Mizoram Sava chhiarpui nei dawn!

Aizawl | Feb 18, 2021: Conservation Mizoram buatsaih-in Chapchar Awllen Sava chhiarpui 2021 neiin, Mizoram Sava chhiarpui February 27 hian Sailam Bird Sanctuary-ah an nei dawn a, Mizoram hmun hrang hrang atang pawhin zawm ve theih a ni.




Sailam Bird Sanctuary (SBS) hi sawrkar tel lo a khawtlang tangrualin sava leh nungchate zalenna hmun tura an siam a ni a, hemi kawnga hmalatu Sailam Joint NGO te leh a bik takin Sailam Ecological Conservation Society (SECS) te hmalakna a ropuii takzet a ni.
Chapchar Awllen Sava Chhiarpui - 2021 hi Zoram pum huapa neih tura ruahman a ni a, Mizoram rama sava chanchin tuipuitute zawng zawng he hun hi lo hmang theuh turin Conservation Mizoram chuan a sawm vek a ni.
Chapchar Awllen Sava Chhiarpui - 2021 hi Mizoram-a savate dinhmun chiang taka hriat leh mi zawng zawngin kan rama sava mawi leh hlu tak tak te ngaihhlut nachâng kan hriat theihna tura mitin sava chanchin zirna leh savate chanchin hriatna lama hnuhhnaihna tura ruahman a ni. Kan ram hi nungcha leh ramhmulah a hausa a, khawvel pum huap pawha vâng leh hlu tak tak te pawh kan nei nual rêng a ni. Sava phei chu a chi mang mai hlauhawm khawpa vâng te pawh kan ramah hian an la awm a, kan tana an hnathawh nasatzia te hre nawn thar leh chunga kan ngaihhlut a, kan roh a, kan humhalh hi a tul tawh takzet a ni. Kan ram savate hrechiang turin he Chapchar Awllen Sava Chhiarpui - 2021 ah hian  tel ve ngei turin Conservation Mizoram  a tuimite a sawm a ni.
Chapchar Awllen Sava Chhiarpui - 2021 hriat turte:
# Sailam Bird Sanctuary (SBS), Sailam-ah neih tur a ni a, he huna kal thei tur te tan hian Organising Secretary hnenah Whatsapp hmangin ni 24.2.2021 (Nilaini) dar 5:00 p.m. hma ngeia inhriattir tur a ni. 
# Riah man, chaw (Zirtawp tlai leh Inrinni zing) ei man hi a thlawn tur niin CASC-2021 hun chhunga thingpui in man pawh a thlawn a ni ang.
# Riahna tur Birder's Cottage a awm a, khua hi la vawt tura rin a nih avangin mutbu, mahni lum tawk tur inken a ngai thung. 
# Mahnia puan in (tent) keng duh tan a ken theih a, Organizer ten an ruahmanna hmunah puan in zar tur a ni ang. 
# Zirtawpni (26.2.2021) tlai dar 4:00 thleng Birder's Cottage, Sailam Bird Sanctuary Sailam-ah registration ti tawh te in report theih a ni ang a, hemi zan hian 'Inkawmhona hun' a awm bawk ang. He 'Inkawmhona hun' hi participants-ten ngaipawimawha tel ngei turin kan inbeisei a, a tel lo te chu a tuk zinga sava chhiarpui neihnaa harsatna an tawk a nih pawhin Organizer ten mawh an phur dawn lo a ni. 
#Sailam Bird Sanctuary (SBS) hi sawrkar tel lo a khawtlang tangrualin sava leh nungchate zalenna hmun tura an siam a ni a, hemi kawnga hmalatu Sailam Joint NGO te leh a bik takin Sailam Ecological Conservation Society (SECS) te hmalakna a ropuiin an dan zamte mitin ten zawm hram turin kan inngenin kan inhriattir takmeuh a ni.
# Chapchar Awllen Sava Chhiarpui - 2021 hi Zoram khawi hmunah pawh mahni remchanna hmun apiangah neih theih a ni a, ni ruat bik 27.2.2021 (Inrinni) ah hian kan chhehvela sava kan hmuh theihte chu hun bituk bik chhung siamin chhinchhiah tur a ni. 

Entirnan:
A hmun - Laipuitlang (10:00 am - 11:00 am)
Sava hmuhte :
1. Chawngzawng (10)
2. Parva (7)
3. Khawmual Chinrang (3)
Kan sava chhiar leh chhinchhiah te (checklist) hi Organising Secretary hnenah Whatsapp hmangin ni 27.2.2021 (Inrinni) chawhnu dar 12:00 (noon) hma ngeia thawn leh tur a ni.
_______________________________________
HRIATTUR PAWIMAWHTE : 
Registration last date : 24.2.2021 (5:00 pm)
Thlen kim hun (SBS kal tur te tan chauh) : 26.2.2021 (4:00 pm)
Sava chhinchhiahte thehluh 
hun : 27.2.2021 (12:00 noon)
_______________________________________
Registration tih dawna ziahlan tur te : 
Hming* :
Khua/Veng* : 
Contact No* :
Organisation : 
[Mahnia Puan In (tent) keng tur ten ziahlan tur a ni]*
(*) hi ziahlan ngei ngei ngai a ni.
Organising Secretary: Lalawmawia Sailo, 9862887971 (Whatsapp only)

Post a Comment

He post chungchanga i ngaihdan lo sawi ve rawh:

Previous Post Next Post