Mizo film star Isaak Chhakchhuak

Mizo film star thalaite duh rawn Isaak Chhakchhuak kan belchiang.


Isaak emaw Saka emaw tia koh thin Isaak Chhakchhuak hi a lai-ah hming chu Isaak Rosangliana niin, C Saihmingliana leh HC Pari inkarah January 25, 1993 khan a piang a. An unau hi unau pali niin, mipa pahnih leh hmeichhia pahnih an ni a, a upa lam atanga chhiara pathumna a ni a, nau hmeichhia a nei a. Salem Veng, Lunglei-ah chengin an khawsa-a Baptist Church of Mizoram a lawi an ni.





Zirna lam: Master of Social Work (MSW) hi Mizoram University atang kum 2016 khan ka zo.

Hobby : A tam sia haha...Drums play te, football khelh te, exercise te leh music ngaihthlak te hi nuam ka tih leh ka tih tam ber techu anni mai.



Duhzawng leh ngainat zawng hrang hrangte:--
Lehkhabu duh: Zoram Mamawh Chhanna (Ziaktu:Lalnunmawia Sailo)
Actor/Actress: Actor ah chuan Morgan Freeman hi a pui ka ti a, a acting a chhe ngai lo eng role pawh chang se. Actress ah chuan Nicole Kidman hi ka duh ber ang, a chuai thei mawlh lo.
Zaithiam : Axl Rose (Guns & Roses) A aw hi a sial thlawt.
Chawhmeh: Vawksa ngat le hahaha
Hla : Dream Theater hla Through her eyes
Ziaktu : KL. Liana
Mizia : Fiamthu duh leh uang ve peih tak. Nuih duh ve tak ka ni.

Mize ngainat loh zawng: Mi chapo leh rilru te

Kawppui tura duhzawng: Pathian tih mi leh mahni in thunun thei, kawm nuam leh mi te lawmna siam thiam tak ni se.

Aim in Life: Entrepreneur hlawhtling tak (Pathianin rem a tih chuan)

Film I chan tan dan: TKP Salem Unit ina kan planning a kan neih Damna Kim kha ka bultanna chu a ni.

Film I chan tawh te?
- 1)Damna Kim (2017)
2) Norah (2019)
3) Pindan Chhungril (Short film) (2020)
4) Beyond (Short film) (2020)
5) Dengi I Love You (La release loh)

Damna Kim-ah khan i u Bethsy Lalrinsangi nen in chang dun a, Unau-a romantic taka chan kha a har viau em?
- Ekhai, har tak a ni. Feelings a awm mawh a sin. Mahse, kan inpawh em zawk kan ti thei hram a ni.
Mizo zinga film industry a mi ril, Mapuia Chawngthu leh Malsawma Fanai thawhpui chu engnge i ngaihdan:
- Ka phu loh malsawmna Pathian leh chhungte avangin ka chang ni in ka in hria. Anni pahnih hi Mizoramah chuan kan director neih tha ber ber te an ni a, engmah ni lo mahila, an mi duhsakna avang chauh a tun dinhmun hi thleng ve thei ka ni. Thawhpui an nuama, thil an ti tak tak bawk a, an duh uluk dun em em a, kan acting skill te a tha thei ang bera chhuak turin nasa takin min pui a ni.

Film chan hi I hmuh dan:
Thil awlai leh awlsam tak a ni bik lova, inpekna sang tak a mamawh bakah keimahnia a tha thei ang ber chhuak turin inbuatsaihna tha leh tih tak tak na a mamawh sang ve hle ka ti.


Modelling/Acting lam hi I tui reng em:
- Hetiang lamah hian ka tel ve ang tih ngaihna ka hre bik lo, nuam chu ka tiin ka tui ve viau thin. Naupan lai atanga skit leh drama vela han tel te hi chu ka nei zing ve ang reng. Mahse, film puitling ang hiala langa chang ve tur ang hian ka lo indah ngai lo, Pathian vang liau liau a ni ber e.

Mizo Film Industry hmasawn nan thil pawimawh ni a i hriat:
- Kan ramah hi chuan sawrkarah hian kan lo in nghat thuk lo thei lova, sawrkar lam atang tehian funding tha ve tawk tak hetiang lam hawi te hi rawn chhawp chhuak ve thei sela chuan hma kan sawn lehzualin ka ring. Chutiang anih loh vek chuan kan rama sum leh pai lama mi hausa deuh te pawh hian kan film industry hmasawn nan hian an neih ang tehi inphal zau lehzual deuh sela, sponsorship leh funding ah bawk tehian rawn vawm deuh lawih lawih thei sela chuan hma kan sawn lehzual thei ngei in a rinawm. Tin heng zawng zawng bakah mipui lam pawh kan pawimawh hle in ka hria, hah tak leh hun leh tha tam tak senga a siamtu ten an siam hi inngaihhlut sak tawn thiam ila, a thlawn ringawt a en leh neih tum lo hian original copy te ngei hi en in lei te tum ve ta bawk ila, chu chuan nasa takin kan film industry hma min sawn tir in kan in dawm kang tawn lehzual thei ngei in ka ring.

Pinda Chungril



Tuna Mizo Film industry dinhmun, I hmuh dan:
- A siamtute leh a buaipuitute hi an fakawmin an ngaihsan awm ka ti thin. An tui em avang leh thil thar zel tih duh tak tak na an neih avangin kan mizo film industry hi a kal hram hram a ni. Hlawkna an tel hi a tam lua hran lo. Chutiang bawkin a changtute tan pawh hian eizawn nana hmana innghahna tlak a la ni lem lo. Chu chuan film industry a kan tun dinhmun chu a sawifiah chiang viau-in ka hria. Tun atanga kum sawm-sawmhnih chho velah te chuan a danglam ve tawh mahna!

Film chan chhunzawm zel I tum em:
- Han tum lawk sa bur na ka nei hran lo, mahse a tul tak tak dan a zir leh Pathian thu thu ani tawh mai ang chu.


I hmachhawp te:
- Pathian zarah leh chhungte lo thawhrim tawh na avangin sumdawnna lamah hian Restaurant leh catering hi kan nei ve a, huang zauh zel emaw sumdawnna thar lam buaipui te pawh ani ve mahna, Pathian thu thu ni se.

Kohhran, Khawtlang leh nangmah:
- Ringtu kan nih chuan kohhran leh khawtlang hi lak hran theih a nilo. Chumi avang chuan ka phak ang tawk in ka in hmang ve. Tin, chutih ruala ka sawi duh chu kohhran belh hi a hlawk a, engtik ah mah a inchhirawm ngai loh. Pathian zarah tling lo tak chungin kohhran leh khawtlangah te pawh nihna chhe te te chu ka chelh ve mek.

Social media leh nangmah:
- Social media hrang hrang hian min tibuai em em hran lo. Mahse tunlai khawvelah a pawimawh tawh em avang leh a lova kan awm theih tawh loh avang hian khawih chin chu a awm lo thei lo. Social media kan hman kawngah fimkhur a ngaiin mahni in thunun theih a pawimawh hle in ka hria.

Mizo hnam thanmawh bawk ni a i hriat:
- Thatchhiatna in min tibuai a, thawhrimna tak tak tel lova changkan kan tum nasa ta lutuk hi kan mu tan mek niin ka hria. Awlsam te a hausak hluai kan tumna tehian min la ei chhe zo vek ang tih a hlauhawm hle a ni. A tha lama danglam ngam kan tlem tual tual te, mi nawlpui thlek anga kan thlek ve dual dual ringawt te hi hma min ti sawn thei lo tu ni ve in ka hria.


Mizo hnam damna atana kawng awm ni a I hriat te:
1) Thangthar leh thalaite keimah pawh inchhiar tel in taihmak na kawngah kan harh thar a ngai.
2) Mizo ze mawi tlawmngaihna thangthar te ah a tla hniam zel te hi kan insan mar a ngai.
3) Thalai ten kan ram political system (a tu te mah ka sawi chhan in ka sawi chhiatna nilo se) kan zir chian a kan vei a pawimawh ta hle mai.
4) A phawkvuak mai maia ral lova kan thil tih engah pawh a tha lamah chuan hlawhtling thei tura thalai ten kan beih a pawimawh tawh takzet.


Hnam chhan nana hmeichhiate tangkaina leh mawhphurhna:
- Mizote hi kan la tlem hle a, fa neih kawngah hian kan thu chu nilo mahse hei aia nasa lehzuala kan mizo hmeichhia te an tan a ngaiin ka hria. Fa neih hun tur rilrua ngaihtuah reng chungin hriselna leh taksa insawizawina tehi kan mizo hmeichhiate hian ngai pawimawh lehzual thei ta se la. Chhungkaw dinhmun leh hrisel lohna avanga harsatna tawk chu kan awm thei teh meuh mai, mahse khawsak nawm loh leh retheih lutuk hlauh luat avanga fa neih kawnga kan in hrek lutuk ta tehi a bikin mizo hmeichhiate mawhphurhna lian tak a ni ve in ka hria. Hmeichhia an hrisela an inhuam phawt chuan Pathian malsawmna hlu tak a lo ni bawk nen a tam lam hi pawi ti lo tura rilru siam theih a tha hle in ka ring. Mizo tehi kan tam chak poh leh kan hnam humhalhna kawngah kan chak lehzual thei dawn a ni.

Zofate inpumkhatna hi a thlen theih I ring em? Thleng thei turin eng nge pawimawh ni a I hriat:
- Thleng thei tehreng mai. Tunah pawh Myanmar boruak avangin a hma aia nasa lehzualin Zofate kan inpumkhat chho mek niin ka hria. Kan awmna te dangin kan khawsak na te danglam mahse, kan in unauna hi a danglam dawn chuang lova, in mamawh tawn reng kan nihna leh harsatna eng pawh tawk thei vek kan nih avang hian englai pawha tha taka kan in dawnsawn thiam a pawimawh hle. Chu chuan kan inpumkhatna pawh a ti chak lehzual ngei ang.

 

MZP in ZOFEST a buatsaih thin hian ZOfate in unauna kawngah a thawhhlawk in I hria em?
- Tehreng mai. Hetianga kan unaute hmun danga awm nena intawn theihna hun tha tak MZP in an siam thin avang hian kan inpawhna hi a thuk lehzual viau in ka hria.

I thalaipuite tan:
- Mahni eng nilo mah ila, hetiang lam kawng hawi min zawh apianga kalo sawi ve fo thin leh ka phak ang tawka ka vei ve em em thin chu, thalai ten thawh hreh kan ngah ta lutuk te, hna kan tih hian eng chin nge kan huam tira eng chin hi nge hna tak tak anga kan ngaih tih lai hi ngun taka kan ngaihtuah a ngai tawh in ka hria. Zir san na lamah te kan intlansiak suau suau a, a tha lutuk e, mahse heng te hian engmah thawh nei si lova hna thenkhat thawh zahna leh thawh hrehna min thlen tam tir ta lutuk te hi a pawi ka ti. Mahni thalai pui ngei pawh hna chungchang ah a thawh a hmaa duham kan han tan ringawt te, engmah thawh nei hauh si lova hna thenkhat kan han hmu hniam nghal em em ringawt tehi kan insiam thar a ngai takzet in ka hria. Hnam changkang apiangin mahni in chawm thei hi an ngaisang a, chutiang chiah chuan mahni kan inchawm theihna te, chhungkua kan chawm theihna eng hna pawh hi kan hausak pui emaw hausak pui lo emaw, a zahawm in hna tling tak ani tih hi kan hmuhthiam a hun tawh in ka hria. Inti changkang taka thawh neih siloh te, thawh hreh ngah em em si te hi thalaite hian kan sim a hun tawh takzet ka ti a ni.

EXPLOREMIZORAM.COM I hmuh dan:
- Hetianga kan ram chhung chanchin kimchang taka tarlan na website a awm hi a tha in a hlu ka ti takzet. Kan ram chhunga thil thleng engpawh hmuh theih leh chhiar zung zung theih a alo awm te hi kan ram hmasawn na atan pawha thil tangkai tak a ni a, Mizo mipui te pawh in kan ngaihhlut thiama kan thlir tam lehzual zel pawh a tha hle in ka hria.
EXPLOREMIZORAM.COM kaltlanga kei ve tehlul tling lo tak chunga thil tam tak ka sawi ve thei te hi ka lawm in ka ngai hlu takzet a ni.


@ EXPLORE MIZORAM

(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments