Aizawl | April 3, 2021: Zoram Thar Zofate Lairelna hruaitute chuan Serchhip Press Club ah chanchinbu mkite kawmin Serchhip by election chuh an tum loh thu an sawi.
He Inkawmna ah hian Rev Dr Zaichhawna Hlawndo chuan press mite zawhna chhangin Serchhip MLA by-election neih turah a dinna bial a inthlan lo awm tur atan Zoram Thar Zofate Lairelna Inpui chuan ngun taka Lalpa Pathian rawnin, a chhanna chiang taka an dawn tlan chu he by-election a din loh hi a ni a ti.
A sawi zelna ah chuan Zoram Thar Zofate Lairelna te chuan kan rama Party Sorkar nilo, Pathian Lal ram sorkar lo ding tur atan Chhiahlawh hna kan thawk zel dawn a. Hnungtawlh leh tawhlo turin Lal ber Lal Isua Krista thupek angin a Lal ram sorkar ding tur atan a hnung kan zui zel dawn a ni a ti bawk.
Kumin kum tawp November 10-12, 2021 a Zofate Haw Runpui Hnam Inkhawmpui Thianghlim, Thenzawl a neih tur Hnam Hnatlang ah Biakinpui hmun kawtzawl laiin Serchhip JCB neitute Pu R. Lalramliana leh Pu PC Lalhmachhuana te pawhin engmah phut neilovin an hnatlang avanga an lawmthu chanchinbu mite an hrilh bawk.
Zofate Haw Runpui ah hian Inkhawmpui Thupui: Krista tana Hnam Inpumkhatna tih a ni dawn a, Rev. Dr. Hre Mang (USA), Upa Zairemmawia Chhakchhuak leh Rev. Dr. Zaichhawna Hlawndo ten thu an sawi ang. Khuallian atan ram hruaitute bakah ram dang (foreign) lam atangin sawm an ni. Zaikhawmpui leh Zo Hnam zai leh lam hrang hrang te pawh neih tur a ni ang. Zaithiam lar Lalrindiki Khiangte (UK), Tv. Vanlalsailova leh Nl. Lalparzo Sanate (Manipur) te bakah zaithiam dang engemaw zah sawm an ni. YMA, MZP leh MSU lam pawhin an phurpui hle a, hnam lam leh zai tur te pawhin an in puahchah. Kohhran hrang hrang Zaipawl te pawh an zai dawn tih an sawi.
Post a Comment
He post chungchanga i ngaihdan lo sawi ve rawh: