Aizawl | May 7, 2021: ZPM thalai chuan nimin khan thuchhuah siamin, "Lalduhoma bantu a nih angin MLA atana lakluh thuai hi Speaker mawhphurhna a ni," an ti.
An thuchhuah ZPM Thalai Publicity Department secretary R Malsawmzuala hminga chhuah chuan, "ZPM Legislature Party Leader, Pu Lalduhoma chu MNF MLA te'n Anti Defection Law bawhchhiaa an puhna chungchangah Mizoram Legislative Assembly Speaker, Pu Lalrinliana chuan November ni 27, 2020 khan tih dan phung pangai ang lo takin youtube-ah meuh Zoram mipui en theihin MLA atanga a banna thu a puang a. Kha thutlukna khan Serchhip bial mai bakah Zoram mipui min barakhaih a, kan ram political history-a chuang reng tawh tur atan chuan kan phal lo a nih kha," a ti a.
"Pu Laduhoma MLA atanga bàn a nihna chu Serchhip mipuite rorelna hmaah April ni 17, 2021 khan chhawp chhuah niin, Bye - Election-ah hneh taka thlan tlin leh a ni ta a ni. Pu Lalduhoma'n harsatna tam tak a paltlang hnuah MLA atana lakluh a nih hun tur tiam chin awm lova sawn hlat a ni hi ZPM thalai chuan hriatthiam har kan ti a; Speaker Pu Lalrinliana hian Pu Lalduhoma MLA aṭanga bàn a nihna hi a kutah la ngamin, zaha la lovin puitling taka amah ngeiin MLA atan la lut turin ZPM thalai chuan kan phùt a ni." tiin.
"Pu Lalduhoma lalut tur hian ṭhahnem tak kal a ngai lova, Sawrkâr Office pawh an kal reng lai leh, meeting pawh neih a nih reng tho lai hian, Pu Lalrinliana Sailo hi chhuanlam dang siam lova la lut thuai turin kan phùt tlat a ni." tiin an thuchhuah-ah chuan an tarlang bawk.
Post a Comment
He post chungchanga i ngaihdan lo sawi ve rawh: