Aizawl | March 24, 2021: Sports Minister Pu Robert Romawia Royte chuan vawiin khan kumin 2021 Republic Day Camp New Delhi-a North East aiawha telve NCC Cadets 2 (1) Under Officer Mimi Lalnunpuii D/o Zarzoliana leh (2) Sgt. Laldikmawia S/o R.Vanlalvena, Senior Under Officer Lalchhanhimi, DG NCC Commendation Card Chawimawina dawngtu leh NCC Officers te chu a pisa- ah thingpui a inpui a, lawmpuina thilpek a hlan bawk.
Sports Minister chuan NCC chu nungchang siamna atana pawl pawimawh, sipai officer-a luhna kailawn atan leh mihring puitlinga inchher chhuahna atana pawimawh a ni a ti a. Mizo thalaite zingah North East aiawha Republic Day Camp chhim tura thlan chhuah leh hlawhtling taka course zo an awm thin chu fakawm a tih thu sawiin anmahni leh NCC-a anmahni kaihruaitu Officerte leh an nu leh pate a lawmpui thu a sawi.
Pu Robert Romawia chuan NCC pawimawhna hriain Mizoram Sorkar leh Defence Ministry tangkawp hmalaknain NCC 2 Mizo Battalion thar pawh Lungleiah a function thuai dawn tih a sawi a. NCC hotute hnen atanga thu dawn danin Mizoramah NCC enrolment tam zawk ti turin hma lak mek a nih thu a tarlang.
Vawiina NCC Cadet te lawmpuina hun hi Col. AS Randhawa, Commanding Officer, 1st Mizo Bn NCC-in a kaihruai a, NCC-a hlawhtlinna changtu Cadets 3 te pawhin thu an sawi ve a ni.
- DIPR
Post a Comment
He post chungchanga i ngaihdan lo sawi ve rawh: