COVID-19 Vaccine chungchanga Health department thuchhuah

Aizawl | May 10, 2021: COVID-19 vaccine hi India ram pumah January ni 16, 2021-a pek tan a nih rual khan Mizoram-ah pawh tan ve nghal a ni a. Tun dinhmunah hian Central sawrkar ruahman dan angin Healthcare Workers, Frontline Workers bakah kum 45 leh a chunglam-te hnenah vaccine hi ngawrh taka pek mek zel a ni.

Central sawrkar chuan COVID -19 vaccine pek chungchanga thuneihna sang ber neitu ‘National Expert Group on Administration of Covid-19 vaccine’ (NEGVAC) chu a din a. He NEGVAC hian COVID -19 vaccine pek dan tur leh pek hmasak turte relin, a hnuaia Priority Group-te (ngaih pawimawh/pek hmasak tur) a rawn ruahmante hi tunah hian COVID-19 vaccine pek mek an ni:

1. Healthcare Workers (damlo enkawltute)

2. Frontline Workers – Hei hi chiang takin NEGVAC chuan hetiang hian a rawn bithliah a:

a. Ministry of Defence – Army, Navy, Air Force, Coast Guards

b. Ministry of Home Affairs – Assam Riffles, BSF, CISF, CRPF, ITBP, NSG, SSB, Home Guard, Disaster Management Volunteers, Prison Staff

c. Ministry of Housing & Urban Affairs – Municipal Workers

d. State Govt. – State Police, Revenue Officials engaged in COVID -19 containment, Surveillance and associated activities

3. Citizen – Kum 45 leh a chunglamte.

Heng NEGVAC in Frontline workers-a a telh te hi State sawrkarin a lo belh emaw a lo tidanglam thiang lova. Heng Healthcare worker, Frontline worker, kum 45 chunglam sorkarin pek tur a tihte chauh vaccine pek theih an nih avangin pawl leh mimal vaccine pek tura diltute chu kum 45 an la tlin loh chuan pek theih an ni lo. Hemi chungchangah hian central sorkar chu a strict hle a, Frontline worker leh Healthcare worker te phei chu vaccinate (chiu) an nih hmain certificate mumal tak an neih vek a ngai a, hei hi CoWin portal-ah an ID (Aadhar card/Voter ID etc) te nen thunluh vek a ngai a ni. Sawrkar laipui hian tun dinhmunah hian State sawrkar-a vaccine a pek tawh sa zawng zawng za-a sawmsarih (70%) hi 2nd dose a hman turin thu a pe tawh a, hei hi zawm a nih loh chuan vaccine dawn leh tur hi tihtlem turin thu a chhuah bawk. Hemi thuchhuah ang hi chuan Healthcare worker leh Frontline worker la in register lo 1st dose hi pek theih a ni tawh rih lo.

Tunah hian kum 18-44 inkar hi Central Sawrkar chuan pek theih tur zingah a rawn belh a, amaherawhchu kum 18-44 inkarte vaccine pe tur hian State sawrkar chuan vaccine hi a lei a ngai tawh a, Central Sawrkar Free Supply (a thlawn a min rawn pek) hi kum 18-44 te tan hman theih a ni lo. Mizoram Sawrkar chuan chak taka hma lain, kum 18-44 inkarte pek tur vaccine hi COVID-19 vaccine kan lak mek “COVISHIELD” siamchhuaktu Serum Institute Pvt. Ltd. ah chah mek a ni. Reilote-ah vaccine hi Mizoramah kan pek theih beisei a ni. Chumi chhung chu kum 18-44 inkarte’n vaccine pek theih hun hi lo nghak hram hram turin kan inngen a ni.

Kum 18-44 inkarte vaccine hi a lo thlen hunah, Mipui vantlang mamawh thil khawihtute, henga hnuaia tarlante hi pek hmasak tur an ni ang.

1. LPG phurtute leh mipui hnena semtute

2. Petrol pump-a hnathawk te

3. Bawnghnute sem

4. Print & Electronic media-a thawkte leh chanchinbu semtute

5. PHE department-a tui semtute

6. Power supply enkawltute

7. Damdawi dawr nghaktute

8. Bank-a thawkte

9. Airport-a thawktute

10. Public Transport-a driver leh conductor

11. Post Office-a thawkte

12. Govt. Fair Price shop/ration semtute

13. Mipui tana hna tangkai thawk, Covid-19 an lo kai palha mi tam tak hnena kai darh thei te.

- DIPR