Covid Task Force on Mobile and Internet Services din

Aizawl | May 28, 2021: Hripui avanga zirlaite leh zirtirtute bakah Sawrkar office te leh sumdawnna hrang hrangin Mobile leh Internet lama harsatna an neihte sukiang turin ICT Minister Pu Robert Romawia Royte chuan theihtawpin hma a la zel a. He hmalakna kalzela peng pawimawh tak pakhat atan ICT department hnuaiah Spl. Secretary Pu Lalramsanga Sailo, IRS kaihruainain Covid Task Force on Mobile and Internet Services din a ni.

He Task Force ah hian Dr. Lalthlamuana, Chief Informatics Officer te; Pu C. Lalhmachhuana, Director, NELSA, Deptt. of Telecom, Govt. of India bakah State Informatics Officer, National Informatics Center-Mizoram te; PowerGrid Corporation of India leh Service Provicers aiawh te an tel a ni.

Task Force hian Service Provider te hmalak dan hrang hrang an thlirho thin anga, Service petute harsatna enpuiin a chinfel pui thin ang.
Mobile leh Internet signal te a that reng theih nan Mobile Tower ten power an neih reng a ngai a, power that lohna laiah Diesel Generator hmanga power pek thin a ni. Hmun thenkhatah heng Diesel thuntu leh Mobile tower siamtha tute tan harsatna siam thin a nih avangin tower te pawh an enkawl that theih loh thu report a awm thin a, chuvangin ICT department chuan kan mobile signal te a lo that zawkna turin heng Tower buaipuitute hi him leh tha taka lo buaipui thin turin Mizorama khaw hrang hrang Local Level Task Force te pawh a ngen nghal a ni.


- DIPR

Post a Comment

0 Comments