Lunglei khawpuiah loh theih lohva bawlhhlawh thliar hran kalpui lo ngai ve ta chungchangah Department lam te pawhin ruahmanna fel tak an siam tawh - HPC vice chairman

Aizawl | March 31, 2021: Naktuk April ni 1, 2021 atanga Lunglei khawpuia Bawlhhlawh thliar hran kalpui tur chungchangah vawiin khan Lunglei Hig Power Committee vice chairman Lawmawma Tochhawng chuan a office ah Lungleia chanchinthar la khawmtute a kawm a, he hunah hian Lunglei D.C Pu Kulothungan A, DUDO Lunglei Pu Andrew Lalhruaia leh Official thenkhat te an tel a ni.

HPC Vice Chairman Lawmawma Tochhawng chuan hmasawnna kal zelah Lunglei khawpuiah loh theih lohva bawlhhlawh thliar hran kalpui lo ngai ve ta chungchangah Department lam te pawhin ruahmanna fel tak an siam tawh tih sawiin Lunglei Town Sanitation Task Force chuan hetianga kal hi tul a ti a ni, a ti.

Lawmawma Tochhawng chuan tun dinhmunah Lunglei khawpuiah bawlhhlawh bawm sem tumna a awm rih loh thu sawiin, Solid Waste Managment Project siam mek a taka kalpui a nih hnuah BPL Family te hnenah bawlhhlawh bawm subsidy-a pekchhuah tum a nih thu a sawi a, chhung tin te he hmasawnna rahbi thar rap tura inpuahchah a tul thu sawiin, bul tan tur an nih anga fel tawk lo awmah pawh thawktuten zirna an pek zel tur thu a sawi a, thuthar lakhawmtute chu hemi kawnga tlangautu pawimawh tak annih anga mipui zirtirna kawngah theihtawp chhuahpui turin a sawm a ni.

Lunglei Town Sanitation Task Force Chairman leh DC ni bawk Pu Kulothungan A chuan bawlhhlawh thliar hran mumal taka kalpui hi India ram hmun tam takah pawh kalpui tawh a ni, a ti a. India ram state danga Swachh Dooth campaign lo kalpui tawh angin Lungleiah pawh khawpui chhunga Self Help Group 158 hnuaia member-te chu in tinah kal kualin door-to-door awareness campaign ngawrh taka kalpui anih tur thu a sawi a. He ruahmanna thar hi Lunglei mipui ten tha taka an zawm theih nan media lam te chu theihtawpa zirtir tura a duh thu a sawi .

Pu Andrew Lalhruaia, DUDO Lunglei chuan bawlhhlawh thliar hran kalpui dan tur sawifiahin, Lunglei khawpuiah April ni 1 atang chuan chhung tin ten bawlhhlawh tawih thei leh theilo thliar hran vek tur a nih thu a sawi a. Lunglei Khawpui chhungah VC 24 awmin UD&PA Department-in VC 9-ah Department motor-in bawlhhlawh a khawn a, VC 15-in anmahni veng/YMA motor hmangin bawlhhlawh an khawnin an paih thin a. UD&PA Department-in bawlhhlawh a khawn thin na veng 9 bikah hian bawlhhlawh tawih theilote hi kartin thawhtanni atanga zirtawpni thlengin lirthei pali ten veng hrang hrangah an khawn khawm thin dawn a, bawlhhlawh tawih theite chu kar tin thawhlehni apiangin lirthei pali bawkin an khawn khawm dawn a ni. VC 15 dang, anmahni veng/YMA motor hmanga bawlhhlawh khawna paih thin te chuan tawih theilo leh tawih thei khawn ni hi anmahni veng mil leh an remchan dan angin veng bil atan schedule an in siam ve dawn a ni.

- DIPR