Zirtirtu indaih loh zual sikulte harsatna phuhruk nan zirtirtu 150 chuang la dawn

Aizawl | January 22, 2021: School Education Minister Pu Lalchhandama Ralte chuan zirtirtu indaih loh zual school-te harsatna phuhruk nan Managing Committee-in khawtual mi an lo rawihna tur ruahman a ni, a ti.


Nimin zing khan School Education Minister Pu Lalchhandama Ralte chuan Zuangtui leh Thuampui venga School te a tlawh kual a. Thuampui khawtlang hruaitute hmaah thusawiin Mizoram sorkarin zirna a dah pawimawh hmasa a, zirtirtu indaih loh zualna school-te harsatna phuhruk nan High school zirtirtu 150 chuang lak a ni dawn a, hengte hi Managing Committee-in khawtual mi an lo rawihna tur a ni, a ti.
Minister chuan sorkarin zirtirtu 150 chuang lak a phalsak vek tawh chu hrileng avangin lak mai theih a nih tak loh avangin tuna zirtirtu indaihlohna avanga harsatna lo sut kian nan hetiang hian ruahmanna siam a ni, a ti a. Managing Committee ten zirtirtu an rawihna tur cheng nuai 157 pawh pawm fel a ni tawh tih a sawi bawk.
Minister chuan khawtlang hmasawnna leh changkanna tur  te, Aizawl khawpui changkanna tur leh Mizoram pum changkanna tur chu zirna a ni a ti a. High School sakna atan Thuampui khawtlangin ram an pe chu lawmawm a tih thu a sawi.
School Education Minister hian tukin khan Zuangtui Adhoc Aided High School building sak That ngaite, Primary leh Middle School te chu an awmna mual leilung a chet avanga sawn ngai te a tlawh a. Govt. Thuampui Primary School te, Govt. Tej Singh Middle School, Thuampui te, Thuampui High School dinna tur ram te a en a. Zuangtui leh Thuampui a tlawhna ah te hian Minister hi School Education Director Pu James Lalrinchhana, Joint Director Pu Lalhmachhuana leh Department officer dangten an tawiawm a.  Zirtirtute leh khawtlang hruaituten an lo dawngsawng a ni.

Post a Comment

0 Comments