Hnam ropuite u, tho r'u le XIII

 Lalhruaitluanga Chawngte


A rei ta - kan hnamin chhiat nasa tak mai nasa takin kan tawk a, a hnam pum maiin kan buai a ni ber. 1861 kha a ni awm e.

Mau a tam a, mau a tam chuan țam a tla țhin. Chumi țum pawh chuan mautam țam kan tuar ta a, țam a tlak bakah hri a leng bawk.


Pic: #John_Chhana

Țam a tla a, eitur a awm lo. Chhuanchham an awm a ni mai lo, a hnam pum maiin chhuan kan chham a ni ber, chumi kum chuan. Chhuanchham leh tlachham kha an ni vek mai a, inpui tur chuang an awm lo; tute khua mahin chaw ei tur an neih bik loh avangin pur phurh tur a awm lo.

Chumi țuma țam tla chu a na khawp a, vawk pawh pal nghengin an ding peih țawk a, an rilțam lutuk hi an țhen tlawk tlawk mai a ni an ti.

Chhuanchham, mei alh enin an awm a, mahse țhu tlawk tlawk ringawt lovin eitur remchang a remchan dan ang angin an dap a, changel bul te an khel ringawt mai a ni awm e. Bahra an lai a, a țhenin tum an khel bawk. Hnahnemte chaw-ah an ring hial.

An ei a chhiat em avang chuan an hrisel lo a, an thil eite chu an ngeih lo bawk. An cher em em a, chutah hri a leng leh ta nghal! An thi nasa hle tih chu an sawi dan a ni.

Chumi țuma țam tla chu, Tualte vanglai meuh pawh an darh chhan, Tualte vanglai hial pawh tidarhtu a ni.

Chutiang hun chu kan pi leh pute'n an lo paltlang tawh a, chutiang paltlang tawhte thlahte chu kan ni - harsatna harsa, hautak leh hahthlak tak pawh harsa taka paltlang theite thlah kan ni.

Khami țum chauh kha a ni lo; vawiina kan nih tur ang kan nih theih nan leh vawiina kan awmnate hi kan ram a nih theih nan kan pi leh pute khan harsatna nasa tak tak an hmachhawn țhin a, hmelma chi hrang hrang an lo tudawl tawh țhin. 

Nuamtawl leh nuamchen chunga he hnam hi lo piang a ni lo a, țam, hrileng leh chhiatna hrang hrang paltlanga he hnam hi lo ding a ni. Kan pi leh pute'n mittui leh thlan tui senga an hrin kan ni. Thisen hial sengin kan ram hi an sat a, he ram leh hnam a lo din theih nan hian thi leh thau pawlhin an țang țhin. Chutiang mite thlah chu kan ni e - hnam ropuite u - khua a la var ang.

"Wake, awake, O mighty nation,

Ere the foe on Zion tread;

He draws nigh, and would defy

All the hosts of God most high."


Post a Comment

0 Comments