Aizawl | May 25, 2021: South Tuipui bialtu MLA leh Health Minister ni bawk Dr.R.Lalthangliana chuan vawiin khan a bial chhung khaw hrang hrangah VLTF te kaltlangin nitin mamawh Dal, Alu leh Tel thahnem tak a semchhuak.
Covid-19 hrileng avanga hun engemaw chen hnathawh that hleih theih lova Inkhuahkhirh leh Total Lockdown kalpui a nih avang South Tuipui bialtu MLA Dr.R.Lalthangliana chuan a bial chhungah chhuanchham an awm loh nan tanpuina hi vawiin khan Hnahthial-ah thawn pheiin bialchhung khaw hrang hrang VLTF 17 leh Hnahthial khawpui chhung VLTF 5 bakah Police duty-te tan Dal bag 50, Alu bag 50 leh Tel case 33 pekchhuah nghal a ni.
Muallianpui VLTF, S Vanlaiphai VLTF, Darzo VLTF, New Kawnpui, Lungpuitlang, Lungleng VLTF, Tuipui D VLTF, Thingsai VLTF, Bualpui H VLTF, Cherhlun VLTF, Ngharchhip VLTF, New Ngharchhip VLTF, Chawngtui S VLTF, Tarpho VLTF, Khawhri VLTF, Aithur VLTF, Denlung VLTF, Hnahthial Task Force -VLTF 5 leh Police duty te pek an ni.
Dr. R Lalthangliana chuan "Covid-19 hrileng avangin ramin hun harsa leh khirhkhan kan tawh mekah hian ka bialchhungah eitur neilo an awm palh ang tih ka hlau hle a, chutiang an awm loh nan Task Force min rawn hrilh hriat zel ka beiseiin ka ngen a ni" a ti. Tun tuma tanpuina a semchhuah hi Rs.Nuai 2 leh Sing 5 chung hu vel niin hemi hma pawh hian a bial chhung VLTF leh Damdawi In zawng zawngah tanpuina pawisa fai leh Covid-19 dona atana hmanraw pawimawh tak tak alo pe tawh bawk a ni.
- DIPR
Post a Comment
He post chungchanga i ngaihdan lo sawi ve rawh: