World TB Day hmang

Aizawl | March 24, 2021: Vawiin Chawhma Dar 11:00 AM khan Auditorium, Commissioner of State Tax, Mizoram New Capital Complex (MINECO) ah World TB Day hman a ni. March ni 24th hi khawvel puma TB dona ni atan hman thin a ni a, Kum 1882 March 24 a Scientist Robert Kotch an TB hrik a hmuh chhuah thu a puanzarna ni denchhenin he ni hi World TB Day a hman thin a ni.

He hunah hian Dr. Eric Zomawia Mission Director NHM in World TB Day hmangtur a hriselna tha kan neih hi lawmawm a tih thu sawiin TB do nan a theihtawp chhuah zel tur in thawk tu te a fuh bawk.

Pu R. Lalramnghaka IAS, Special Secretary, H&FW chu khuallian niin kumin World TB Day thupui chu The Clock is Ticking tih a ni a, TB umbo tura hmanhmawh taka thawh a tul takzet a ni a ti.

Khuallian chuan Sustainable Developement Target ah chuan kum 2030 ah hian khawvel pumah TB umbo tawh tur a ni a. India ramah chuan hei aia kum nga a hmain kum 2025 ah TB hi umbo tum a ni thung a sawi. India ram atanga TB natna nuaibo tura theihtawp chhuah mek a ni tih a sawi. Pu R. Lalramnghaka,IAS chuan he chona lian tak hlenchhuak tur hian sawrkar chuan National Strategic Plan (NSP) 2017-25 chu a duangchhuak a. He ruahmanna hnuaiah hian TB programme ah thil tam tak duan belh anih bakah hmalakna kal mek te pawh tih changtlun zel a ni a ti.

Khuallian chuan TB umbo na kawng atan hian Active case finding hi hmalakna pawimawh tak a ni a. Hemi atan hian TB programmme a thawktu te chu TB case hmuchhuak turin mipui awmtamna hmun Home, Jail, addict centre, hostel, TB vei awm theihna hmun hrang hrang an tlawh thin a. Screening leh awareness te neih thin a ni a. TB vei rinhleh te chu Test zel  thin an ni a ti. Pu R. Lalramnghaka,IAS chuan TB service hi zau zawka mipui ten an hmuh theih nan Health and Wellness centre ah te TB service pek tumin hmalak mek zel a ni a ti bawk.

He hunah hian Dr. Vanlalfela State TB Officer hovin TB programme hnathawh te thlirho a ni.

Nikum chhung khan Mizoram pumah TB vei mi 2282 hmuhchhuah an ni a. Rinhlelh exam zawng zawng hi mi 12000 chuang an ni. TB tihdam harsa bik Drug resistant TB (MDR-TB) vei mi 149 hmuhchhuah an ni. TB leh HIV veikawp mi 287 hmuhchhuah an ni bawk a. Tin TB vang hian mi 48 an thi a. TB tihdam zat hi 78% a ni.