Aizawl the 25th May, 2021: Vawiin khan School Education Minister Pu Lalchhandama Ralte hovin Planning Department Conference Hall, Treasury Square-ah hripui len chhunga zirna kalpui zel dan tur chungchang sawiho a ni.
Meeting kaihruaitu Minister Pu Lalchhandama Ralte chuan hripui leng karah zirna kalpui zel a ngai a, thawhhona tha tak nei zel turin zirna lama thawktute a sawm a, mahni thiam dan dana online-a zirtirna kalpui theih chuan thlen chin a inang lo zung ang tih te pawh a hlauhawm a, chuvangin khairual taka kalpui theih dan zawn a tul a ni a ti. Zirlaibu pawh semchhuah dan kawng ruahman a ni dawn a, zirlaiten zirlaibu an hmuh thuai theih nan tanlak a ni dawn a ni a ti. Mizoramah zirna tha a awm theih nan ruahmanna siam chhoh zel a tul a, tuna kalphungah chuan private boarding school tha tak, ramdang nena khaikhin pawha zahpuiawm loh miin din duh se, kawng a awm meuh lova, miin service an pek theih dana zira fees an lak theih dan tur pawh hi siam a ngai nia a hriat thu a sawi.
Vawiin Meeting-ah hian ram pum huapa khairual taka online class kalpui theih dan tur sawiho a ni a, school hrang hrangten online class an kalpui dan a inchen lova, chuvangin khairual taka zirna kalpui a nih theih nan kaihhruaina siam tur Committee din nise, tih rel a ni a. HRD Board Vice Chairman Pu L.Thangmawia chu he Committee-ah hian chairman a ni dawn a, June 2021 chhungin kaihhruaina hi an siam dawn a ni.
Meeting-ah hian School kal theih loh chhunga private school-ten fees an lak dan chungchang sawiho a ni bawk a, tun dinhmunah school thenkhat chuan harsatna an tawk nasa hle tih Mizoram Independent School Association hruaitute chuan an sawi. Hemi chungchang hi uluk taka sawiho a nih hnuah school fees an lak mek atanga zaa 70 aia sang lak loh nise, a hniam thei anga fees hi kalpui turin meeting chuan school neitute pawh a ngen nghal a ni.
Pu L.Thangmawia, MLA, HRD Board Vice Chairman chuan nikum lama online class neih dan chu research neia an zirchian thu a sawi a. Online class chu zirlaite tan khairual taka neih theih ni rih lo mahse, zirtirna pek dan kawng awm chhun a nih rih avangin mumal zawka neih dan ruahman a ngai nia a hriat thu a sawi a. Online class-ah zirtirtu leh zirlaite pawhin training an neih a ngai hle nia a hriat thu a sawi bawk.
School Education Special Secretary Dr Lalzirmawia Chhangte chuan Ministry of Education Department of School Education & Literacy buatsaihin India ram Board hrang hrang leh Central Senior Minister-te nen May 23, 2021 (Pathianni) khan online meeting neih a nih thu leh CBSE, ICSE leh State Board zawng zawng deuh thawten Board Exam an la buatsaih theih loh laiin Mizoram chuan harsatna awm lovin tluang takin buatsaih theih a nih thu leh result pawh chhuak thei tep a ni tih a sawi a. India ram hmundanga zirlai hrileng 2nd wave avanga Mizorama lo hawte tan Exam Centre thlak theihna kawng hawng tura ngenna Ministry-a an thlen thu a sawi bawk.
MBSE Chairman Pu JH Zoremthanga chuan India ram hmun dangte hrileng avanga an buai viau laiin HSLC leh HSSLC Examination chu ruahman lawk angin an kalpui thei a, result pawh a hun takah tihchhuah theih an tum tih a sawi a. HSLC chu June 3, 2021 (Thursday)-ah tihchhuah tum a ni a ti a. HSSLC result chu June chawlhkar thumnaah tihchhuah tum a ni a ti bawk. Result hi MBSE-ah tarchhuak lovin MBSE website-ah en nghal theih a ni dawn a, MBSE office kawt leh a velah Result bu lei theih a ni dawn a. Exam Centre Superintendent leh DEO tinte hnenah an huamchhunga an lo thehdarh theih turin pdf-a pek chhuah a ni dawn bawk a, phone-a zawh theihna siam tum a ni tih a sawi bawk.
He sawihona School Education Minister Pu Lalchhandama Ralte kaihhruaia neihah hian HRD Board Vice Chairman Pu L.Thangmawia, Special Secretary Dr Lalzirmawia Chhangte, MBSE Chairman Pu JH Zoremthanga, Director School Education Pu James Lalrinchhana, Director SCERT Pi Laldawngliani Chawngthu leh officer dangte an tel a. Mizoram Teachers Federation, MZP, MSU, Mizoram Independent School Association hruaitute an tel bawk a ni.
Post a Comment
He post chungchanga i ngaihdan lo sawi ve rawh: