Transport minister-in Road Safety Month, 2021 hawng

Aizawl | January 18, 2021: Vawiin khan Transport Minister TJ Lalnuntluanga chu khuallian niin Road Safety Month, 2021 hawnna Transport Department Conference Hall-ah a nei.

Minister Pu T.J Lalnuntluanga chuan COVID-19 hripui leng karah sawrkar kaihhruaina SOP zawma Lamliana Himna Thla- Road Safety Month 2021 hawnna programme a kalkhawm te chungah lawmthu a sawi a. Kumdang anglo in thla khat chhung (18.01.2021- 17.2.2021) hman a ni dawn a, he hun chhungah hian Traffic Police te nen tangkawpin dan bawhchhiahte hremin ‘No Tolerance Week’ buatsaih a lo ti tawh thin a, amaherawhchu tun kumah chuan ‘Help and Guidance Desk’, Vanapa Hall kawtah buatsaih a ni dawn a ni, a ti a. Sawrkar hi mipuite nu leh pa a nih angin, nunna leh bungrua tam tak, sum leh pai hlu tak chan fo thinna road accident laka mipui him theihna tura hi a ngai pawimawh em em a, mipuiah zirtirna a tam thei ang ber pe turin thawktute a ngen a, road safety month zawh hnuah pawh road safety pawimawh zia hria in leh kan nitin nuna bet tlat a ni tih hria in motor accident laka mipui him theihna tura tan la chhunzawm turin a chah bawk a. Lirthei accident chungchangah hian keimah ni theuh kan pawimawh hle a, fimkhur chung pawhin midang tihsualah accident kan tawk thei reng a ni tih hrereng chungin awareness kalpui hi kan ti makmawh a ni, a ti a. Lirthei vawn dan chungchangah leh khalh dan chungchangah sawrkar in dan hrang hrang a siam a, lirthei neitute leh a khalhtu ten heng dan hi tha taka an zawm a ngai a, kan dan neih sa te tha taka lirthei neitute leh a khalhtu ten an zawm chuan motor accident hi a tlahniam dawn a ni tiin a sawi.

Minister chuan kumin atana thupui- ‘Fimkhur la, Nun humhim rawh’ tih hi kan hriat nawn reng a ngai a, fimkhurna hian nun himna a keng tel tlat  a, pawlawh taka lirthei khalh te, rui chuga lirthei khalh te, rui chunga khalh te, dan phalna nei lova lirthei khalh te, lirthei fit lo khalh te hi accident thlen thin thu an ni a, fimkhurlohna leh dan zawmlohna entirnan leh documents fel lo a lirthei khalh te hi ram rorelna dan zahlohna leh midangte tana harsatna leh chhiatna nasa tak thihna leh piansualna thlenga thlen thei tu a ni tih hi hre thar leh turin a chah a. Pathian-in nunna hlu tak min pek hlutzia hre  reng chungin, he Road Safety Month, 2021 hman turah hian nunna hlu tak kan chhan him theih nan, fimkhur takin lirthei i khalh tlang teuh ang u, tiin mipuite a sawm thar leh a ni.

Road Safety Month, 2021 atana hian Minister in road safety chungchanga a thuchah local channel ah te tihchhuah tawh a ni a. Aizawl bakah district headquarters a DTO office zawng zawngah vawiin hian hawn a ni a, mipuite awareness pekna banner hmun thenkhatah tar a nih bakah motor zuar (dealer) te pawn road safety month banner hi an dawrah an tar teuh bawk a, talk show vawi hnih buatsaih a ni ang a, zirna in hawn hunah road safety pledge nei tura hmalak a ni bawk a. Road safety thuchah tawi puangturin VC leh LC te ngenna siam a ni bawk a. Heng bakah hian pamphlets leh leaflets te sem chhuah a ni bawk ang a, Insurance pawimawhna leh pollution chungchanga hriattur thuchhuah a ni bawk ang.

- DIPR