Thangram Cultural Meet hmang; "Inhmangaih si lovin ram khatah awm ila kan inngeih dawn chuang lo, inngeih si lo ram khata awm ringawt kha buaina mai mai a ni," - K Vanlalvena

Mualmawi (Baruatilla) | Feb 25, 2021: Thangram Cultural Meet 2021 chu nizan aṭang khan Mualmawi, Baruatilla, Karimganj, Assam-ah ṭan a ni a. Vawiin khan Mizoram Rajya Sabha MP, K Vanlalvena chuan khuallian niin a hmanpui.

Rajya Sabha Member of Parliament K Vanlalvena chuan thu sawiin, Thangram mipuite chu tharum ni lovin Pathian nen an tum hlen tura bei turin a chah a. Hnam dintu Pathian chuan hnam tan hun ruat a neih ngei a rin thu sawiin, "Hnam inhmangaihna bakah inlungrualna a pawimawh hmasa" a ti a, "hmun khatah awm mahila kan inhmangaih loh a, kan inlungrual si loh chuan a sawt chuang lo" a ti a ni. "Inhmangaih si lovin ram khatah awm ila kan inngeih dawn chuang lo, inngeih si lo ram khata awm ringawt kha buaina mai mai a ni," a ti bawk.

"Kan inhmangaih tur a ni. Inhmangaih hi a pawimawh ber, State khata awm aiin chu chu a pawimawh zawk," a ti a. "Kan inhmangaih phawt ang a, Pathianin rem a ti a nih chuan administrative umbrella pakhat hnuai-ah pawh kan awm mai ang chu," a ti bawk.

MP thusawi kimchang

Thangram Cultural Meet hmang tura RS MP K Vanlalvena kal hi Thinghlun dai-ah Sipaiin lo dangin kaltlang an phal lova, programme neih lawk theih ni lo mahse, dodalna karah Mizoram Rajya Sabha MP huaisen tak K Vanlalvena hian chawhnu dar 1:40 pelh-ah a hmun hi a thleng a ni.

Thangram Cultural Meet-ah hian Mizoram aṭangin MZP leh a hnuaia hnam pual zirlaite bakah College zirlai hrang hrang an kal a. Hemi bakah hian Thangram chhunga cheng hnam hrang hrang; Chorei, Hrangkhawl, Sakachep, Molsom, Ranglong leh Kaipeng te an tel a ni.

Thangram Indigenous Peoples' Movement (TIPM) Chairman K Vana Chorei chuan thusawiin, thangram mipuite chu zohnahthlak ni mahse hnam  dang kara leng kan nih vangin hniamna leh hnuafualna kan nei ṭeuh a, ṭawng thu-ah pawh kan lo hmang awn deuh mai thei. Zoram mipuite'n heng kan hnufualnate hi min hriatsak a, kan tana ding fo turin ka sawm che u a ni," a ti.

ZORO Ṭhalai president L Ramdinliana Renthlei chuan thu sawiin, "Thangram movement chu kal zelin Zoram thar ala piang dawn a. Rorelna pakhat hnuaia kan awm theihna atan mahni hnam tan mi tin ṭan kan lak a pawimawh." a ti a. Thangram huam chhunga ṭhalaite chu ram tan ṭhahnemngai taka bei tur leh hun ṭha lo inher tur atan ṭha taka lo inbuatsaih a, zirna uar turin a chah bawk a ni.
RS MP K Vanlalvena hi dan a nih vangin a hnuaia mi ang hian thu an chhuah hman a ni.
"Thangram Cultural Meet chu nizan lamah tluang takin tan a ni a. 
Vawiin lamah chhunzawm tura kan in buatsaih laiin, Kan Khuallian tur kan *Ex President  Pu Vena, MP* chu Assam Police in Thinghlun leh Zaite inkarah an dan avangin, programme  tan theih a ni tih lo.
Nizan zan reiah Karimganj DC in order chhuahin, Programme hman a phal loh thu leh buaina a thlen chuan  Thangram Indigenous People's  Movement (TIPM) hruaitute mawh a nih tur thu a chhuah a. Engti kawng pawha he programme tih hlawhchham hi an tum ber niin a lang.
MZP chhungkua, Hnampual leh College SU tlang hrang hrang a mi ten, tawngtaina lamah min lo hriat a. Kan boruak lo ngaichang turin kan in ngen e.'

MP ṬHU TLAT
Pu K Vanlalvena hi MP a nih hun rei lote chhungin ṭum 4 lai Parliament Session-ah thu a sawi tawh a. Vawiin khan Assam ramriah a ṭhu tlat a, a ṭhut tlat avangin fak a phu hle.
Thangram Indigenous Peoples' Movement huaihawtin Thangram Cultural Meet, Muolmawi, Assam-a neih turah Pu K Vena hi khuallian atan sawm a ni a. Chumi hmang tur chuan Thinghlun aṭangin zing dar 8:45 velah an chhuak a. Assam ram chinah kaltlang tir phal lovin Assam Police-in an lo dang ta tlat a ni.
"Min kaltlang tir hma chu ka kir dawn lo. India ram a ni a, ka duh duhnaah ka kal thei. An peih chen chen min dang rawh se, ka kir dawn lo," tiin a motor-ah a ṭhu tlat a. Mi tam tak ni ila kan kir leh duh mai awm e. A ni erawh chuan kir a tum lo. Darkar 4 dawn an dan hnuah Assam lam hi an tlawm ta. Dan kir mai chi a ni lo tih an hria a ni ngei ang chu an kaltlang tir ta a ni.
Pu K Vanlalvena chuan Assam Police lakah hnehna a chang ta a. Assam ramri-a cheng Zohnahthlak, Mizoram State-a rin luh duh ngawih ngawihte khuallianah chuan a ṭang ta a ni.

Post a Comment

3 Comments

  1. A kimchang in a thathin hle mai 👍

    ReplyDelete
    Replies
    1. Kan lawm em em. I lo chhiar/tlawh thin avangin kan lawm e.

      Delete
  2. This comment has been removed by the author.

    ReplyDelete

He post chungchanga i ngaihdan lo sawi ve rawh: