Aizawl | January 18, 2021: Chief Minister Pu Zoramthanga chuan tukin zing khan Republic Veng, College Veng, Bethlehem leh Bethlehem Vengthlang tlawhin khawtlang hmasawnna ruhrel siamna tur rawtna awm te a hmunah a enpui. Chief Minister hi SYS Minister Pu Robert Romawia Royte chuan a tawiawm a ni.
Chief Minister hian College Veng\Venghlui field, Bethlehem Vengthlang field, Republic Veng Vety mual leh Bethlehem Veng Primary school bula basketball court hmun te a tlawh a. Infiamna hmunhma changtlung zawk bakah vantlang tana tangkai tur mamawh dangte din theihna tur a en.
Chief Minister chuan veng neituten an veng tana tha ber leh mamawh ber tur te ngaihtuahin, sawrkar hotute nen inberawn chungin, hmathlir tha tak neia hma la turin a chah a. Chief Minister chuan helai bial atanga Aizawl khawpui chhung kawngpui, main spine pawhna kalkawng siam chu a ngaihpawimawh thu a sawi a. Zokhawsanga Assam Rifles an insuan theih veleh hma lak tan a theih tur thu a sawi. COVID-19 hrileng avanga beisei anga Assam Rifles an insuanchhuah lawk theihloh dan leh, boruak a ziaawm chhoh zel chuan hmalakna dang hrang hrang pawh chak zawka lak thuai a nih theih tur thu Chief Minister hian a sawi a ni.
Sports & Youth Services Minister Pu Robert Romawia Royte chuan veng chhung tana tangkai tur mai bakah khawpui pum tan, state pum tana tangkai thei tur infiamna hmunpui leh thil dang dang din tura veng mipui beisei anga hma lak tuma ke pen a ni chu lawmawm a ti a. Hmalakna kal zel turah khawtlang mipui tawiawmna a sawm bawk.
Chief Minister Pu Zoramthanga hian Bethlehem Vengthlanga bekang eisual avanga damlo an enkawl mek te chu a kan in, damdawi mamawh lei nan pawisa a pe a ni.
Vawiin hian Chief Minister hi Sports Minister bakah Sports Department Secretary Pu H. Lalengmawia, AH&Vety Department Secretary Pu Lalzarmawii, Mizoram State Sports Council Secretary Pu John Tanpuia leh official dangten an tawiawm a ni.
- DIPR
Post a Comment
He post chungchanga i ngaihdan lo sawi ve rawh: