MLA Lalrinsanga Ralte-in Bilkhawthlir PHC tan ambulance hlan; "'Keimahin chaw ei tur ka neih chhung chu kan vengah ei tur nei lo chhungkua an awm tur a ni lo', tih rilru pu chungin he inkharkhipna hun hi hmang țheuh ang u - Lalrinsanga Ralte

Aizawl | May 13, 2021: Vawiin chawhma khan Pu Lalrinsanga Ralte, MLA, Serlui Assembly constituency, Rubber and Allied Crops Development Board Vice Chairman ni bawk chuan Covid-19 hrileng dona kawnga a bial chhung Bilkhawthlir Primary Health Centre-a thawktute thuam chak nan MLA Local Area Development Scheme hmanga Ambulance a ruahmansak chu a hlan.


Pu Lalrinsanga Ralte chuan Covid-19 hrileng avanga hmasawnna hna kalpuina kawnga harsatna hrang hrang karah Bilkhawthlir PHC chuan hmasawnna hmel thar a hmu mek zel chu lawmawm a tih thu a sawi a, X-ray khawl bunna tur hmun sak te leh PHC building thar sak mek te chu Bilkhawthlir PHC huam chhung khaw mipuite tan malsawmna thlentu ni zel turin duhsakna a hlan. Covid-19 hrileng dona kawnga dam lo phurh kual ngaite, ramri hnaiha screening point-a Covid-19 kai hmuhchhuahte Covid Care Centre-a phurh chhoh nan te bakah khawtlang hriselna kawnga hnathawh nan MLA-LADS hmangin Ambulance chu ruahman a nih thu Pu Lalrinsanga Ralte chuan a sawi a ni. Hrileng dona kawnga Bilkhawthlir khawtlang hruaituten sawrkar an thawhpui tawhnaah lawmthu a sawi a, thawhhona țha hnuaiah chuan mipuite harsatna sutkian zung zung țhin a nih thu sawiin chhuanchham awm lo tura hma la zel turin VLTF hruaitute a chah bawk a ni. 
" 'Keimahin chaw ei tur ka neih chhung chu kan vengah ei tur nei lo chhungkua an awm tur a ni lo', tih rilru pu chungin he inkharkhipna hun hi hmang țheuh ang u," a ti a, mi harsa zawk leh nitin inhlawhfa chawpa eizawngte ngaihtuah hmasa turin khawtlang hruaitu kalkhawmte chu a chah bawk a ni.

Ambulance hlanna hun hi Pu Timothy R.Lalhmangaiha, BDO Bilkhawthlirin kaihruaiin Rev. Z. John Malsawma Colney chuan Ambulance Pathian hnena hlanna hun a hmang a, Dr.R.K.Lalthlamuana, SMO-in lawmthu sawina hun a hmang bawk a, Bilkhawthlir khawtlang hruaituten an tawiawm a ni.

Pu Lalrinsanga Ralte hian Bilkhawthlir PHC-a Ambulance a hlan zawh hian Bilkhawthlir North leh South, Saiphai leh North Chawnpui VLTF-te tlawhin hri dona kawnga a țul apianga hman atan sumfai, hmaituamna leh Hand Sanitizer a hlan țheuh bawk a ni.

Post a Comment

0 Comments