Mizoram-in Oxygen Concentrator 15 leh Oxygen Cylinder 15 Taiwan atangin dawng; Kum 18-44 a thlawnin vaccine pek an ni dawn – health minister

Aizawl | May 7, 2021: Vawiin chawhnu khan Chief Minister Pu Zoramthanga hmalakna a Taiwan sawrkar leh Meihu University, Taiwan in Oxygen Concentrator leh Cylinder 15 ve ve Mizioram sawrkar a rawn pek chu Health Minister Pu R. Lalthangliana’n Mizoram mipuite aiawhin a dawng a, Loh Sabha MP Pu C. Lalrosanga leh Pu JC Ramthanga, Addl. Chief Secretary ten he hun hi an hmanpui a ni.


Health Minister chuan Taiwan sawrkar hnen atanga vawiina kan thil dawn hian Chief Minister Pu Zoramthanga’n Zoram mipuite himna tura ngaihtuahna a sen zau zia a tarlang tih sawiin, Taiwan sawrkar hnena lehkha a ziah bawhzuitu Lok Sabha MP Pu C. Lalrosanga thahnemngaihna fakawm a tih thu a sawi a. COVID-19 dona kawngah bungrua chah thlen state hrang hrangin harsa an tih laia Mizorama a hun taka chah thleng thintu Principal Consultant, Wing Commander J.Lalhmingliana leh a thawhpuite chungah lawmthu a sawi bawk a ni.


Minister chuan Chief Minister Pu Zoramthanga’n Zoram mipuite kan himna a ngai pawimawh em em mai a, kum 18-44 in karte hnenah a thlawna COVID Vaccine pek min phalsak a. Kan chhut dan chuan kum 18-44 inkar vaccine pek ngai hi mi nuai 5 bawr vel kan nei a, dose hnih theuh an lak a ngaih avangin Vaccine hi dose nuai 10 bawr vel lei kan ngai dawn a. Hemi atan hian cheng Rs. 30 crore chuang zet sen a ngai dawn a ni, a ti a. Vaccine lei tur hian a siamchhuaktute hnen atangin order siam fel tawh a nih thu sawiin India ram pumah demand a san avangin a siamtu ten an supply hneh lo deuh a, vaccine kan dawn theih hun tur a la hriat rih loh avangin kan nghah a la ngai deuh dawn a ni, a ti.
Chief Minister Pu Zoramthanga’n Ventilator tha chi 35 zet lei a remtih thu pawh sawiin Health Minister chuan Nikum khan PM Cares hnuaiah Ventilator 100 chuang zet mai kan dawng a, private hospital te pawh kan sem hial a, amaherawhchu COVID-19 hrik hian chuap a khawih chhiat nasat thin avangin oxygen 100% a an kal tir pawhin COVID-19 vei damlote oxygen mamawh a pump zo lo thin a, ventilator tha chi 35 lai kan neih belh tur hian kan thla a timuang sawt a ni, a ti a ni.
Ireland sawrkarin oxygen concentrator 500 India ram a rawn pek thu leh chumi atanga sawrkar laipuiin Mizoram tana 60 a rawn pek chu a rawn thlen tawh thu Minister hian a sawi bawk a ni.
Lok Sabha MP Pu C. Lalrosanga pawhin Chief Minister hmalakna bawhzuia India rama Taiwan Ambassdor kaltlanga Taiwan sawrkar a dawr dante sawiin, Let Taiwan help programme hnuaia Taiwan sawrkarin India ram tana oxygen concentrator an rawn donate na Donation Certificate-ah Mizoram chiah State hming langa pek akn ni, a ti a. Hei lo pawh hi COVID-19 dona hmanrua kan la dawn belh kan beisei a ni, a ti bawk.
Addl. Chief Secretary Pu JC Ramthanga pawhin Chief Minister Pu Zoramthanga’n Taiwan Ambassador kaltlanga hma a lak dan sawiin, Oxygen Concentrator leh Cylinder lo buaipuitu Delhi Mizoram House hotute fakawm a tih thu a sawi a, Oxygen Cylinder te chu Delhi Mizoram House-ah a la awm rih tih sawiin, tangkai taka hman dan tur ngaihtuah a ni, a ti.
Taiwan atanga Oxygen Concentrator rawn thleng hia Pu Jonathan Lalremruata, India-Formosa Foundation Chairman in Health Minister kutah a hlan a ni.

- DIPR

Post a Comment

0 Comments