Health Minister-in Zemabawk Cancer Hospital-a Cancer hemna khawl bun mek tlawh

Aizawl, 24th May, 2021: Vawiin chawhnu khan Health & Family Welfare Department Minister Dr. R. Lalthangliana chuan Mizoram State Cancer Institute, Zemabawk-a cancer hemna khawl bun mekte a tlawh.


 Minister hian Cancer Hospital bula Tertiary Care Cancer Centre (cancer hemna khawlpui) tlawh hmasain hmalak dan a enfiah a, Tertiary Care Cancer Centre ah hian cancer hemna khawl lian LINAC (Model TrueBeam svc with FFF)  cheng vaibelchhe 17 man, Varian Medical Systems, USA kutchhuak leh khawl dang pakhat Brachy Therapy Machine bun a ni a. Khawl lian hi LINAC khawl ang chi ah chuan 2016 model a ni a, a chhuak thar ber (latest model) a ni. He khawl hian X-ray energy 5 leh electron energy 6 a nei a, cancer khawl hmasa in a hem theih loh, dam lo tam tak phai lama referred thin ang kha a treat theih tawh dawn tih he khawl buaipuitu daktawr te chuan an sawi a ni. Heng khawlte hi April thla khan bun fel vek tawh niin, kV imaging QA ni khat hna Radiological Precision Labs (India) Pvt. Ltd. Mumbai in an rawn tih zawh veleh hman phal dilna (license process) kalpui nghal tur ani a, anni hi COVID-19 hri leng vanga an rawn kal theih rih loh avangin tum aiin an muang ta deuh tih daktawrte hian an sawi a ni.
Dr. Thangtea chuan Cancer Hospital-a cancer hemna khawl dang Cobalt-60 dahna tur hmun pawh a tlawh nghal a, khawl bunna tur hmun hi peihfel vek tawh niin, a rawn bun turin khawl siamtu company engineer te COVID-19 hri leng vanga an rawn kal theih loh avangin hma lak belh theih a nih rih loh thu an lo sawi a, Cobalt-60 khawl hlui chu kum 20 chuanga upa a nih thu leh a hman theih tawh loh avanga cancer hem ngaite pawh an hem theih rih loh thu an sawi a ni. Khawl thar hi Cobalt-60 zingah chuan a chhuak thar ber (latest version) a ni a, cheng vaibelchhe 11 man a ni.
Dr. Thangtea chuan heng cancer hemna khawl rawn endik tur leh rawn bun turte hi a rang thei ang bera an rawn kal a tul tih sawiin, ZMC oxygen generating plant din tura company mithiamte a koh luh tawh thu a sawi a, heng company hotute chu rang taka rawn in tir turin aman a lo nawr chhunzawm tur thu a sawi a ni.
Health Minister hian Health Minister hian Recreation Counselling Centre, Zemabawk-a cancer vei damlote chawhmeh man atan Rs. 10,000/- a hlan nghal a ni.
Health Minister hian Zemabawk-a Central Medical Store tlawh nghalin, hripui leng dona atana damdawi leh hmanraw hrang hrang dinhmun a enfiah nghal a, hmanraw chi hrang hrang dawn zingah oxygen concentrator 670 awmin hengte hi Ireland, Switzerland, China, Qatar, Vietnam, Taiwan, WHO leh MoHFW atanga dawn an ni a. Oxygen cylinder pawh ram hrang hrang atanga dawn thahnem tak awm tawhin Turkey leh Egypt atanga dawnte chu a danglam deuh oxygen thun khat (refill) turin Mizorama oxygen plant khawl mila siam that a ngai dawn a ni.
Health Minister chuan tun dinhmunah COVID-19 dona atana kan hmanraw mamawh ang te chu a tam zawk hi kan phang rih lova, kan mamawh zual pawimawhte pawh neih belh turin theihtawpin hma kan la a ni, a ti a. COVID-19 hripui dona kawngah sawrkar chuan theihtawpin tan a la tih sawiin, Zoram Medical College-ah first wave lai khan khum 150 kan dah a, second wave a rawn thawk dawn tih mithiamten an sawi avangin theihtawpin kan inbuatsaih a, Medical Operational Team ten an Vice-Chairman Dr. ZR Thiamsanga hovin ZMC hotute nen ruahmanna an lo siam lawk thlap hi a lawmawm takzet a ni, a ti a. Second wave atan hian ZMC chu khum 246 awm thei turin an buatsaih a, tunah hian khum 66 awm theihna Ward thar buatsaih lehin, hman theih a nih veleh khum 312 kan nei thei dawn a, he ward tharah hian damlote hman turin khum zawng zawng hi oxygen pipe hmanga thlun zawm vek an ni, a ti a. ICU pawh khum 13 an ruahman belh a, tunah hian ICU 34 kan nei tawh nghe nghe a ni, a ti.

- DIPR

Post a Comment

0 Comments