Health minister hovin Hri len dan, inkaidarh dan leh thil pawimawh dang zirbing tura ruat State Research Unit on COVID-19 thukhawm

Aizawl, 25th May, 2021: Vawiin chawhnu khan Health Minister Dr. R. Lalthangliana hovin SAD Conference Hall-ah State Research Unit on COVID-19 an thukhawm a, Chief Secretary Pu Lalnunmawia Chuaungo pawhin a telpui a ni. State Research Unit on COVID-19 hi tunhnaia sawrkarin Mizorama COVID-19 dinhmun kil tin atanga chik zawka scientific evidence nena zirchiang tura a ruat a ni.


Health Minister Dr. R. Lalthangliana chuan State Research Unit on COVID-19 chu Mizorama COVID-19 hri len dan leh kan inkaidarh dan bakah thil pawimawh dang zawng zawng zir bing tura tih an ni, a ti a. Data felfai tak lakhawma kan dinhmun diktak zir a nih chuan hri kan inkaidarh dan chiang leh felfai zawkin a hriat theih ang a, third wave lo thleng tur an sawi atan pawh hian sawrkar leh mipuite pawhin a lo inven lawk dan turte pawh kan hriatchian phah thei dawn a, hei bakah hian thil chi hrangb hrang zirchian ngai a awm bawk a, COVID-19 positive enkawl damte leh nunna chante pawh an medical history zirchian a nih chuan fimkhur dan tur leh inenkawl dan turte pawh kan thiam lehzual phah thei ang a, kan tangkaipui hle ina rinawm a ni, a ti a. Khawvel hmun danga hri leng chanchin kan hriat rualin keimahni tualzawla kan dinhmun zirchian hian thil danglam bik emaw, hmun dang nen kan in anlohnate a awm anih phei chuan a pawimawh lehzual dawna ni, a ti.
Chief Secretary Pu Lalnunmawia Chuaungo pawhin first wave ah kha chuan hri kai kan pun chak viau hian kar khatte kan in lockdown a, a hnuah case hmuhchhuah a tlahniam thin a, kan pun leh deuh chuan kan in lockdown leh thin a, hri inkaichhawnna (transmission chain) rngrmawchen kan chhut chah bakah hri inkaidarh chak tur kan pawt muang thin a, hei hian community spread nasa tur pawh a veng thin niin kan hria a, tun tuma kan boruak erawh thla khat chuan kan inkharkhip chung pawhin tlakhniam lam kan pan thei lo reng reng mai a, ngaihdan leh rinthu tam tak a awm thei ang a,mahse hengte bakah thil dang chhan tha tak tak pawh a awm theih avang hian data nen scientific evidence hmanga kan zirchian hian kan dinhmun diktak a hriat theih a rinawm a, hei hian hma lak zelna turah pawh nasa takin min pui thei dawn a ni, a ti.
Vawiin meetingah hian zirbingna tur peng hrang hrang sawiho a ni a, chung zingah chuan second wave ah hian COVID-19 variant thar a awm tawh em ? tihte, he hripui leng tharin mipuite kawng hrang hranga a nghawng dante, mipuiin an dawnsawn dante, sik leh sa thlenga a nghawng dante bakah Positive hmuhchhuahte case study neih a he hrik hnathawh dan zirchiante, hri kai hmuhchhuah hma (early detection) dan turte, ranvulhte hi hri pu darhtu (carrier) an ni thei em ? tihte a tel a ni.
Meetingah hian data lakkhawm dan turte leh thil pawimawh chi hrang hrang sawiho bawk a ni a, an zirchiannate a rang lama report pe zel turin an in chah a ni.
Vawiin meetinga Integrated Disease Surveillance Programme (IDSP), H&FW department report danin May ni 1 – 24, 2021 chhungin Mizoramah COVID-19 positive 4490 hmuhchhuah an ni a. An zinga 2131 hi symptom nei niin, 2359 in symptom an nei lova. Positive hmuhchhuah zingah hian naupang kum 1 hnuailam 36 (mipa 18, hmeichhia 18), kum 1 – 10 mi 500 (mipa 257, hmeichhia 243), kum 11 – 20 mi 729 (mipa 342, hmeichhia 387), kum 21 – 30 mi 1093 (mipa 550, hmeichhia 542), kum 11 – 20 mi 729 (mipa 342, hmeichhia 387), kum 31 – 40 mi 891 (mipa 484, hmeichhia 407), kum 41 – 50 mi 591 (mipa 352, hmeichhia 239), kum 51 – 60 mi 372 (mipa 194, hmeichhia 178), kum 61 – 70 mi 165 (mipa 78, hmeichhia 87), kum 71 – 80 mi 87 (mipa 40, hmeichhia 47), kum 80 chunglam mi 27 (mipa 13, hmeichhia 14) awmin mipa hi 2328 an ni a, hmeichhia hi 2162 an ni.
State Research Unit on COVID-19 ah hian Pu R. Lalramnghaka, Special Secretary, H&FW chu Chairman niin, Dr Pachuau Lalmalsawma, State Nodal Officer on COVID-19 chu Member-Secretary a ni a. Member-ah hian Mizoram University, Pachhunga University College, College of Veterinary Science & Animal Husbandry, Selesih, Zoram Medical College leh Integrated Disease Surveillance Programme (IDSP), H&FW department-a mithiamte ruat an ni.

- DIPR

Post a Comment

0 Comments