Road Safe Bike Rally leh Awareness Campaign

Aizawl | February 6, 2021: District Road Safety Committee, Lunglei District leh National Highways & Infrustructure Development Corporation Limited (NHIDCL) te buatsaihin Road Safety Month   (18th January- 17th February ) 2021  hman mek ah District Road Safety Committee in a rel tawh angin Bike Rally leh Awareness Campaign hun hmangin, Kumin thupui atan “Fimkhur la, Nunhumhim rawh”tih ani.

Bike Rally hi Convention Centre atangin Pu M. Misael, SDO (S) in a vailiama, Pukpui Centenary thlengin Sethlun ah kual lehin Convention Centre ah an tawp a ni.

Rally naah hian Lunglei khawpui chhung hmun pawimawh laiah lirthei chetsualna laka kan himna tur point hrang hrang an au chhuahpui a. Bike Rally ah hian Royal Knights Rider, Leitlang Lightning leh XT Motto Squard member 30 te bakah Leitlang Biker Girls  te an tel bawk a ni.

 Road Safety Month Awareness Campaign hun hi Convention Centre Conference Hall ah hman ani a, he hun hi Pu Vanlalrinawma Pachuau, ADTO, Lunglei in kaihruaiin Pu Jacob Hlychho, Addl. SP, Lunglei in Road Safety Month 2021  hman mek chungchang sawiin khawvela motor awm zawng zawng za zela pakhat(1%) chauh hi India rama awm anih laiin, khawvela motor accident awm zawng zawng za zel a paruk (6%) zet hi India ram a thleng ani ati a. India ramah motor accident a tlem zel theih nan 1988 kumah Central Sorkar chuan National Road Safety Council a din a, kum 1989 atangin kumtin India ram pumah Road Safety Week hman a lo ni ta a,tun kum 2021 ah chuan Road Safety Month hial kan hmang ta ani ati. India rama motor accident lo thleng thin  75%  hi a khalhtu fimkhur loh vanga thleng thin ani a, India rama motor  accident avangin kumtin mi nuaikhat leh singnga velin nunna hlu tak an chan thin thu a sawi bawk.

Mizoram ah pawh motor accident avangin kumtin mi tam takin nunna an chan phah thin a, Lunglei ah kum 2020 chhungin accident avangin mi 9 in nunna an chan a, mi 10 in hliam an tuar ani. Motor accident hi kan fimkhur chuan nasa takin kan pumpelh theih ani ati bawk. Motor accident laka kan him theih nan rui chungin motor khalh te, kumtlinglo motor khalh te, kawng kal te ngaichang lova motor khalh te, kawngpuia intlansiak te, Motor khalh laia mobile phone hman te, Motor khalh laia meizial zuk te, taksa fit lova motor khalh te leh motor fit lo khalh bakah Traffic Rules leh Regulations te tha taka zawm turin  kalkhawm te a chah ani.

Pu Rahul Amin Chaudhury, Manager NHIDCL, Lunglei in power point presentation hmangin Road safety chungchang sawifiahna a nei bawk ani.

Vawiin a Raod Safety Month awareness campaign ah hian Official, Zoram Driver Union,  Sumo Driver Association, Taxi Driver Associoation, Rickshaw Driver Association, Leitlang Ligthning, Royal Knights Rider, XT Motto Squard leh Leitlang Biker Girls te an tel ani.