Aizawl | May 24, 2021: Deputy Chief Minister, Tuichang Assembly Constituency bialtu MLA ni bawk Pu Tawnluia hmalaknain District Hospital, Khawzawl-a thawktu indaih lohna phuhruk nana Lab Technician pathum rawihte chuan vawiin atangin hna an thawk tan.
Kar hmasa Zirtawpni khan Khawzawl District Covid-19 Medical team zinga mi pahnihte chu Covid-19 positive an ni tih hmuhchhuah a ni a. Damdawiin-a thawk mi engemawzat chu Primary/Secondary contact zingah telin khunghran mek an nih avangin bialtu MLA chuan hma la nghalin, Khawzawl District Bawrhsap Pu Zothanmawia hovin Hospital-a staff dinhmun leh thawktu mamawh belh dante zirchian a ni a. Covid-19 hrileng mek karah RAgT hmanga test kalpui chu thil pawimawh hmasa-a ngaih niin, hemi atan hian Deputy CM chuan ama sum sengin Lab Technician Pi Margaret B. Lalmuanawmi d/o B. Laltlanmawia, Khawzawl Kawnzar chu a ruai nghal a ni.
Hemi bakah hian Covid-19 Team, Champhai District atangin Lab Technician pakhat hawh lailawk a ni a. Heng bakah hian Champhai CMO office kaltlangin Pi F.Lalchawithangi, Khawzawl Hermon chu rawih a ni bawk. Heng Lab Technician pathumte hi inkhunghran vanga Khawzawl District-a thawktute indaih loh chhung chu an thawk dawn a ni.
Covid-19 hrilenga frontline worker-te harsatna tawh hrethiama, mamawh phuhru tura chak taka hmalatu Deputy Chief Minister chungah District Hospital, Khawzawla thawktute leh bial mipuite an lawm hle a ni.
- DIPR
Post a Comment
He post chungchanga i ngaihdan lo sawi ve rawh: