Congress thalaiin Vairengte-ah khauh lehzuala test kalpui turin Kolasib DC ngen

Aizawl | April 28, 2021: Serlui Constituency Congress Thalai chuan vawiin khan Kolasib district Deputy commissioner (DC) hnenah, Vairengte screening point-ah Rapid Antigen test khauh lehzuala kalpui turin an ngen.

6th Serlui Constituency Youth Block Congress committee secretary H Lalhmingsanga hminga Kolasib DC hnena lehkha an thehluh ah chuan, "Covid- 19 hrileng thawhhnihna lo darh thar lehah, kan Zoram dung leh vang chu he hripui hian min chimin min tuam leh mek a; Zoram mipuite himna leh hriselna ngaihtuah chungin Zoram luhka leh kawtchhuah kan nih anga Mizorama lo lut turte reng reng he hripui lakah hian an him leh him loh Screening Point,Vairengte- ah hian RAgT test tun aia khauh leh zuala kalpui turin Mizoram sawrkar kan ngen a ni." tiin an tarlang.



An tarlan danin, April 16-a Health minister Dr R Lalthangliana’n Vairengte a lo tlawh tuma a sawi angin, 'Vairengte Screening Point paltlang tawh phawt, Mizoram chhunga lo lut tur reng reng RAgT test ti vek tura' a tih chu vawiin thleng hian a hlawhtlinna hmuh tur a la awm lo hi 6th Serlui Youth Block Congress Committe chuan mak kan tiin pawi kan ti hle a ni" an ti a.  "Hming thatna tur chauha sawi loa a tak ngeia Mizoram mipuite himna tur leh hmakhua ngaitu sawrkar chak tak kan mamawh hle niin a lang." an ti bawk.

Mizoram lo lut turte Screening Point- a Test an paltlang theih ngeina tur leh a hlawhtlin ngei theihna turin Screening point- a Police Force duty tir turin Mizoram Sawrkar an ngen a. Tin, Screening Point-a Test kalpui a nih danah hian mipui lam atanga duh khawp lohna awm te hi chhui chianga felfai zawk leh dik zawka Test kalpui a nih theihna tura hma la turin sawrkar an phut bawk a ni.

Serlui bial Congress Party Thalai chuan, "April 26, 2021 (Thawhtanni) zana West Bengal inthlana Mizoram IRP Duty kal lo haw te, test an nih hnuin mi tam takin Covid- 19 an kai a ni tih hriat a ni a, an paltlang khuaa cheng te hei hian a tiralkhel hle hi pawi kan ti a; an lo haw danah an paltlang khua te tana himna tura ruahmanna tha zawk an siam lo niin a lang a, pawi kan ti hle a ni. Tun hnuah chuan Mizoram mipui, an paltlang khua te tana himna tur tha zawka kawng ruahman tawh turin Mizoram sawrkar hi kan phut a ni." an ti bawk.

Post a Comment

0 Comments