Oceania Taekwondo Championship-ah Mizo naupang Esther Sektak-in medal la


Aizawl | May 23, 2021: Oceania Open Online Taekwondo Championship neih mekah Mizo naupang Esther Lalchhanhimi Sektak (kum 10) chuan Individual poomsae 9-11 yo Female category ah Bronze Medal a la.


He Championship hi World Taekwondo leh Oceania Taekwondo te ṭang kawpa buatsaih niin, May 15 khan ṭan a ni a, May 30 a zawh fel tura ruahman a ni. Hri leng vanga inelna pangngai buatsaih theih a nih loh avangin online-a inelna neih a ni a, intihsiakna a tel te hian Video submit-in International referee leh judge te'n an endik hnuah result puan a ni. 


Esther Lalchhanhimi Sektak hi SP Zamuana leh Ramengmawii te fanu niin tunah hian an chhûngkuain Chhinga Veng, Aizawl-ah ah an khawsa mek a, St. Lawrence School a kal lai mek a ni.

Taekwondo hi GIDAE Taekwondo Academy ah zir mekin, 2016 khan kum 6 mi a nih atangin a zir ṭan tawh a, Mizoram leh National Championship ah te pawh medal tam tak a lo la tawh bawk.


He inelnaah hian Esther-i bakah Mizo naupang dang pahnih Pansy Rampanzeli leh Joshua Lathlangdika te an inlan a, anni hi Exodus School a kal lai ve ve niin an school Taekwondo academy aṭanga Taekwondo zir an ni.

2 Comments

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post