MTKP-in Fa neih tam inzirtirna kalpui tum; thalaite'n rilru hrisel an neih theih nan hmalak tum

Aizawl | Feb 18, 2021: Mizoram Thalai Kristian Pawl rorel vawi 67-na BCM Biak In, Electric Veng Aizawl ah Feb 11 a  neih  chuan Budget atan Cheng Nuai 13 pawmin, TKP memberte'n rilru hrisel zawk an neih theih nan MTKP in hmalak nise tih leh Fa neih tam in zirtir kawngah MTKP in hma la se tih an rel.

MTKP hian Kum 2020 a TKP Ramthimni thawhlawm tlingkhawm chu Mission rawngbawlna atan tangkai taka hman ani. TKP Day thawhlawm tlingkhawm chu Mission Field-a School leh Biak In sak tanpuina atan hman a ni bawk.

Mizoram Thalai Kristian Pawl hian a hmalakna langsar tak Voluntary Blood Donation an kalpui thin a. Aizawl Area, Lunglei Area leh Lawngtlai Area ah te Blood Donation Calendar hi kalpuiin kum kalta chhung khan MTKP hmingin Thisen Unit 1528 an pe bawk a. Mizoram pumpuiah thisen pe tam lam ah pathumna dinhmun an hauh bawk ani.

Kumin 2020 chhung khan hripui leng karah MTKP hian hmalakna langsar tak pahnih neiin Mizo tawng humhalh leh tih hmasawn kawnga hmala a. Hemi pual hian Sub-Committee te dinin booklet leh Youtube channel te a siam a. Tin, Pathianin min siam dan dik tak, Mipa leh hmeichhia nihna (Gender Identity) chungchanga inzirtirna kalpui niin, Counselling guide book leh film hmanga intihsiakna pawh buatsaih a ni bawk.

Tun dinhmun ah hian MTKP Pastor Bial 88-ah Unit TKP 420 awmin, member 44,228 awmin mipa 27,292 leh hmeichhia 16,936 an ni a. Kum 2020 chhung khan Kohhran dan puitlingin tuak 436 innei in, Dante in tuak 311 innei an awm bawk a ni.

MTKP rorel hi MTKP President Rev C.Vanlalmuankima'n a kaihruai a. Kumin rorel inkhawm hi Covid-19 avangin kalphung ti danglam hret in, Bial TKP aiawhin pakhat theuh leh MTKP Executive Committee member te'n ro an rel a. Rorel member hi mi 115 he hun ah an tel a ni. Kum dangah chuan unit tin atangin mi pakhat leh Bial atangin bial aiawh mi pahnih an tel thin a ni.

MTKP rorel vawi 67-na ah hian hengte hi hmalak nise tiin an rel
1. Faneih tam in zirtir kawngah MTKP in hmalak nise
2. TKP member-te'n rilru hrisel zawk kan neih nan MTKP-in hma la se tih te
3. MTKP inneih lawmpuina Certificate kan pek thin hi Mizo tawng leh Sap tawng a print a nih theih nan MTKP-in hma lak nise
4. Kum 2022 MTKP Inkhawmpui pual Unit tin fehchhuah neih nise
5. Lunglei ah Thalaite tan Youth Centre din tura hmalak dan kawng zawn nise an ti bawk.

Kumin MTKP rorel hi BCM General Secretary Rev F.Ramdinmawia, Executive Secretary Aizawl Area Rev Dr.R.Lalthanmawia leh Aizawl East Bialtu Pastor Rev Hrangaia Hmar ten an tel pui ani.

Post a Comment

0 Comments