SERCHHIP POLITICS TITI - III

- K Remruatfela

Part-III ah hi chuan a hawi zâwng thlâk hretin District Council hunlai atanga MLA Election hnuhnung bera Serchhip constituency-a vote tlâk tawh thin dán vel statistical data ka rawn chhawpchhuak ang ka ti zet na a, tunhnai Serchhip ka haw zawk chhûnga politics vir vel ka hmuhte khân ka rilru a luah lian leh ta zâwk tlat si a, chuvangin tun tumah pawh hian Part I leh Part II ang thoin Serchhip ka haw chhunga party tin boruak ka hriatthiam dânte ka rawn chhawpchhuak leh zâwk dawn a ni.

*Congress Party:*

Rin phâk bâka Pu Tlana boruak kâng chho hi thil mak a tling! Serchhip pa dik tak a nih vang nge, heti khawpa Congress muthlu a kaitho thei hi a ropui tak zet bawk a ni. A tirah kha chuan tun bye-election lo awm turah kher kher hi chuan Congress party hi hming lang ve thamah kan ruat hlawm lo a ni tih hi phat rual a ni a. Pu Tlana lo ding tur hi hriat a ni tirh pawh khan _"Pu Tlana tan chuan a va hun hrih lo ve aw..."_ tih deuh vek kha a ni a. Mahse, taima taka tan a han khawh chho tâkah chuan a ni têlin a boruak a kâng a ni tih loh rual a ni lo! Neutral vote hui kawngah erawh chuan Pu Duha hi a la pha lo nasa hle tih chu hai rual a la ni lova, mahse Congress muthlu leh nguai heti taka a rawn chawk harh thei hi *Right person in the right time* a ni ka ti lo thei lo! A lo tling zo ta êm lo a nih pawhin 2023 tana a kawng lo siala, dai lo theu hmasa tu pawimawh tak chu a ni ngei ang.

*Mizo National Front:*

Sawrkar sum pui kuahtute an nih tlat avang hian tu pawh rawn in candidate se ruling boruak hi chu a lian lo thei lova. Ka haw hmasak kha chuan ruling wave kha a nasa hman hle a, Pu Zawma hi tlang chho thei dinhmuna ding mai tur angte khan ka hmu hman rum rum a. Nimahsela, tun tum ka haw chho leh kha chu, hmunpui lama hruaituten hminghliauna leh boruak danglam neuh neuh an neih thin vang nge an Pu berte khak sual thin vâng zâwk, ruling wave awm ang kha a zawi leh sawt ta riau hian hriatna ka nei tlat pek a. Party worker te erawh an inlungrual thain tan an khawh tak meuh meuh tih a lang chiang hle thung. Nimahsela, party worker pâwn lam mi te an la hmin hleithei hlawm tlat lo hi chu a la pawi thei maithei. MLA Election hi party worker te chauh vote thlâk theihna a ni si lova. Party vote belh tura neutral vote engemaw zât an hui then theih phawt chuan beiseiawm ber tur chu an ni. Nimahsela, neutral vote hi an hûi then nual thei ngut ang em tih erawh rin thiam a har!!

*Zoram Peoples Movement:*

A nawlpui angin tan an la khawh tak tak lo na a, Pu Duha lainatna thinlung hi chu a la reh tak tak thei lo tih hi a chiang reng a. Ninlmahsela, Aizawl lama mi leh sa an ngah ang aia bye-election thuthmun bera belh tur duhthusama tam an nei thei tlat lo lai hi an tan chhiatna thlentu a ni ve thei tho mai. Neutral boruakah erawh Pu Duha hi a la sang fal nasa hle a.  Han thutkhawmna hmunah te pawh hian phek laili ber luahtu chu Pu Duha Charismatic leadership tho hi a la ni! Amah Pu Duha bakah party hruaitu leh party worker ten a hun dâwn hnaia an pal bua te a nih ngawt loh chuan khawngaihna leh lainatna mi tam tak thinlunga awm hi chuti mai chuan a kian mai chu a rinawm lova. Tling tura tlâng rin ber pawh a la ni. Nimahsela, neutral vote-a innghat, vawihnih khat khak sual zeuh vanga lainatu kiam duak thei dinhmuna ding an nih tlat avang hian ngaihtha taka awm mai mai thei chu an ni chuang dêr si lo!

*Bharatiya Janata Party:*

An official candidate hi Serchhipah pawh Serchhip pa em em lehzual, Pu Hriata Chhangte a ni tlat a, a boruak hi chu a la ring tial tial dawn tih a chiang! Vawiin i.e. ni 25 March, 2021 khan State Bank-ah kan inhmu nawlh a. "Pu Hriat, eng nge i boruak ni zel" tiha ka han zawt chu.... rin loh leh beisei loh takin  ka zawhna tak min chhang ta lo chuan, "aaaaa... BJP Candidate kha kan nia" tih ringawt khân min chhang a. Ami chhanna atang chuan tlin êm chu a inring bik chiah lo a nih hmel riau mai. Mi tin zawhna ber zâwk chu a tling zo ang em tih lam ai mahin, tu vote ber nge a lâk hêk ang tih hi a ni deuh ber a, chu chuan tun tuma BJP boruak chu rilruin min chhuidawn tir thei mai âwm e. 

*People Conference Party:*

Pu Ruata hi a lo ding leh dâwn ta lo zâwk nge tih mai turin a thâwm hi a reh hian a reh tlawk tlawk mai a. Hmanniah PC Party hotu pakhat ka kawm a. "Mizoramah pumah hian mi leh sa hi engzah vel nge in la neih ang" ka ti a, "Sing khat te chu kan la nei mai lo maw!" tiin min chhâng lek fang a. Heti a nih chuan Pu Ruata hi a mimalin Serchhip mipuite hian duh viau pawh ni ila, beisei hi chu a sâng tak tak thei lo a ni.