MSU-in MRB hnuaia dan pela thawktute Mizoram-a hna thawk tlakah ngai lo; March thla chhung hun an pe!

Aizawl | March 25, 2021: Mizo Students' Union (MSU) general headquarters chuan vawiin khan Aizawl Press Club-ah chanchin thehdarhtute kawmin, Mizoram Rural Bank hnuaia dan pela thawktute chu Mizoram-a hna thawk tlakah an ngaih loh thu an sawi.

MSU president J Lalmuanzuala chuan, "Mizoram tana kan Bank neih lian ber, kan state chhung thingtlang kilkhawr ber pawh a mipuite dawr ber Mizoram Rural Bank (MRB)-a thil thleng hi pawi kan tiin hriat thiam har kan ti hle a. Hemi chungchanga Mizo mipuite hriat tur puangchhuak chungin MSU-in hma a lak zelna turah zirlai leh mipuite thlawpna kan han ngen nghal bawk e." a ti a. 

"Mizoram Rural Bank hi Regional Rural Bank (RRB) Act hmanga din a nih angin sawrkar Bank a ni a. India ram hmun hrang hranga RRB hnuaia hnathawk tur te hi Institute of Banking Personnel Selection (IBPS)-in Common Recruitment Exam buatsaihin lak thin an ni a, Candidate te hian form an fill up laiin an hnathawh duhna State an thlang thin a ni. Mizorama MRB Branch hrang hrangah pawh State pawn lam mi hnathawk tura thlan leh thawk nghet kan neih phah ta fo a; amaherawhchu, RRB (Appointment of Officers and Employees) Rules 2017-in a sawi angin an thawhna state ṭawng an thiam bel a ngai a;chuvangin, State pawn lam mite pawhin Mizo ṭawng pawl riat chin emaw a tlukpui emaw tal thiamna (Local Language Proficiency) an neih a ngai a ni." a ti a. Sawi chhunzawmin, "Tin, RRB (Officers and Employees) Service Regulation, 2010 leh Appointment Rule, 2017-in a tar lan angin Group B (Assistant Multipurpose) atana chhawr tura thlante hian hnathawk tlaka rawih an nih hma belh khawm thla 18 chhungin proficiency in Local Language Test(Exam) an paltlang ngei ngei a ngai bawk a ni. Tunah hian Office Assistant atana chhawr lai mi paruk (6) RRB (Officers and Employees) Service Regulation, 2010 leh Appointment Rule, 2017-in a sawi ang hun pel veka hnathawk lai leh Mizoram Rural Bank Service Rules 2010 bawhchhia kan kawl mek hi MSU chuan hriat thiam har a ti," a ti bawk.

MSU president chuan, Kâwlkulh Branch ami Chandan Choudhury, Champhai Branch ami Shailesh Kumar Singh, Marpara Branch a thawk Rishabh Raj, Kânhmun Branch ami Amibatha Nath leh Ngopa Branch ami Amit Kumar te chuan Thla 15-in an probation period an pel tawh a, Sangau Branch ami Sumit Kumar March 21, 2019 a joining report pe chuan thla ruk-in a Probation Period a pel tawh niin a sawi bawk.

Press Conference Video:

MSU president press statement-in a tarldan danin, Mi paruk (6) MRB Branch hrang hranga chhawr mekte hian a chunga RRB (Officers and Employees) Service Regulation, 2010 leh Appointment Rule, 2017 ang hun an bawhpelh mai bakah Local Language Proficiency Test buatsaih an la paltlang thei lova. Chuvangin, an service hi terminate tur an nih piah lamah danin a phut ang thiamna an neih theih loh avanga Service Disqualify tur an nih laiin Serchhip MRB Branch-a chhawr mek Assistant Manager Punit Kumar Jha hova inthurualin Chief General Manager; SBI Corporate Centre, Mumbai-ah August ni 10, 2020 khan Mizoram Rural Bank Management chu dawtin an lo hek ta daih mai a. An heknaah chuan Local Language Proficiency Test chu an hna aṭanga chawlhtir theihna hmanrua atan an thawhpuite’n an hman thu leh MRB Management chu rintlak a ni lo an ti a. Kum 2018 aṭanga State dang aṭanga chhawr thar leh en thlak lai mekte’n a rintlak tawk loh an rawn ti ve ringawt mai hi Mizote tana Sawrkar Bank din Mizoram Rural Bank tih hmingchhiat tumna leh Mizo Hnam min tih mualpho tumna niin MSU chuan a ngai tlat a. MRB Management hi IBPS kal tlanga MRB-a hnathawk turte lak nan MSU chuan a rintlak tawk an ti a, a ring zo lo chu MRB staff tu pawh nise Mizorama hnathawk tlakah an ruat lo hial zawk niin chanchinbu mite a hrfilh.

MSU chuan, Mizoram tana hnathawk tur hian thliar bik a nei lo va, Reservation chungchangah pawh a ṭul angin hma a la zel dawn a ni. MRB chungchanga dan bawhchhetute lak pawh hian November ni 24, 2020 khan Mizo mipui tana MRB Management rintlak a nihzia lantir nan hma la turin ziakin a lo thlen tawh a. Hma lakna kalpui mek a nih laiin MRB Management tihhmingchiat pawh pawi tilotu leh hektute hmalakna vang hian MRB Chairman chuan Mizoram School Education Department chu Language Proficiency Test buatsaih tura an inhawn thu a lo sawi a, hei hi MSU chuan tha lo a tih takzet avangin sawrkar thuneitute a be pawp vat a. MSU chuan eng kawng zawng pawhin heng mite ai chuan mi thar zawk Mizoramin a mamawh thu a sawi chhuak hial a ni. SCERT lamah a chunga kan sawi tâk mi paruk te bakah LPT Exam la paltlang lo kum 2018 atanga joining report rawn pe tawh te tan Exam buatsaih tura hriattirna February ni 10, 2021 khan Secretariat aṭangin a chhuah leh a, MSU chuan hei hi pawi a tiin a tawp thlengin a dodal tlat zel dawn niin MSU preident J Lalmuanzuala chuan a sawi bawk.