuh angin COVID-19 hripui laka kan dinhmunin a ziaawm zawnga hma a sawn theih loh avangin kar hnih zet kan  inkhuahkhirh hnuah, tunah hian a hma aia khauh lehzualin kar khat dang kan kal leh dawn ta a ni.
 
•           Hemi chungchangah hian ngaihdan tam tak a awm thei ang, thenkhatin a va khauh tawk lo em? inti a ni maithei a, thenkhat tan chuan a lo rip lutuk mah mah thei bawk a, kil tin atanga teh hnu a kan zawh tawk leh thatpui tlan theih tura min hrût rual thei tur ang bera kan hotute ruahman a ni tih hriain, midangte hriatthiamna nen kan beisei aia khawng lo a lo nih pawhin tha taka kan zawm hi kan himna tur a ni tih i hria ang u.
 
•           Kan dinhmun hi a khirh/critical tawh a ni tih kan hriat ka duh, khawvel ram ropuite leh India ram state hausa zawk te an talbuaina a ni tih kan hre vek a, kan health infrastructure in a zo lovang tih a hlauhawm takzet tawh.
 
•           Zêp rual lohvin Community Transmission hian kan zingah bu a khuar thûk tawh hle a ni tih kan hriat tlân a ngai. Aizawl khawpui leh district headquarters ni lo, thingtlang kikhawr zawk nia kan ngaih ah te pawh kaina chin hriat loh COVID-19 positive kan hmuchhuak ta nawlh nawlh mai. Khawilai mah hi a him bik e tia han sawi ngam tur a awm ta lo.
 
•           Kan himna tura hmalatu kan frontline workers te hawihhawm takin i dawngsawng thin ang u. Kan rilru a manganga, kan inkhuahkhirh nasa bawk nen, tupawh kan hahin kan thin a chhe tlang tawh viau pawh a ni thei. Zaidawh takin I thawkho hram hram ang u.
 
•           COVID-19 dona hmanraw hrang hrang leh damdawite a vâng tan hle tawh a. COVID-19 positive te enkawlna atana damdawi kan hman lar ber Remdisivir pawh a hma anga duh duha lei tur a awm tawh lova, a black a lei tur takngial pawh a vang tawh hle a ni.
 
•           Vaccine leh COVID-19 test kit chi hrang hrangte pawh a hma aiin lei tur hmuh a harsa tawh, India ramin a mamawh ang zât hi a siamchhuaktuten theih tawp an chhuah chung pawhin an  supply hneh tawh lo.
 
•           VLTF leh LLTF te bâkah Police duty te leh Midical health workers, kan frontline workers te an la tang mar thei hi a lawmawmin  an fakawm takzet, amaherawhchu kan dinhmunin ziaawm lam a pan theih loh chuan an tlin loh hun a thleng ve thei a ni. Mipuiten in hrethiam tawn takin kan theihna zawn theuhvah tan i la ang u. Sawrkar hnathawkte COVID-19 Executive Duty an rawn pên chhuak leh a, hei hian kan frontline workers te tha a tihchak lehzual ngei ka beisei a, ram leh hnam chhan nana thawk chhuak kan ni tih hre rengin kan u leh naute, kan nu leh pate, kan tu leh fate leh kan thenrual  thate himna hi kan mawhphurhna ah a tla tih hre nawn ila, fimkhur tak leh felfai takin tan kan la zel dawn nia.
 
•           A bìk takin kan healthcare workers te kan ngaihtuah a ngai a, damlo enkawl hi mi zawng zawng tih theih a ni lova, kan Doctor leh nurse te zingah positive kan awm leh thin hian thla a timuang lo a ni. Anmahni an fimkhur rualin kan fimkhur pui ve a ngai a, I inveng tawn ang u. 
 
•           Sawrkarin pisa kai dan tur a ruahman hi zawm hram hram ila, sawrkar hnathawkte zingah ID card hmachhuana tul lova teihawi mai mai a awm ve theih a, office duty emaw, COVID-19 Executive Duty emaw kan nih loh chuan pawn chhuah phalna a hranin pêk kan ni lo tih i hre theuh ang u.
 
•           Dawr hawn hun sawrkarin uluk takin a duang a, hemi hi tha taka kan zawm a ngai a, dawra thil lei dawnin in nek hulh hulh loh tur tih hre thar ila, social distancing vawng tha ila, thil lei lai emaw, lei hma leh lei hnu ah pawh a tul tâwpah lo chuan midang nen inbiak loh tur a ni tih kha I vawng reng ang u.
 
•           Dawr neituten customer te mumal takin registar-ah chhinchhiah tur a ni tih kha uluk takin zawm ila, dawr tinah Sulhnu application QR Code târ vek tur tih a hma a kan sawi thin kha zawm tha ila, smartphone kan keng anih chuan he QR Code hi scan ngei ngei tur a ni. Hengte hi contact tracing tih a tûl palh chang a, hnathawh a awlsam nan leh kan zavaia kan him nan a pawimawh a ni.
 
•           Inkhuahkhirh, inkharkhip boruakah hian khawlum bawk nen ina tawm sen reng a hrehawm duh dawn tih ka hria, han teihawi a hawi khawthawn te pawh kan chak ngei ang, mahse kan him nan insum hram hram ila, lirthei neitute pawh a bik takin intihthawven nan inkhalh chhuak rih lo turin ka ngen tak meuh che u a ni.
 
•           Chief Minister’s Relief Fund ah mi thilphal leh tlawmngaiten COVID-19 dona atan sum in rawn thawh thin hi kan lawm takzet a, kohhran, pawl, mimal leh office hmingte a in rawn in hawng thin hi Mizote kan inhmangaihzia tilang tu a ni a, ram leh hnam hmangaihna thinlung atanga lo chhuak a ni tih a hriata, min fuihtu leh hmalam pan tura chakna min pet u te zing ami in ni.
 
•           COVID-19 virus pudarhtu chu mihringte kan nih tlat avangin kai lo tura hma la thei chu keimahni  theuh kan nih rualin, a thehdarh kawngah pawh mawh nasa takin kan phur theuh a ni tih hria ila.
 
•           Sawrkarin kan zawm tur leh tih tur a duan te hi midang tan a ni bik lova, nangmah leh keima tan pawh a ni ve tih hriain thuawih tak leh fimkhur takin I zawm ang u. COVID-19 appropriate behaviour – Mask vuah uluk, kut silfai uluk leh midang hlata awm mawlh kha i vawng hram hram ang u.
 
•           Mipui thahnemngaihna au aw kan bengah a cham reng a, kan tha ti chaktu in ni a, lawmthu ka sawi a ni. Hruikhat vuana rual taka kan tan ho leh a ngai a, in sanmar that that leh a ngai tih hre tlang ila, hun hmasa lamah kan ti tha a, 2nd Wave kan hmachhawn mekah hian a aia nasa a kan beih loh chuan  a tuartu tur keimahni kan ni tih I hre theuh ang u. sawrkar in lockdown a puan kher ngai lo hian mahni chhungkua kha in lockdown ngam ila, kan himdam a pawimawh hmasa ber e, he hun harsa hi damtlang takin paltlang ila, Pathianin kan hmalam hun chu min ngaihtuahsak em em ang.
 
•           A tawp berah chuan Pathian Engkimtitheia, a mite hualhimtu hnenah nasa lehzualin I tawngtai ang u. Thinlung zawng zawnga kan vei a Pathian kan auh ngat chuan keimahni pawhin kan fim khur lehzual phah ngei ang a, malsawmna dawng tlak ni turin mahni hmun theuhah tan I la sauh sauh ang u.

Post a Comment

0 Comments