MSU ngenna vangin dan pela MRB thawktute ban!

Aizawl | April 3, 2021: Mizo Students’ Union (MSU) General Headquarters, Aizâwl chuan Mizoram Rural Bank hnuaia Office Assistant paruk chhawr mêkte chu Service Regulation, 2010 leh Appointment Rule, 2017-in a phût ang thiamna thla 18 chhûnga an neih theih loh avângin March ni 24, 2021 khân Press Conference neiin an Service tihtâwp a nih theih nân Mizoram Rural Bank Management chu March thla chhûng hun a lo pe tawh a. MRB Management lamin March ni 29, 2021-a hêng mi paruk Chandan Choudhury, Kâwlkulh; Shailesh Kumar Singh, Champhai; Rishabh Raj, Marpara; Amibatha Nath, Kânhmun; AmitKumar, Ngopa leh Sumit Kumar, Sangau hmuna thawk mêkte Service Termination order a siam fel ta chu MSU chuan lâwmawm a ti a, Mizo mipui leh zirlaite thlâwpnaah MSU chuan lâwm thu a sawi nghâl bawk a ni. Tûn hnuah hetiang buaina a thlen tawh loh nân a hun takah Local Language Proficiency Test hi buatsaih zêl tawh tûrin MSU chuan MRB management a ngên nawn nghâl a ni.

MSU chuan, MRB-a thawk tûr hian thliar bîk a nei lo va, RRB leh MRB Rules zâwm thlap mi thiam leh tling apiang Mizoram tâna thawk tûrin a duh a. 'Ram leh hnam humhalh nân Zirna Uar’ tih thupui hmanga zirlaite MSU-in a fuih ṭhin angin Mizo Zirlaite chu MRB-a thawk tlâk ni ngei tûra inzir thar leh tûrin MSU chuan a chah nawn a. Hetiang lama tui, zirna kawnga harsatna neite tân MSU chuan theih tâwpa ṭanpui a inhuam a, zirlaite chu inthlahrung lova MSU pan tûrin a chah nghâl a ni. IBPS-in exam an buatsaih leh huna Mizo ṭhalai a tam thei ang ber MRB-a thawk tûra an luh ngei theih nân MSU chuan theih tâwp a chhuah dâwn a, Mizo ṭhalai leh zirlaite rawn pên chhuak tûrin a sâwm bawk a ni.