Siampuii Ralte-in music video 'thawnthu tawp thei lo tur' buaipui mêk

Aizawl | February 18, 2021: A aw ngaihnobei tak vang leh a nui hmel mawi tak vanga mi hriat leh ngainat hlawh, tlerawl zaithiam Siampuii Ralte chuan Music Video a buaipui mêk niin thu kan dawng.


Kan thudawnna chuan, February 17 aṭang khan shooting an nei ṭan a, zawh thuai an inbeisei niin a tarlang.

Siampuii Ralte music video hi March thla tawp lamah kan hmuh theih a rinawm. Siampuii Ralte chuan, "Vawiin-ah kan shoot leh ang a, rokhawlhna a awm loh chuan kan zawh theih kan inbeisei" a ti a. "march thla tawp emaw april thla tirah kan tihchhuah theih ka ring" tiin Music video chhuah hun tur a sawi bawk.


Siampuii Ralte hla thar tur hi 'thawnthu tawp thei lo tur' tih a ni a; He hla hi Zaithiam Zirtluangpuii hla lar zinga mi 'Ka liam mai nang e' tih leh JT Production hla 'Min dem lo la' tih thluk mawi taka lo siam tawhtu Johntea Parmawi phuah niin a thlûk pawh ama siam a ni nghe nghe a, beng a tlaiin, a mawi dangdai leh viauin a rinawm.



He hla 'Thawnthu tawp thei lo tur' hi khawvela mihringte dam chhung nia kan inhmangaihna chu thihnain a ṭhen mai tur thu pho chhuahna lam hla a nih piah lamah he hlaa inhmangaih em em nula leh tlangvalte inhmangaihna hi mitthi khawvelah pawh tawp mai lo tura duhna lam hla a ni.

Music video-ah hian Siampuii Ralte bakah a thianpa Sihphir tlangval Nelson Zothanpuia a inlan ve dawn a. Anni pahnih hian nula tlangval inhmangaihna thawnthu hi an chang dun dawn a ni. 


Music leh Recording lam hi H Production lamin an buaipui a, videographer hi Anthony WoWv niin, Music video hi tunlaia Media Production team indin thar WoWv Production-in an produce dawn bawk a ni.

Post a Comment

0 Comments