‘PÛM 2021: Mizoram Innovation Fair’ hawng

Aizawl | March 24, 2021: Labour Employment, Skill Development & Entrepreneurship Department (LESDED) hmalaknain Govt. ITI Complex-ah ‘PÛM 2021: Mizoram Innovation Fair’ hawn a ni a. PUM 2021 hi ITI zirlai mekte, zir chhuak tawhte leh kut themthiamna lama tui leh thiamthil neite tana buatsaih niin, an thil siamchhuahte chu he hunah hian phochhuah a ni a. He Exhibition-ah hian an thilsiam phochhuahte hmang hian intihsiakna kalpui nghal a nih bakah ITI hnuaia trade hrang hrangah te inelna kalpui a ni bawk ang.


‘PUM 2021:Innovation Fair’ hawnna inkhawmah hian LESDED Special Secretary, Pu Lalramsanga Sailo, IRS, chu khuallian niin Zokhuaa thirdeng kut themthiam takte hnathawhna hmun Pum hmingchawia thiamthil nei in phochhuahna ‘Innovation Fair’ buatsaih a ni chu lawmawm a ti a. LESDE Department hmalakna hrang hrang chungchang sawi zelin World Bank bultuma project kalpui mek ‘STRIVE’ hnuaiah ITI Aizawl thuamthat mek a nih thu leh eizawnna tlak skill training uar deuh deuh a tul thu a sawi. Sorkar laipui chuan Employment Exchange zawng zawngte chu National Career Centre-ah leh a tum mek thu sawiin Pu Lalramsanga Sailo chuan tunlai khawvelah vocational education hi chhungkua leh ram tan a chhenfakawm tawh zawk a ni a ti bawk.


Hawnna inkhawm kaihruaitu Pu K. Lalhmingliana, Director, LESDED chuan China-in khawvel sumdawnna a awp chhan hi skill-a an san vang a ni a ti a, Mizoten skill development-ah hma an sawn hunah khawvel hmundangte nen kan tlanrual ve thei dawn a ni a ti.

PÛM 2021: Mizoram Innovation Fair hian March ni 26, 2021 (Zirtawpni) thleng a awh dawn a, he fair-ah hian lawmman cheng nuai khat thleng dawn theihna tur siam a ni a, consolation prize bakah People’s Choice Award-te siam tel a ni bawk. He Innovation Fair-ah hian participants 23 awmin, hengte hi Mizoram district hrang hrang atanga rawn tel an ni a, an zingah hian ITI zirlai mek 4 awmin zir chhuak 5, Women Polytechnic atangin zirlai 3 leh a bak zawng hi open-a lo telte an ni.

Fair kharna hun hi LESDE Department Minister Pu Lalchhandama Ralte-in a hmanpui theih beisei a ni a. Naktuk ni 25.3.2021 (Ningani) hian mipui tlawh theih tura hawn a ni dawn a, hemi ni hian mi zawng zawng lo tel turin LESDE Department chuan a sawm a ni.

- DIPR

Post a Comment

0 Comments