Hripuiin Khaw hrang hrang a tibuai a, chutihlai chuan Sihphir khua pawh awh! Sihphir venghlun pawh a tihbuai zingah an tel ve. Nikum lam daih aṭang tawh khan he hripui hian luhchilhin, mahse, rei lote-ah do hnehin, muang takin an awm leh tawh a.
Mahse, Tichuan, thlamuang taka an awm tawh hnu, nunphung pawhin ziaawm lam a pan tawh nia hriat tawh hnuin, April 26 lo herchhuak chuan Sihphir venghlun tana chanchin duhawm loh tak a lo herchhuahpui ta tlat mai!
Nu pakhat chu insawiselna a neih deuh avanga RAgt tihtir chu Covid-19 a lo positive hlauh mai. Chu mai a la ni lo, a kaihhnawih kal zelah vohbik pakhat chu RAgt tihtir ve niin, a positive ve leh ta tlat mai. Mipui kan ngui nghiai a, chutah an positive (vohbik) erawh a la hlim hle thung si!
Khawtlang mipuite thinlungah zawhna chhan sen loh a lut zut zut a, "Engtin nge a inenkawl anga, engtin nge a awm ang," Khawtlangin an lainat a, "Tuin nge CCC (BSUP)-ah chuan awmpui ta ang," tiin mipui an inzawt a ni ber tawh.
Chutia Vohbik a positive takah chuan ni tina a awmna thin dawr neitu nula chu test ve a lo ngai ta a, an han test ta a, a lo positive ta ngei a. Chu nula fel, a dawrah pawh enkawl thintu chuan hripui karah pawh a enkawl ta a ni.
"He vohbik enkawl tura Lalin rem a lo ruat tawh chu tu ma'n an sawh sawn dawn lo. Chu Lal remruat chu a hunah, a hmunah mawi takin Lalpan a hna chu a thawk ngei e. He vohbik hming hi Lalremruata niin, a enkawltu dawr neitunu hi nula Lalhmunmawii a ni." tiin LR Chhana chuan a ziak a ni.
Tunge Ahmuni chu:
Sihphir Venghlun nula Ahmuni tia koh thin Lalhmunmawii hi Lalthianghlima leh Lalthanpuii fanu niin, an unau hi pasarih an ni. Kohhranlamah Isua Krista Kohhran a lawi niin, Sihphir Venghlun Branch YMA-ah branch committee member a ni mek.
Ahmuni hi Zaipawl lamah nise, IKK kohhran bial zaipawl ah kum 8 chhung telin 2019 khan a chawl a, Cultural lamah pawh 2012-2012 chho vel khan a inhmang bawk a ni.
Thiam taka a lamna Music video:
Vohbik-in an belh nula fel hi, amah Ahmuni'n "chanchin ziah tlak ka nei love," tia a sawi hi ziah tlak a nih zia tichiangtu a ni hial awm a sin!
Eng vangin?
vohbik positive hi ni tinin thingpui dawr pakhatah ṭhuin, chu dawr neitu Ahmuni chuan chhûn a lo thlen apiangin miten man chawia an ei ṭhin chu a thlawnin a pe ni tin ṭhin a. Mi bengvar deuh ṭhenkhat chuan a ei mante hi an tumsak châng pawh a awm bawk. He vohbik hi chhungte nei lo a ni lo a, amah a sual hran lo a, khawtlang pawhin kan ngainat leh kan fiam fo hi a ni ve a. An inah tak chuan a haw ve zeuh zeuh ṭhin. Chu dawr bula Chhungkaw pakhat hian an awmpui chawt a, zing leh tlaiah chaw te eiin a riak ve mai ṭhin a. Chhûn lamah thingpui dawrah chuan a hun pum a hmang ṭhin. Hei hi sawi lang leh hrâm i la, "Heti ang vohbik dawra i awmtir reng te chuan dawrtu (customer) ṭhenkhat te an lo chawl duhloh phah ang e," an tih pawhin, dawr neitunu chuan, "Heta awm hi nuam a ti ve a, malsawmna ka dawnna pakhat niin ka hria," a tih ve tlat avangin dawr neitunu hian ten hauh loin an inhrawn ni tin ta ṭhin a ni.
"Chuti anga ni tina thingpui dawra awm ṭhin ta chu a awmna dawr neitunu Ahmuni chu test a ni ve ta. positive ve ta tlat mai! A va lawmawm tak em.. Amah chu a lawm lo viau ang. Mahse, "Tu nge kha vohbik kha buaipuiin enkawl ta ang," tih zawhna chu chhânin a awm ta thung si. He dawr neitunu hian a enkawl ang a, a bul aṭanga a tawp thlengin a ṭulpui ngam dawn tih hi khawtlang mipuite thinlungah ring takin a ri a, kan thawpikna chu chhem bo ang duak a lo ni leh ta a." tiin LR Chhante-a'n a ziak.
"He vohbik hi a nawrh a kal tluan chuan enkawl harsa ve tak a ni a. A nu leh a chhungte ai mahin he dawr neitunu hian a enkawl thei ber a; tichuan, zan khat BSUP Durtlang lamah an han riak a, kan vohbik pawhin damdawite eiin doctor ten damdawi leh taksa tana ṭha tur an pek ang zawng zawng chu dawr neitunu kut aṭang ngeiin thuawih takin a eiin a in ta a ni. Dam takin an lo chhuak leh thuai ang tih kan ring a, he nula erawh hi chuan hriat reng a hlawh kumkhua tawh ang." tiin April 27 khan LR Chhante chuan a ziak a ni.
Hripui hian duhsak bik a nei lo kan tih laiin duhsak bik leh tihbuai chak bik a nei emaw tih mai tura a awm chang a tam a. Hri vei enkawltu ngei, a chhun a zana a bula khawsa a negative tlat laiin vawi khat inchibai vangin thenkhat lah an positive leh lawi a, ni e, thenkhat phei chu positive luhna hnu dawra an luh ve vang ringawta buai ta pawh an awm nuk kha maw!
Hripui vanga khawvel a buai a, mi rama buaina tur chauh emaw tia kan thlir laiin Mizoram-ah pawh min tibuai a, he thu ziah lai thleng hian nunna chan 17 an tling tawh a, chu pawh Mizoram chhunga nunna chan chauh an la ni!
He hripui zet hi chuan Mizo tualzal nun a tibuai a, min tibuai a, min tikhawbaw zova, ralmuanna rama cheng si hian kan ralmuang lova, nunphung a tibuaiin Mizo tualzal nuna thil thleng ngai lo tam tak a thleng a, thiante nena kuhva, sahdah, khaini, zial leh tuibur thlenga intheh thin hnam tan hian a va han buaithlak zozai si em!
(Feedback at: admin@exploremizoram.com )
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]
EXPLORE MIZORAM
email: admin@exploremizoram.com
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
(Website leh a hnuaia fakna hi lo hmet ve rawh.)
Post a Comment
He post chungchanga i ngaihdan lo sawi ve rawh: