MZU M.Com Gold Medalist 2020 Lalhmangaihsangi

byH Zate — 0
Mizoram University (MZU) Master of Commerce (M.Com) Gold Medalist 2020 Lalhmangaihsangi kan belchiang.


'Sangtei' tia hriatlar MZU hnuaia M.Com Gold Medalist 2020 Lalhmangaihsangi hi C Lalromana leh H Lalhmachhuani te fanu pali zinga a upa lam atanga chhiara pahnihna niin, April 30, 1997 khan a lo paing a. Prebyterian Kohhran-ah lawiin, Ramthar North, Aizawl-a cheng leh khawsa an ni.



Zirna lam:
1. Pawl 1 atanga pawl 10:
- Pawl 1 atanga Pawl 10 hi St.Lawrence School ah ka kal chhuak  a, 1st division ah te passed in, top 10 a lan chang ka nei zeuh zeuh. Pawl 10 hi Kum 2013 ah 1st division ah ka passed.

2. Pawl 12:
- Pawl 12 hi Govt.Mizo Higher Secondary School aṭangin Commerce Stream ah Kum 2015 khan 1st division ah ka passed.

3. Zirna sang:
- Bachelor of Commerce(B.Com) kha Govt.Hrangbana College ah ka zir a, Kum 2018 ah zir zovin Mizoram University hnuaiah khan Pahnihna ka ni. M.Com hi Mizoram University aṭangin kum 2020 khan ka zir chhuak leh a ni.

#I lehkha zir dan?
- Primary, Middle leh Higher level ah khan zir hun bik neiin lehkha ka zir ṭhin a. 
College chinah kha chuan vawng(by heart) lutuk lova zir a lo nih tak avangin a hma ang em em chuan ka zir lo a, amaherawhchu ka naupan lai lehkha zir dan ka lo chin ṭhan khan engemaw chenah chuan zir tam turin min pui. Class a kan zirtirtute min zirtir hi ṭha takin ka  hriatthiam awlsam dan turin ka ziak thla vek a, Syllabus kan zir zawh Exam dawn hnaih  lamah ka zir tur atan note ka insiam a ka zir ṭhin.

# Harsatna I hmachhawn dan?
- Harsatna ka tawh chuan Ka ṭawngtai tam a, a eng zawnga ngaihtuah luih hram hram te ka tum a, keimah a beiseina sang tak neitu ka chhungte ngaihtuah chungin ka theihtawp ka chhuah ṭhin.
 
# Gold medalist I nihna ( Subject)leh CGPA?
- Master of Commerce, CGPA - 8.216.

# Gold medalist ni tura I beih dan?
- B.Com ah te Pathian zarah result tha tak te ka neih avangin M.Com ah pawh neih leh duhna ka nei a, a hnungtawlh zawnga kal ka hlauhnain ka thatchhe lutuk tur min veng ka ti mai. Ka theih chinah  result ṭha tak neih ka duh a, Gold medalist nihna ngawr ngawr chu ka va ngaihtuah ber lo. Exam hnaih lamah hian Lehkha ka zir nasa ang reng a, inchhung chet engkimah ka chhungten min awl thiam em em a, zanrei tak tak thlengin ka zir ṭhin. Tin, ka sawi lan tel duh chu MZU a ka zirlaipui a bikin ka kawm ber ka ṭhiannu nen hian zirlai lamah kan  harsatna te inthlen tawnin kan inpui ṭhin a, a chungah ka lawm em em a ni.

# Gold medalist ni tura I neihnaah faculty lamin an ṭawiawm/pui tha chein I hria em?
- Aw tehreng mai ,tun dinhmun ka thlen theih chhan pakhat chu Kan faculty te ṭhahnemngaihna hi a ni.

# I zirna atana I chhungte pawimawhna:
- Ka zirna kawnga min nawr kal ber tu chu ka chhungte hi an ni.  Lehkha zir hi an ngai pawimawh em em a, min fuih a, min tawngṭaipui a,chhungkaw khawsa thei tak kan ni lo chungin ka zir theihnan tiin an theihtawp chhuahin ka  mamawh te min phuhruk sak a, ka zirna tur ka duhtawk a tam hun awl min siamsak bawk ṭhin. Kan han exam a result lo chhuah chang te a min hlimpui tu leh a lawm ber ber a an tang te hian result tha neih chakna min neih tir ṭhin.

I zirna atana I ṭhiante pawimawhna:
- Ka ṭhiante nen hian zirlai te kan sawi ho a, kan zir atana ṭha tur te en ho a lakkhawm chang pawh kan ngah. Mahni a han inrintawk loh leh hriatthiam mai loh chang te a awm a, ṭhianho a kan sawi khawm hian zirlaiah hriatthiamna tak tak min pek belh zawk thin. Zirlaiah leh thildangah pawh inṭhianṭhatna a lo hlutzia hi  MZU ah hian ka hriatchian phah bawk a ni.


A duhzawng leh ngainat zawngte:
Rawng- Blue
Chawhmeh- Parbawr
Incheina- Tshirt, cotton jeans leh sneakers
Rimawi- Blues, Pop, country music
Mizo ziaktu zingah- Mafaa Hauhnar
Hla- The power of your love
Hla phuahtu- C.Lalzarmawia
Teacher- ka lo zir tawhna hmun a kan zirtirtute hi mi ṭha tak tak vek an ni a, hming hmer a duhber han sawi mai tur ka hrelo
Leader- APJ Abdul Kalam

Mize ngainat zawng: - Inngaitlawm, ṭawng tlem lutuk lo leh nuih duh.  
Mize ngainatloh zawng- Chapo, mi rel ching

Hobby- Zai leh guitar perh(Ka perh thiam em em lo nain)

Relationship status- Single

Kawppui atan duhzawng- Pathian ṭih mi, ruihtheihthil ti lo, min hrethiamtu, chapo lo leh min ngaihsak em em tu.


Zawhna dang:::
1. A tel lova I awm theihloh:
- Ka chhungte leh ṭhian

2. I nun kaihruaitu:
- Ka chhungte leh Pathian thu
 
3. Hringnuna I hlauh ber:
- Mahni nun a beidawn, Pathian hre lova nun hman

4. I tih ngai miah loh tur: 
- Chapo leh Mite hnuaichhiah

5. Mizo Tualzal nuna tha I tih:
- Chhiatni ṭhatni a kan inṭawiawmna leh tlawmngaihna

6. Quote I duh ber:
- Inngaihlu apiang an tlawm anga, inngaitlawm chu chawimawiin an awm ang (Luka 18:14)


7. Mizoram leh Mizo tualzal nuna Mizo hmeichhiate dinhmun:
- Tun hma hun ngaihtuahin Mizo hmeichhiate hi kan dinhmun a ṭha tawh viau a, ram hmasawnna atan tangkaina nasa tak kan nei tawh a ni. Sorkar hna emaw,zirna lamah emaw, sumdawnna leh kuthnathawh thlengin mipa te tih theih ang tam tak kan ti ve thei tawh a, chutihrualin hmasawnna tur tam tak erawh kan la nei.

8. Hnam hmingṭhat leh hmingchhiat kawnga Hmeichhiate mawhphurhna:
- Hmeichhia te hi sawi neuh neuh kan kai hma bik emaw tihtur hi a ni a. Kan incheina te, social media a kan inpho lan dan te leh kan khawsak phung te hi hnam hmingṭhat leh hmingchhiat hriltu an ni. 


9. Hnam ziarang chawi nun kawnga hmeichhiate’n mawhphurhna:
- Kan hnam zia leh nundan te, ei leh in, thuam hrang hrang kan ngaihsan a, hman uar zel hi hnam ziarang kan chawi nun na atân a  keini hmeichhiate mawhphurhna  a ni.

10. Mizote tan ‘Fa neih tlem’inzirtir hi a ṭulin I hria em?
- Hnam tlem te chauh kan la nih avangin “Fa neih tlem” inzirtir hi a tulin ka hrelo.  Amaherawhchu chhungkaw dinhmun a zirin fa neihdan tawk kan thiam hi chu a ngaiin ka hria.

11. Mizo hnam thanmawh bawk ni a I hriat?
- kan tei rei peihlo leh kawng awlsam a piang bawh mai  kan duh na te, phunnawi leh insawisel kan la chîng te, kan lungawina chin ala hniam lutuk te hi a ni. Tin, ruihhlo lamah hian kan la tlân nasa mah mah bawk a ni.

12. Mizo hnam damna atana kawng awm ni a I hriatte?
a) Chhungkua: Ram leh hnam damna tur chuan chhungkua atanga bulṭan a ngai a ni. Mihringte zirna in/hmun hmasaber chu mahni inchhungah a ni a, chhungkua kan inenkawl dan hian kan fate nun chhoh danah kawng tam tak a hril a ni.
b) Ram hruaitu: Kan hnam damna tur chuan mimal hlawkna chauh ngaihtuah lo a ram leh hnam hmasawnna ngaihtuah tu ram hruaitu kan thlan chhuah a pawimawh a ni.
c) Mimal tin thinlung: Ram leh hnam dam nan hian pawn lam/ hmuh theih hmasawnna hi a pawimawh ber lo a. Pathian hre chungin, rinawmna, taimakna leh tumruhna nen kan thiltih apianga ke kan pen hi hnam dam nan a pawimawh ber zawk a ni.
d) Hnam thil humhalh: Kan hnam culture leh incheina te kan vawnhim a kan uarh deuh deuh a ngai a.  Tin, kan hnam min phuarkhawmtu pawimawh tak kan ṭawng te hi kaihtawi leh duhdah taka hmanloh hram a ṭha a ni.
e) Zirna:  Kan rama hmun pawimawh lai leh hna lian luah khat vek thei turin zirna kan uar chhunzawm zel a ngai.

13. Hnam chhan nana Hmeichhiate ṭangkaina leh mawhphurna?
- Mihring a lo pian a, a nunkawng a kaihruaitu hmasaber chu nu/hmeichhia a ni. Chuvangin mizo hnam ziarang leh nunphung te a tir aṭangin hmeichhiate hian kan fate kan zirtir tur a ni. Chu mai bakah mahni hnampui ngei pasal atan a neih hi kan hnam boralna lak a ta kan chhan theih dan a ni.

14. Zirna, Khawtlang leh kohhran hi?
- Heng pathumte hi thil pawimawh tak vek an ni. Zirlai kan nihlai hi chuan khawtlang leh kohhranah inhman chintawk hriat a ṭha ka ti a. Amaherawhchu kan lo hlawhtlin hunah chuan kan thiamna leh finna hi mahni tan chauh nilo in  kan khawtlang leh kohhran tan kan hmang tur a ni.

15. Khawtlang, kohhran leh nangmah:
- Zirna lamah hian ka la insawrbing deuh avangin Khawtlang leh kohhran ah hi chuan ka la inhmang lutuk lo.

16.Social Media leh Nangmah:
- Whatsapp hi ka khawih a, abak hi chu ka khawih ngailo.(Facebook account chu ka siam ve a mahse ka khawih tawhlo)

17. Mizoram ṭhalai tam tak tlakchham:
- Mizo ṭhalai te hian taimakna leh thawhrimna hi kan la tlachham a, thil kan tih in kan tei rei peihlo a, kawng awlsam lam kan zawh fo ṭhin. Midangte  ṭhatna aia an ṭhatlohna lai sawi te kan la ching zawk a.Tin, ruihhlo lam a tlân hi kan la tam viau bawk.

18. Mizo ṭhalaite hian ngaihsan tur dik an ngaisangin i hria em?
- Hma chu kan sawn tawh viau nain ngaihsan tur dik ngaihsan na chang hrelo hi kan la awm fur mai. Kan hma hun atana ṭangkaina nei lemlo social media-a rawn lar chho te kan ngaisang a. Miin hlawhtlinna chang tura a hreawm paltlang dan ngaihtuah lovin a dinhmun chelh san leh san loh lamah hian ngaihsan tur hi  kan la teh deuhin ka hria. 

19. Ngaihsan tur dik nia I hriat:
- Mi tumruh, thawkrim leh rinawmte

20. Hlawhtlinna tura pawimawh:
- Mi zawng zawng kan theih zawng leh thiam thil te a inang lo a, kan theihna zawnah ṭheuh taima leh tumruh takin ke pen ila, hlawhtlinna hian mi la zui ngei ang.


21. Hloh I hlauh ber:
- Pathian nen a kan inlaichinna leh ka chhungte.


22. Hnam dang nupui pasal neih hi-
Mizo hnam hmangaiha humhim theitu hi keini a chhunga cheng mizo mipuite bak hi kan awm lo a, chuvangin hnam dang nupui pasal a neihloh hrâm i tum ang u.

I ṭhalaipuite tana fuihna:
- Hlawhtlinna chang tur hian mi bik nih a ngai lo a, taimakna leh thawhrimna hi hlawhtlinna min neihtir tu zawk a ni tih hrerengin kan hmachhawpah ṭheuh ke pên ila. Kan tun hun hman mek chauh nilo, nakin hun ngaihtuah chungin hma thui tak kan thlir thiam a pawimawh a. Kan ṭawngkam chhuak hi uluk ila, mi hnena kan ṭawngkam hian an rilru a ti hnual thei a ni tih hriain midangte tiphurtu leh ṭanpui tu nih zawk I tum ṭheuh ang u.


EXPLOREMIZORAM.COM I hmuh dan:
- EXPLOREMIZORAM.COM  hian chanchinthar awlsam taka mipuiten kan hmuh theihin min chhawp chhuah sak a. Chu mai bakah Mizoram tourism te, art &  culture leh hlawhtlinna changte chawisang a an chanchin an rawn chhuah ṭhin te hi a ṭha ka ti a, midangte fuihtu ṭha tak a ni. In kal leh zelna turah duhsakna sang ber ka hlan a che u.


Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)
Tags:

Post a Comment

He post chungchanga i ngaihdan lo sawi ve rawh:

Post a Comment

He post chungchanga i ngaihdan lo sawi ve rawh:

Previous Post Next Post