Kolasib district chhung atanga hri kai zingah thenawm khaw veng intlawhpawhna atanga kai an tam ber - Kolasib bawrhsap

Aizawl | May 10, 2021: Kolasib district bawrhsap Dr H Lalthlangliana chuan vawiin khan a pisaah inkhuahkhirhna kalpui chhunzawm dan tur chungchangah thuthar thehdarhtute kawmin Kolasib district chhung atanga hri kai zingah thenawm khaw veng intlawhpawhna atanga hri kai an tam ber thu a sawi.

Kolasib DC chuan inkhuahkhirna thupek awmsa chhunzawmna a nih angin mipuite chiai lo tur a a duh thu a sawi a, Kolasib khaw chhung a hri kai te ngun tak a zirchian an nih hnuah a tam ber chu thenawm khawveng inlen pawh nasat vang a a lan thu a sawi a,” Mahni veng theuh ah thenawm khaw veng intlawh pawh lo tur a kan inkhap theih chuan hri dona tur a kan hmalakna hi a sawt phah hle ang,” a ti.

Mipui tul lova veivak khuahkhirh nan Kolasib khaw chhung hmun sawm ah sawrkar hnathawkte duty tur a dah an nih thu leh a tul dan a zirin hremna pawh pe thei tur a ruahman vek a nih thu DC chuan sawiin Sawrkar hnathawkte chu hlawh nei a sawrkar chhawr an nih angin hri dona kawngah pawh sawrkarin a ruatna apiangah hna thawk tur an nih thu a sawi lang bawk a ni. Kolasib khaw chhunga Covid-19 Executive duty tur a sawrkar hnathawk ruat an nih ang chiah hian Kawnpui, Bilkhawthlir, Bairabi leh Vairengteahte pawh ruahman a ni.

Medical leh Police department hnuai a Contact tracing team-te chu a hrang a kal tawh lovin hmun khat a chhunfin an nih tawh tur thu Dr.H.Lalthlangliana chuan a sawi a, hei hian hnuchhui hna kalpuina kawngah a puih ngei a beisei thu a sawi.

Vawiin thleng hian Covid-19 positive te chu sawrkar Covid Care Centre a enkawl vek an la nih thu DC chuan sawiin Kolasib district khaw dangah pawh a tul dan a zirin CCC hi ruahman a nih tur thu a sawi.

Hmar Veng Presbyterian Kohhran chuan hrileng dona kawnga a tul apiang a hman turin vawiin chawhma khan DC hnenah cheng singnga an hlan a ni.

- DIPR