Dr K Beichhua in AIDS/HIV dona kawnga SW &TA, MSACS leh pawl dang te thawhhona hawng

Aizawl | March 31, 2021: Vawiin chawhnu khan Dr. K Beichhua, Minister of State, Social Welfare Department,etc., chuan a Office Chamber, MINECO-ah AIDS/HIV dona kawnga hmalakna thar Index Testing and 90-909-90 atana Mizoram sawrkar leh pawl dang te thawhhona chu a taka kalpui a nih theih nan a hawng. He hmalakna thar atan hian Mizoram Social Defence & Rehabilitation Board, Social Welfare & Tribal Affairs (State Level Coordinating Agency, MoSJE, Govt of India) leh Project Sunshine, UW-ITECH (University of Washington - International Training and Education Centre for Health) Aizawl, Mizoram te an thawkho dawn a ni.
SWD Minister Dr.K.Beichhua chuan ruihlo hmansual leh AIDS/HIV chungchanga Survey in Mizoram dinhmun a tarlan dan chu sawi chhuah hrehawm leh thil zahthlak a ni a. Tan kan lak nasat a ngai hle a ni a ti. He mi kawngah hian ram hruaitute pawhin tan lak a tul zia an hmu chiang em em a. Tuna inenkawlna hmun neih mek te pawh changtlung zawka kalpui turin theihtawp chhuah mek a ni a ti a. Ruihhlo dona kawnga hmalakna leh ruihhlo ngai ten nunphung pangngai an zawh theihna tura din, Jordan Centre, Sethawn pawh Chief Minister Pu Zoramthanga’n hun reiloteah a hawng dawn a ni a ti.
Dr.K.Beichhua chuan Ruihhlo hmansual leh HIV natna chu thil kalkawp ang mai a nih thu a sawi a. Hei vang hian, Integrated Rehabilitation Centre for Addicts (IRCA) hmuna enkawlna dawngte zingah pawh HIV avanga enkawlna mamawh leh hmalakpui ngai an awm thin a. Hemi chungchang hi ngun taka ngaihtuah a nih hnuin, IRCA hmuna enkawlna dawng ten HIV natna chungchangah awlsam leh tluantling zawka treatment an dawn theih nan hemi kawnga rintlak taka hma la mektu Project Sunshine, UW-ITECH (University of Washington - International Training and Education Centre for Health) Aizawl, Mizoram leh Mizoram Social Defense & Rehabilitation Board (State Level Coordinating Agency, MoSJE, Govt of India) chu thawkhoin, he thawhhona hi Social Welfare & Tribal Affairs Department, Govt of Mizoram chuan tha a ti hle a. He hmalakna thar hi Integrated Rehabilitation Centre for Addicts (IRCA) ten tangkai leh hlawk taka an hman theih nan he programme pawimawh tak hi duan a ni a ti.
Vawiina SWD Minister Dr.K.Beichhua in thawhhona a thar a hawn tak ang chuan ITECH team hian an thawhpui Mizoram State AIDS Control Society leh SHALOM lama thawktute nen IRCA hmunah kalin a thlawn vekin heng Service te hi a pe thei dawn a ni :
1. Mizoram chhunga IRCA hmuna enkawlte tana HIV test neihsak.
2. IRCA hmuna enkawlte Baseline investigation atana Blood Sample lak sak leh ART bul tan pui.
3. IRCA hmuna enkawl mek PLHIV-te ART pek.
4. ART Refill - INTECH Field Team ten IRCA hmuna ART hlan/dah sak.
5. Viral Load Testing - Viral Load Test thei chinte tana Blood Sample IRCA hmuna laksak.
Heng Service te hi tluang taka a kal theih nan IRCA lamin -
1. ART Dispensation - Nurse in nitin HIV positive patient te hnena ART eitir.
2. Record Maintenance - ART Refill Ni leh ART damdawi neihzat chhinchhiah nana register vawn fel (Centre Director/ Nurse hmalakna tur)
3. Focal person atan Centre Director (Coordination leh Follow up atan) Ruahmanna a lo siam ve thung dawn a ni.
He thawhhona hi tangkai taka hmanga, kan ram a dam theih nan beiseina sang tak nen kan thlir a ni.
Index Testing and 90-909-90 atana thawhhona hawnna programme hi Pi Sangchhin Chinzah, Secretary, Social Welfare Department chuan a kaihruai a. He hunah hian MSACS atangin Pu Robert Lalrempuia, Senior Programme Officer leh I-TECH atangin Dr Pankaj Gupta te hnen atangin hmalakna kalpui dan tur ngaihthlak a ni a. Pi A. Vanlalzawni, Director, Social Welfare & Tribal Affairs Department chuan lawmthu sawiin huntawp a khar thung a ni.

- DIPR

Post a Comment

0 Comments