Sports minister-in a bial chhunga AAY leh PHH chhungkua zawng zawng kumin chhung Ration a khulhsak dawn

Aizawl | May 20, 2021: Aizawl East-II Bialtu MLA leh Minister of State ni bawk Pu Robert Romawia Royte chuan Aizawl East-II bial chhunga mi harsa (Ration Card Eng (AAY) leh Ration Card Hring (PHH) chhungkua zawng zawng mi 11,087 te tan Buhfai Ration chu May 2021 atanga kumin December 2021 thleng a khulh sak thin dawn.

He thu hi DIPR chuan tarlangin, Aizawl East-II bialtu MLA chuan a bial chu Covid hripui a nuai nasa em em a, hri vei tamna ber bial an nih chhoh zel avangin sorkar atanga tih theih loh tam tak pawh mimal ang leh chhungkua angin tih tulin a hriat thu leh a Minister tirh atanga khawih che lova mi retheite puala an chhungkuain ama hlawh an lo dah khawl ve atangin thla thum Ration chu an khul ang a, sorkar sum hmang lovin December thleng chu Aizawl East-II biala AAY leh PHH chhungkua mi 11,087 te tan Buhfai Ration chu khulh sak zel an tum thu sawiin Minister chuan hetianga an chhungkuain miharsa zawkte an tanpui thei chu an lawm hle a ni a ti.

Pu Robert Romawia Royte chuan tun hripui lengah hian Aizawl East-II chhunga Councillors te, LLTF te leh Kohhran hrang hrangte an tangrual tha hle a, Veng 7 awmah Veng 6 pualin CCCC pawh tha taka kalpui mek a ni a. Chhinga Veng Kohhranin Covid Negative thar, awm hran ngaite puala Quarantine Facility tha tak mai an Kohhran senso veka an din te hi entawn tlak tak zet a ni a ti.


Aizawl East-II bialtu MLA Pu Roberta leh Pi B.Lalawmpuii Bialtu Executive Councillor te chuan nimin khan Tuithiang CCCC hawn thar an tlawh a, sumfai leh medical equipments te an pe a, Chhinga Veng CCCC te, Armed Veng,Armed Veng South leh Chite Veng intawm Ward 8 CCCC leh Dawrpui Veng CCCC te Sports Minister hian a tlawh a,tanpuina sumfai te a pe bawk.

Sports Minister Pu Robert Romawia Royte chuan Zoram mipuiin hun harsa an tawn lai hi party leh pawl sawi lova tanrual hunlai a ni a, a bialah chuan party-a inthiarna awm miah lovin 'sem sem dam dam,ei bil thi thi' tiin sorkara thuneitute pawhin hma an la mek zel a ni a ti.

Pu Robert Romawia Royte chuan state dangte anglo takin Zoramah chuan Sorkar hnathawk lo pawhin Covid avanga Sorkarin inenkawlna a pawmpui zawng zawng inenkawlna senso bill let a phalsak te hi a ropui a, state dangte mak tih a tling a ni a ti a. A bial Aizawl East-II-a CCCC 4 awmte hi sorkar pawmpui vek an nih avangin Mizoram Health Care Scheme dan angin a mimalin dan phalsak chin angin an senso an bill thei dawn a, CCCC enkawltute pawhin damlote hrilh hriain a Claim Form fillup thlengin buaipui an tul mai thei a ni tih a sawi.

- DIPR

Post a Comment

0 Comments