Luia nungcha la puitling lo man tawh lo turin hriattir

Aizawl | May 28, 2021: The Mizoram Fisheries (Amendment) Act, 2016 Section-6 Sub-Section (1) Clause (e) (i) tlawhchhanin Fisheries Director chuan vawiin khan thuchhuah siamin luidunga nungcha la puitling lo leh te lutuk (juvenile stage) man chu khap tlat a nih thu leh a man tute pawh lung in tan leh pawisa chawi tira hrem theih a ni tih mipuite a hriattir.

Tun lai hian luia nungchate, a bikin chakai leh chengkawl, a lian leh a te thliar lova eitham mang loh thlenga man thin an awm tih hriat a ni a. Hetianga luidung nungcha la puitling lo leh te lutuk man thin a nih hian, an inthlah pun zelna tur a ti khawlo a, luidung ecosystem a tichhe mek tiin Fisheries Department thuchhuahah hian tarlan a ni a. Khawmual leh tuia cheng rannung te leh mihringte hian inkungkaihna thuk tak kan neih avangin luidung nungchate hi duat taka humhalh an nih loh chuan mihringte pawhin harsatna kan tawk thei a ni tih hre turin mipuite an chah a ni.

Fisheries Director chuan District Fisheries Devolopment Officer tin te chu an bial chhung theuhah ei tham lo khawpa te luidung nungcha zuar an awm a nih chuan a vaia man saka luia chhuah leh turin a hriattir a. Chakai leh chengkawl la puitling lo leh te lutuk te khawrh (man) thin te pawh man tawh lo tur leh mipuite pawhin lo leisak tawh lo turin a ngen bawk a ni.