Fisheries Department in luia nungchate suat khapna leh mipui hriattirna chhuah

Aizawl | May 5,2021: Tunhnaiah ruah a sur har avang leh ramngaw lo chereu zel avangin kan rama lui tui te a lo kam nasa a. Hetih lai hian mi tam takin luia nungchate dan phal loh in a suasam nasa hle a hriat a ni a. He thil hi sawrkar chuan tha a ti lo hle a. Kan luidunga nungchate an inthlahpun zel theihna tur te leh dan bawhchhetute hrem an nih theihna turin a hnuaia tarlan ang hian Fisheries department chuan thuchhuah leh hriattirna a siam a. Mipuite tawiawmna a ngen bawk a ni.

Tunlai hian khua a thal rei avangin kan ram luitui te a kam nasa ta hle mai a, hemi hun hi remchangah hmangin mi nunrawng, pawisak neilo ten luidung nungcha te dan phal loh (tur, Bomb, Ru, Chinai etc.) hmangin an suasam thin a ni tih hriat a ni a, Hetiang dan phal loh hmanraw hmanga luidung nungchate man a nih hian, a te leh lian pawh thliar loin man telloh thlengin kan suat tihna ni a, an inthlah pun zelna tur ah harsatna nasa tak siamna a ni, hun lo la awm tur atan hian an rem mai a hlauhawm hie a ni. Hetiang a uchuak taka luidung nungcha te suasam a ni thin hi Sawrkar chuan a ngai thutakin pawi a ti hle a ni.

The Mizoram Fisheries (Amendment) Act. 2016 section 6 sub-section (1) tlawh chhanin lui/tui khuah/dil a nungcha te hi phalna nei lo tan chuan eng hmanraw hmang mahin man phal a ni lo a, Department atanga phalna nei tan pawh Tur, Bomb, Chinai, Dynamo, Ru hman khap tlat ani, Dan phal loh hmanga luidung nungcha man tute hi lungin tan leh pawisa chawi tir a hrem theih an ni.
The Mizoram Fisheries Conservation Rewards Scheme, 2019 section 3 sub­section (a) hnuaiah hetiang dan phal loh hmanga luidung nungcha man tu te hrem an nih theihna tura thu neitute hriattir tute chu Department in lawman a pe thei dawn a ni.
Kan ram rohlu luidung nungchate an lo pun zel thei nan duat taka enkawl a, venghim zel turin Mizoram Fisheries Department chuan Zoram mipuite a ngenin a sawm a ni.

- DIPR

Post a Comment

0 Comments