Mizoram kangmei chhuah chhan chhui turin State Level Special Investigation Team (SIT) din

Aizawl | May 5, 2021: Tunhnaia Mizoram hmun hrang hranga kangmei chhuak chhui chiang tur leh hemi kaihhnawiha dan dinglai awm mek te zirchiang a, a tul anga hmalak dan tur rawtna siam turin Chief Secretary Pu Lalnunmawia Chuaungo, Chairman, State Executive Committee (SEC) ni bawk chuan Section 22(b), (g) and (h) of the Disaster Management Act, 2005 in thuneihna a pek angin State Level Special Investigation Team (SIT) a din.
SIT-ah hian Pu R.S Sinha, Chief Conservator of Forests (Administration) chu Chairman atan ruat a ni a. Member dang te chu Pu C. Lalthanmawia, Director, Fire & Emergency Services, Pu. J. Lalthafamkima Jongte, AIG (Ops), Police Headquarters leh Pu John LT Sanga, Director, Disaster Management & Rehabilitation & Member Secretary te an ni. SIT chuan kangmei chhuah chhan, hemi kaihhnawih a dan hman mek te leh kang meiin thil a tihchhiat chungchang te chipchiar takin an zir chiang dawn a. He notification chhuah ni atanga chhiara thla hnih( 2 months) chhungin rawtna sawrkarah an thehlut dawn a ni.


- DIPR

Post a Comment

0 Comments